ఆ కుశల ప్రశ్నే... ఆ గొర్రెల కాపరి ప్రాణాలు తీసింది

మద్యం మత్తులో ఓ వ్యక్తి దాడిచేయగా అమాయకుడు ప్రాణాలు పొగొట్టుకొన్నాడు. చిత్తూరు జిల్లాలో ఈ విషాదం జరిగింది. బాగున్నావా అన్నా అన్నందుకు గొర్రెల కాపరిని కొట్టి చంపడం సంచలనంగా మారింది. సదుం మండలం చల్లావారిపల్లెకి చెందిన రవికుమార్‌ గ్రామ సమీపంలో మేకలు మేపుతున్నాడు. ఈ క్రమంలో తిరుపతిలో నివాసముంటున్న బొమ్మిరెడ్డిగారిపల్లెకు చెందిన శేషాద్రిరెడ్డి.. ఆదివారం చల్లావారిపల్లె సమీపంలోని తన పొలంలో జేసీబీతో పనులు చేయిస్తున్నాడు. ఇంతలో రవికుమార్ అటువైపుగా వెళ్లాడు.

రవికుమార్‌ ‘బాగున్నావా అన్నా..’ అని శేషాద్రిరెడ్డిని పలకరించాడు. అప్పటికే మద్యం మత్తులో ఉన్న శేషాద్రి కర్రతో కొట్టడంతో రవికుమార్‌ అక్కడికక్కడే ప్రాణాలు కోల్పోయాడు. ఈ ఘటన తర్వాత నిందితుడు పరారీలో ఉన్నాడు. ఈ ఘటన సమాచారం అందుకున్న పోలీసులు ఘటన స్థలానికి చేరుకుని హత్యకు కారణాలపై ఆరా తీస్తున్నారు. ఈ ఘటనకు సంబంధించిన పూర్తి వివరాలు దర్యాప్తులో తేలాల్సి ఉంది. రవికుమార్‌కి భార్య హేమలత, కుమారై, కుమారుడు ఉన్నారు.

ఇదిలా ఉంటే.. చిత్తూరు జిల్లాలోనే మరో వ్యక్తిని కొట్టడంతో ప్రాణాలు కోల్పోయాడు. కర్ణాటక రాష్ట్రం చింతామణి తాలుకా జాతర్ల కొత్తపల్లెకు చెందిన శ్రీనివాసులు కూలి పని చేసుకుని జీవనం సాగిస్తున్నాడు. అతడి భార్య చంద్రకళది పుంగనూరు మండలం వనగానిపల్లె. అయితే శ్రీనివాసులుకు శనివారం గాలిసోకిందని మతిస్థిమితం లేకుండా తిరగడాన్నిమామ గట్టయ్య శ్రీనివాసులు తండ్రి రెడ్డెప్పకు చెప్పాడు. అదే రోజు సాయంత్రం ఇరువర్గాలు అతన్ని చౌడేపల్లె మండలం మంచినీళ్లపల్లెలోని గంగమ్మ గుడివద్దకు ఆటోలో తీసుకొచ్చారు.

అతడికి పూజలు చేసి ఆటోలోనే తిరుగు వెళుతుండగా.. శ్రీనివాసుల్ని మార్గ మధ్యలోనే అంకుతోటపల్లె దగ్గర ఆటోలో నుంచి దించివేసి కుటుంబసభ్యులు వెళ్లిపోయారు. అతడు అంకుతోటపల్లెలోకి వెళ్లి రెచ్చిపోయాడు.. తమపైదాడి చేస్తాడేమోనన్న భయంతో.. అతడ్ని అదుపు చేసే ప్రయత్నంలో కట్టెలతో కొట్టడంతో ప్రాణాలు కోల్పోయాడు. ఈ ఘటనకు సంబంధించి పూర్తి వివరాలు తెలియాల్సి ఉంది.