ఓటమి ఎరుగని చరిత్ర నాది... ఓడితే మాత్ర రాజకీయాల నుంచి వైదొలుగుతా: ఎమ్మెల్యే పిన్నెల్లి రామకృష్ణారెడ్డి
Andhra Pradesh Telugu | Suryaa Desk | Published : Sat, Feb 25, 2023, 11:03 PM
వచ్చే ఎన్నికల్లోనూ తనదే విజయమని ఒకవేళ ఓడితే మాత్రం రాజకీయాల నుంచి శాశ్వతంగా వైదొలుగుతానని మాచర్ల వైఎస్సార్ కాంగ్రెస్ పార్టీ పిన్నెల్లి రామకృష్ణారెడ్డి స్పష్టంచేశారు. ఓటమి అంటే తెలియని రాజకీయ చరిత్ర తనదని ఆయన వ్యాఖ్యానించారు. 2024లో కూడా మాచర్లలో విజయం తనదేనని ధీమా వ్యక్తం చేశారు. 2009 నుంచి ఓటమి ఎరగకుండా నాలుగు సార్లు ఎమ్మెల్యేగా గెలిచానని గుర్తు చేశారు. 2024లో తనను ఓడించగలిగితే రాజకీయాల నుంచి శాశ్వతంగా తప్పుకుంటానని ప్రకటించారు.
ఎమ్మెల్యేగా నాలుగు సార్లు తాను పోటీ చేస్తే.. తనపై నలుగురు అభ్యర్థులను టీడీపీ రంగంలోకి దించిందని.. అయితే, అందరూ తన చేతిలో ఓడిపోయారని పిన్నెల్లి రామకృష్ణారెడ్డి ఎద్దేవా చేశారు. మాచర్లలో జరుగుతున్న ప్రతి చిన్న సంఘటనను రాజకీయంగా తనపై రుద్దడానికి ప్రయత్నం చేస్తున్నారని తీవ్ర ఆగ్రహం వ్యక్తం చేశారు. తెలుగుదేశం పార్టీ నేతల బెదిరింపులకు భయపడే వారు ఇక్కడ ఎవరూ లేరని వార్నింగ్‌ ఇచ్చారు.
మాచర్ల నియోజకవర్గంలో జరుగుతున్న అభివృద్ధిపై అంకెలతో సహా చర్చకు సిద్ధమని పిన్నెల్లి రామకృష్ణారెడ్డి సవాల్‌ విసిరారు. నియోజకవర్గంలో పేదలకు సంక్షేమ పథకాల కింద రూ. 930 కోట్లు అందజేసినట్లు ప్రకటించారు. భవిష్యత్తులో మరిన్ని అభివృద్ధి కార్యక్రమాలు చేస్తామని వెల్లడించారు. టీడీపీ నేతలు చిల్లర రాజకీయాలు మానుకోవాలని హితవు పలికారు. ఇక, మిరియాల గ్రామంలో జరిగిన ట్రాక్టర్ దగ్ధం ఘటనకు.. వైసీపీ నేతలకు సంబంధం లేదని ఎమ్మెల్యే పిన్నెల్లి రామకృష్ణారెడ్డి స్పష్టం చేశారు.
|
|