వధువు చనిపోయినా పెళ్లిమాత్రం ఆగలేదు...పుట్టేడు దుఖంతో అలా చేశారు

ఓ పెళ్లి మండపంలో గుండె పోటుతో వధువు చనిపోయనా పెళ్లి తంతు మాత్రం ఆగలేదు. పుట్టెడు దుఖంలోని ఆ వధువు తల్లిదండ్రు పెళ్లి కానిచ్చారు. ఇలా పెళ్లి సందడితో కలకలాడుతోన్న ఇంట ఒక్కసారిగా విషాదం అలముకుంది. మరికొన్ని గంటల్లో వివాహం జరగనుండగా.. వధువు గుండెపోటుతో మృతి చెందింది. అయితే వధువు కుటుంబం మాత్రం పుట్టెడు దుఃఖంలోనూ కీలక నిర్ణయం తీసుకుంది. ఊరేగింపుగా ఇంటికి వచ్చిన వరుడు (Groom), అతని కుటుంబసభ్యుల్ని నిరాశకు గురిచేయకుండా తన రెండో కుమార్తెను ఇచ్చి వివాహం జరిపించింది. పెద్ద కుమార్తె పోయిన విషాదాన్ని దింగమింగుకుని మరో బిడ్డను పెళ్లి కూతురి స్థానంలో తల్లిదండ్రులు కూర్చోబెట్టిన ఈ ఘటన గుజరాత్‌ లోని భావ్‌నగర్‌లో గురువారం చోటుచేసుకుంది.

భావ్నగర్ జిల్లాలోని సుభాశ్ నగర్ ప్రాంతానికి చెందిన జినాభాయ్ భాకాభాయ్ రాథోడ్‌కు ముగ్గురు పిల్లలు. వీరిలో ఇద్దరు అమ్మాయిలు, ఒకరు అబ్బాయి. పెద్ద కుమార్తె, కొడుక్కి పెళ్లిళ్లు కుదిరాయి. పెద్ద కుమార్తె హేతల్‌కు నారీ గ్రామానికి చెందిన రాణాభాయ్ బూతాభాయ్ కుమారుడు విశాల్‌ భాయ్‌తో పెళ్లి నిశ్చయమైంది. ఫిబ్రవరి 23న వివాహం జరిపించడానికి ముహూర్తం పెట్టారు. మర్నాడు కొడుక్కి పెళ్లి ముహూర్తం నిర్ణయించారు. దీంతో ముహూర్తం ప్రకారం పెళ్లి గురువారం జరగాల్సి ఉంది. వివాహానికి ఘనంగా ఏర్పాట్లు చేశారు. ఇరు కుటుంబాల్లో కోలాహలం నెలకుంది.

వరుడు విశాల్భాయ్ కూడా తన గ్రామం నుంచి పెళ్లి ఊరేగింపుతో వధువు ఇంటికి చేరుకున్నాడు. తాను ఒకటి తలిస్తే విధి మరొకటి తలిచినట్టు ముహూర్తానికి కొన్ని గంటల ముందు హేతల్ ఒక్కసారిగా స్పృహతప్పి పడిపోయింది. తక్షణమే కుటుంబసభ్యులు ఆమెను చికిత్స కోసం ఆస్పత్రికి తరలించారు. అయితే, హేతల్ అప్పటికే మృతి చెందినట్లు వైద్యులు నిర్ధారించారు. ఆమె మృతికి గుండెపోటు కారణమని డాక్టర్లు స్పష్టం చేశారు. కాసేపట్లో పెళ్లి జరగాల్సి ఉండగా వధువు మృతి చెందడంతో ఇరు కుటుంబాల్లోనూ విషాదఛాయలు అలముకున్నాయి.

కానీ, ఇటువంటి క్లిష్ట సమయంలోనూ వధువు కుటుంబం గుండె బరువెక్కే ఓ కఠిన నిర్ణయం తీసుకుంది. వరుడి ఊరేగింపు తిరిగి వెళ్లకుండా ఉండేందుకు చనిపోయిన పెద్ద కుమార్తె స్థానంలో చిన్న కూతురును విశాల్కు ఇచ్చి పెళ్లి చేయాలని నిర్ణయించారు. దీనికి విశాల్ కుటుంబం కూడా అంగీకారం తెలిపింది. దీంతో హేతల్ మృతదేహాన్ని మార్చురీలో భద్రపరిచి.. చిన్న కుమార్తెను విశాల్కు ఇచ్చి వివాహం జరిపించారు. విధి ఆడిన వింత నాటకంతో మరదలు కావాల్సిన అమ్మాయి.. భార్యగా మారింది. రాథోడ్ కుమారుడి వివాహం శుక్రవారం జరగాల్సి ఉండగా.. ఈ సంఘటనతో వధువు ఇంట్లో కళ తప్పింది.