ఆ ఫెక్సీలతో... లోకేష్‌కు సర్‌ప్రైజ్ ఇచ్చిన పవన్ కళ్యాణ్ అభిమానులు

టీడీపీ, జనసేన వచ్చే ఎన్నికల్లో పొత్తు అన్నట్లుగా ఇరు పార్టీల నేతలు సంకేతాలిస్తున్నారు. ఇదిలావుంటే టీడీపీ జాతీయ ప్రధాన కార్యదర్శి నారా లోకేష్ యువగళం పాదయాత్ర ప్రస్తుతం తిరుపతి జిల్లా చంద్రగిరి నియోజకవర్గంలో కొనసాగుతోంది. యువత, మహిళలు, పెద్దవాళ్లు ఇలా అన్ని వర్గాల ప్రజలతో మమేకం అవుతున్నారు లోకేష్. స్థానిక సమస్యలపై ఆరా తీస్తూ ముందుకు సాగుతున్నారు.. చిన్నారులతో మమేం అవుతున్నారు. ఇదిలా ఉంటే నారా లోకేష్ పాదయాత్రలో ఓ ఆసక్తికర సన్నివేశం కనిపించింది. పాదయాత్ర సందర్భంగా స్వాగతం పలుకుతూ ఏర్పాటు చేసిన ఫ్లెక్సీలు ఇప్పుడు ఆసక్తికరంగా మారాయి.

నారా లోకేష్ పాదయాత్రకు జనసేన పార్టీ అధినేత పవన్ కళ్యాణ్ అభిమానులు, కొందరు జనసైనికులు స్వాగతం పలికారు. చంద్రబాబు, లోకేష్‌తో పాటూ పవన్ కళ్యాణ్ ఫోటోలతో ఫ్లెక్సీలను ఏర్పాటు చేశారు. ఇప్పుడు ఈ ఫోటోలు సోషల్ మీడియాలో వైరల్ అవుతున్నాయి. టీడీపీ, జనసేనలు కలిసి పోటీచేయాలని అనే కోరిక కార్యకర్తల్లో కూడా బలంగా ఉందని కొందరు ఈ ఫోటోలపై కామెంట్ చేస్తున్నారు. గ్రౌండ్‌ లెవల్‌లో పరిస్థితులు ఇలా ఉన్నాయని కొందరు అంటున్నారు.

అలాగే లోకేష్ కూడా తన పాదయాత్రలో పవన్ కళ్యాణ్ ప్రస్తావన తరచూ చేస్తున్నారు. ప్రభుత్వం ఎన్ని అడ్డంకులు కల్పించినా సరే తన పాదయాత్ర ఆగదు.. పవన్ కళ్యాణ్ వారాహి బస్సు యాత్ర ఆగదన్నారు. అలాగే రాష్ట్ర భవిష్యత్తును మార్చడానికి ముందుకొచ్చేవారిని తాము ఎప్పుడూ ఆహ్వానిస్తామన్నారు లోకేష్. రాష్ట్రంలోని సమస్యలను అధిగమించేందుకు.. మంచి మనసున్నవాళ్లు రావాలన్నారు. 2014లో తాను పవన్ కళ్యాణ్ ను మొదటిసారిగా కలిశానని.. అలాంటి వాళ్లకు తాము రెడ్ కార్పెట్ సిద్ధంగా ఉంచామన్నారు. రాష్ట్రాభివృద్ధి కోసం, సమాజంలో మార్పు తీసుకురావాలన్నా వాళ్లను ఆహ్వానిస్తున్నాను అన్నారు.

మరోవైపు లోకేష్.. తనపల్లి లో లెవల్ కాజ్ వే ని పరిశీలించారు. 2021 నవంబర్ లో వచ్చిన వరదలకు స్వర్ణ ముఖి నది పై ఉన్న 7 లో లెవల్ కాజ్ వే లు కొట్టుకుపోయాయని స్థానికులు వివరించారు. పైపులు, మట్టి పోసి పైన రోడ్డు పోసారే తప్ప పూర్తిస్థాయిలో పటిష్ఠమైన కాజ్ వే లు నిర్మించలేదని చెప్పారు. మళ్లీ వరద వస్తే నాణ్యత లేకుండా వేసిన పైపులు, మట్టి కొట్టుకు పోవడం తో పాటు ప్రజల ప్రాణాలకు ప్రమాదం ఉందని వివరించారు.

ఈ పాలనలో , అవగాహన లేని సీఎం జగన్ వలనే ఈ దుస్థితి ఏర్పడిందన్నారు లోకేష్. వర్షా కాలంలో కనీస అంచనాలు లేకుండా జగన్ ప్యాలస్ లో పడుకోవడం వలన అన్నమయ్య డ్యాం కొట్టుకు పోయింది. 60 మందిని జగన్ పొట్టన పెట్టుకున్నారని విమర్శించారు. నీటి నిర్వహణ లో జగన్ ప్రభుత్వం నిర్లక్ష్యంగా వ్యవహరించిందని.. స్వర్ణముఖి నది పై ఉన్న 7 లో లెవల్ కాజ్ వే లు వరదల్లో దెబ్బతిన్నాయన్నారు. తాత్కాలికంగా మట్టి, పైపులు వేసి చేతులు దులుపుకున్నారని ధ్వజమెత్తారు.

వీటి వలన ప్రజలకు ప్రమాదం పొంచి ఉందని.. చిన్న వర్షం వచ్చినా కొట్టుకుపోయే ప్రమాదం ఉందన్నారు. కాజ్ వే లు కొట్టుకుపోయి ఏడాది అవుతున్నా కనీసం ప్రభుత్వం శాశ్వత పరిష్కారానికి నిధులు కేటాయించకపోవడం దారుణం అన్నారు. టీడీపీ అధికారంలోకి వచ్చిన వెంటనే ఈ సమస్యని శాశ్వతంగా పరిష్కరిస్తాం.కాజ్ వే లు నిర్మిస్తామని హామీ ఇచ్చారు.