యూపీలో బీజేపీ వర్సెస్ సమాజ్ వాది...ఈ ఘటనపై విమర్శ..ప్రతివిమర్శలు

ఓ ఎమ్మెల్యే హత్య కేసు విష‍యంలో యూపీలోని అధికార బీజేపీ, ప్రత్యర్థి సమాజ్ వాది పార్టీ మధ్య మాటల యుద్దం సాగుతోంది. ఉత్తర్ ప్రదేశ్‌లో బీఎస్పీ ఎమ్మెల్యే హత్య కేసులో ప్రధాన సాక్షిని గతవారం దుండగులు నడిరోడ్డుపై దారుణంగా చంపేశారు. ఈ ఘటన అధికార బీజేపీ, ప్రతిపక్ష సమాజ్‌వాదీ పార్టీల మధ్య రాజకీయంగా చిచ్చు రేపింది. బీఎస్పీ ఎమ్మెల్యే హత్య కేసులో ప్రధాన సాక్షి ఉమేశ్ పాల్‌  ప్రయాగ్ రాజ్‌లో శుక్రవారం నాడు హత్యకు గురయ్యారు. గన్‌మెన్‌లతో కలిసి ఆయన కారులో వెలుతుండగా.. గుర్తుతెలియని వ్యక్తులు వాహనాన్నిఅడ్డగించి నడిరోడ్డులో బాంబులు వేసి తుపాకులతో కాల్పులకు పాల్పడ్డారు. ఈ దాడిలో ఉమేశ్, ఇద్దరు గన్‌మెన్‌లకు తీవ్రగాయాలయ్యాయి. ఘటనా స్థలిలోనే ఉమేశ్ చనిపోగా.. గాయపడిన గన్‌మెన్లు ఐసీయూలో చికిత్స పొందుతున్నారు.

తాజాగా, ప్రయాగ్‌రాజ్ హత్య కేసులో నిందితుడైన సదాఖత్ ఖాన్‌.. సమాజ్‌వాదీ పార్టీ అధినేత అఖిలేశ్ యాదవ్‌తో దిగిన ఓ ఫోటోను బీజేపీ నేతలు ట్విట్టర్‌లో షేర్ చేశారు. ‘‘నేరస్థులకు సమాజ్‌వాదీ పార్టీ ఓ నర్సరీ’’ అంటూ యూపీ డిప్యూటీ సీఎం బ్రిజేష్ పాఠక్ ధ్వజమెత్తారు. తమ ప్రభుత్వం నేరాలను సహించబోదని పేర్కొన్నారు.

‘‘మా ప్రభుత్వం నేరాలను సహించదు. సమాజ్‌వాదీ పార్టీ నేరస్థుల నర్సరీ అని రాష్ట్రం మొత్తానికి తెలుసు.. కానీ ఏ నేరస్థుడినీ విడిచిపెట్టబోమని.. దీనికి మేము కట్టుబడి ఉన్నాం’’ అని ట్వీట్ చేశారు. దీనిపై అఖిలేశ్ యాదవ్ స్పందిస్తూ ఎవరైనా ప్రభుత్వ అధికారితో ఫోటో దిగొచ్చని కౌంటర్ ఇచ్చారు. ‘‘ఎవరితోనైనా ఫొటో దిగవచ్చు. నిన్న సీఎం, నేనూ కలిసి ఫొటో దిగాం.. ఇది సోషల్ మీడియా యుగం, ఎవరైనా వచ్చి ఫొటోలు తీయించుకుంటారు’’ అని మీడియాతో అన్నారు.

ఈ ఫోటోకు కౌంటర్‌గా సమాజ్‌వాదీ పార్టీ అధికార ప్రతినిధి అమీక్ జామీ.. బీజేపీ మాజీ ఎమ్మెల్యే ఉదయ్‌భాన్ కరావారియాతో సాదత్ ఖాన్ ఉన్న ఫోటోను ట్విట్టర్‌లో పోస్ట్ చేశారు. ఇక, ఉమేశ్ పాల్ హత్య కేసులో సదాఖత్ ఖాన్‌ను అనుమానిత నిందితుడిగా ప్రయాగ్‌రాజ్ పోలీసులు అదుపులోకి తీసుకున్నారు. 2005 నాటి బీఎస్పీ ఎమ్మెల్యే రాజ్ పాల్ హత్య కేసులో ఉమేశ్ ప్రత్యక్ష సాక్షి. యూపీలోని అతిపెద్ద నగరాల్లో ఒకటైన ప్రయాగ్‌రాజ్ నడిబొడ్డున్న జరిగిన ఈ ఘటన.. యూపీలో శాంతిభద్రతలపై సందేహాలను లేవనెత్తుతోంది.

ఈ సంఘటన రాష్ట్రంలో శాంతిభద్రతల విషయంలో ఎంతో చేస్తున్నామని గొప్పలు చెప్పుకుంటోన్న ఆదిత్యనాథ్ ప్రభుత్వం డొల్లతనాన్ని బయటపెట్టిందని, మాయావతి పార్టీ బీఎస్పీ.. బీజేపీ మధ్య పెరుగుతున్న సన్నిహిత్యానికి నిదర్శనమని సమాజ్‌వాదీ పార్టీ ఆరోపించింది. ఉమేశ్ హత్య తర్వాత ప్రతిపక్షాలు చేస్తున్న విమర్శలపై అసెంబ్లీలో సీఎం యోగి విరుచుకుపడ్డారు.

‘బాధిత కుటుంబం ఆరోపించినట్టు అతిక్ అహ్మద్.. సమాజ్ వాదీ పార్టీ పెంచి పోషిస్తున్న మాఫియాలో భాగమని, దాని వెన్ను విరిచే దిశగా మాత్రమే మేము పని చేశామన్నది నిజం కాదా?’ అఖిలేశ్‌వైపు వేలు చూపిస్తూ యోగి ఆదిత్యనాథ్ అన్నారు. దీనికి ఎస్పీ అధినేత కౌంటర్ ఇస్తూ.. రామరాజ్యంలో పూర్తిగా పోలీసులు విఫలమయ్యారని ఆరోపించారు.