టీడీపీ నేత గురించి ఇంటి దగ్గర ఆరా తీస్తుండగా...పట్టుకొని పోలీసులకు అప్పగించారు
Andhra Pradesh Telugu | Suryaa Desk | Published : Sat, Feb 18, 2023, 07:48 PM
కడపజిల్లాలో కలకలం రేగింది. కడప జిల్లాకు చెందిన వైఎస్సార్‌సీపీ నేత గుంటూరు జిల్లాకు చెందిన టీడీపీ నేత ఇంటి దగ్గర రెక్కీ చేయడం కలకలంరేపింది. గుంటూరు జిల్లా తాడికొండ మండలం కంతేరుకు చెందిన టీడీపీ నేత బండారు కోటేశ్వరరావు ఇంటి సమీపానికి.. కడప జిల్లా రాజుపాలెం మండలం అయ్యవారిపల్లెకి చెందిన ఎన్‌ రవీంద్ర అనే వ్యక్తి వెళ్లారు. గ్రామంలో ముఖ్య నాయకుడి ఫోన్‌ నెంబరు కావాలని అడిగాడు. వెంటనే కోటేశ్వరరావు ‘నువ్వెవరు.. మా ఇంటికి ఎందుకు వచ్చావు. ఏం పని మీద వచ్చావు’ అని అని ప్రశ్నించారు.
రవీంద్ర దగ్గర ఉన్న గుర్తింపు కార్డులో నియోజకవర్గ వైఎస్సార్‌సీపీ బీసీ సెల్‌ ఇంఛార్జ్ అనే పేరు ఉంది. తనకు మాజీ మంత్రి అనిల్‌ కుమార్ యాదవ్‌ తెలుసు అంటూ పొంతన లేని సమాధానం చెప్పడంతో స్థానికులకు అనుమానం వచ్చింది. దీంతో అతడ్ని చితకబాది పోలీసులకు అప్పగించారు. పోలీసులతోనూ పొంతన లేని సమాధానం చెప్పినట్లు తెలుస్తోంది. స్థానికంగా ఉండే వైఎస్సార్‌సీపీ నేతలు కొందరు పోలీస్ స్టేషన్‌కు వెళ్లి అతడు గుంటూరురులోని వైఎస్సార్‌సీపీ పార్టీ కార్యాలయంలో జరిగే సమావేశానికి వచ్చాడని చెప్పారు.
అయితే రవీంద్రకు మతిస్థిమితం లేదని.. వదిలి పెట్టమని కోరారు. పోలీసులు అతడ్ని ప్రశ్నించిన తర్వాత వదిలి వేసినట్టు సమాచారం. టీడీపీ నాయకుడి ఇంటి దగ్గర వైఎస్సార్‌సీపీ నేత రావడం అనుమానాస్పదంగా ఉందని నేతలు అంటున్నారు. కడప జిల్లాకు చెందిన వ్యక్తి గుంటూరు జిల్లాలో ఉండే నేత గురించి ఆరా తీయడంపై అనుమానం వ్యక్తం చేస్తున్నారు. దీనికి సంబంధించి పూర్తి వివరాలు తెలియాల్సి ఉంది.
|
|