జగన్ హామీలను విస్మరిస్తే..వాటిని మేం అమలు చేస్తాం: నారా లోకేశ్
Andhra Pradesh Telugu | Suryaa Desk | Published : Sat, Feb 25, 2023, 05:03 PM
గత 2019లో యువతకు జగన్ హామీలిచ్చి తప్పిన వాటిని తాము నెరవేరుస్తామని.. మాట తప్పి, మడమ తిప్పిన వారికి బుద్ధి వచ్చేలా చేస్తామని టీడీపీ జాతీయ ప్రధాన కార్యదర్శి నారా లోకేష్ అన్నారు. సీఎం జగన్‌కు ఏపీలోని యువత మొత్తానికి ఉద్యోగాలిచ్చి దాన్ని రిటర్న్ గిఫ్ట్ ఇస్తాను అని ఆయన పేర్కొన్నారు. తాను వాల్తేరు వీరయ్య సినిమా చూశానని.. తాను మెగాస్టార్ అభిమానిని అన్నారు. ఎంతైనా బాలయ్య ముద్దుల మామయ్యగా అభిమానిస్తానన్నారు. ఆయన అన్ స్టాపబుల్.. ఆయన రిలీజ్ సినిమాకు మొదటి షోకు మొదటగా ఉండేవాడినన్నారు.
తన స్లిమ్, ఫిట్ నెస్ కు కారణం బ్రాహ్మణి అన్నారు లోకేష్. కోవిడ్ సమయంలో రెండేళ్లు తాను ఆమెకు దొరికిపోయానని.. ప్రతిరోజు పరిగెత్తించేది, తన డైట్‌ను కంట్రోల్ చేసేది అన్నారు. ప్రస్తుతం పాదయాత్రలో తాను ఇక్కడ ఏం తిన్నా తనకు తెలిసిపోతోందని.. తన సీక్రెట్, తన సక్సెస్ భార్య బ్రాహ్మణీనే అన్నారు. తాత, తండ్రిలు సీఎంలుగా చేశారనే ఒత్తిడి కంటే బాధ్యత ఎక్కువ ఉందన్నారు. విద్యార్థుల ప్రశ్నలకు లోకేష్ సమాధానం ఇచ్చారు.
'బాగా ఉన్నత కుటుంబం నుంచి వచ్చారు.. బడుగు,బలహీనవర్గాల గురించి అవగాహన లేదని కొంత మంది విమర్శిస్తున్నారు. దానికి మీరేం చెబుతారు' అని విద్యార్థి ప్రశ్నించగా..‘మా తాత ఏపీకి పూర్వపు సీఎం, మా నాన్న ఏపీకి సుదీర్ఘకాలం సీఎం. సమాజంలో మార్పును ఏమైతే మనం ఆశిస్తున్నామో దాన్ని ఒక యువకుడిగా తీసుకురావాలని నేను సంకల్పించాను. నన్ను వైసీపీ వాళ్లు విపరీతంగా ట్రోల్ చేస్తున్నారు. అయినా నేను పట్టించుకోలేదు. నా లక్ష్యం రాష్ట్రాభివృద్ధి మాత్రమే. మా కుటుంబం భోజన సమయంలో కూడా రాష్ట్ర సమస్యలపై చర్చిస్తాం. నేడు పాదయాత్ర ద్వారా ప్రజల సమస్యల్ని దగ్గరుండి తెలుసుకునే అవకాశాన్ని తీసుకున్నాను. అన్ని సమస్యల్ని తెలసుకుంటున్నాను. పరదాల చాటున దాక్కున్న సీఎం కంటే ఎక్కువ అవగాహన నాకు ఉంది’ అని లోకేష్ సమాధానం ఇచ్చారు.
‘చిత్తూరు జిల్లా యువతకు ఐటీ,ఎలక్ట్రానికి శాఖ మంత్రిగా ఉన్నప్పుడు జోహో, సెలకాన్, ఫాక్స్కాన్, టీసీఎల్ తెచ్చాం. నిరుద్యోగ యువతకు నిరుద్యోగ భృతి కూడా అందించాం. నేను జగన్ రెడ్డి నేను తెచ్చిన కంపెనీల వద్ద సెల్ఫీ తీసుకుని ఛాలెంజ్ విసిరాను. దాన్ని స్వీకరించే పరిస్థితి లేకుండా పోయింది. యువతను పార్టీలో పెద్దఎత్తున ప్రోత్సహించింది టీడీపీ. అందుకే నాకు 100శాతం యువతతో కలిసి నడవడానికి, వాళ్లు నాతో రావడానికి అవకాశం ఉంది’అంటూ లోకేష్ సమాధానం ఇచ్చారు.
|
|