విశాఖ-పలాస ఈఎంయూ రైలు సేవలు పునః ప్రారంభం
Andhra Pradesh Telugu | Suryaa Desk | Published : Thu, Feb 16, 2023, 01:09 PM
‘‘ఉత్తరాంధ్ర ప్రజలు ఎంతో కాలంగా ఎదురుచూస్తున్న విశాఖపట్నం కేంద్రంగా రైల్వేజోన్ ఏర్పాటు చేయాలని పార్లమెంట్ సమావేశాల్లో ప్రస్తావించాను. రైల్వేజోన్ సాధిస్తే.. జిల్లా మీదుగా మరిన్ని రైళ్లు రాకపోకలు సాగిస్తాయి. దీనిపై రైల్వే మంత్రిని కూడా కలిసి విన్నవించా’’నని ఎంపీ కింజరాపు రామ్మోహన్నాయుడు తెలిపారు. పొందూరు రైల్వేస్టేషన్లో జిల్లా టీడీపీ అధ్యక్షుడు కూన రవికుమార్తో కలిసి.. విశాఖ-పలాస ఈఎంయూ రైలు సేవలను ఆయన పునః ప్రారంభించారు. పొందూరు స్టేషన్ నుంచి పలాస వరకూ రైలులో ప్రయాణించారు. ఎక్కడికక్కడ రైల్వేస్టేషన్ల వద్ద టీడీపీ నాయకులు, అభిమానులు వారికి ఘనస్వాగతం పలికారు. ఈ సందర్భంగా ఎంపీ రామ్మోహన్నాయుడు మాట్లాడుతూ.. ‘‘కరోనా వ్యాప్తి సమయంలో లాక్డౌన్ విధించడంతో విశాఖ-పలాస ఈఎంయూ రైలు సేవలను నిలిపివేశారు. కరోనా తగ్గుముఖం పట్టినా.. ఈఎంయూ పునరుద్ధరించలేదు. దీంతో ఎంతోమంది ప్రజలు, ఉద్యోగులు ఇబ్బందులు పడ్డారు. దీనిపై ఈస్టుకోస్టు రైల్వే జనరల్ మేనేజర్, విశాఖ డీఆర్ఎంను కలిసి సమస్య విన్నవించాం. రైల్వేశాఖ మంత్రి దృష్టికి కూడా తీసుకెళ్లామ’’ని తెలిపారు. ఈఎంయూ సేవలు పునరుద్ధరించినందుకు వారందరికీ ధన్యవాదాలు తెలిపారు.
|
|