అమరుడైన జవాన్ తండ్రిని కొట్టి, ఆరెస్టు చేశారు.

గాల్వాన్ ఘర్షణలో అమరుడైన ఓ జవాన్ తండ్రిపై దాడి జరిగింది. అనంతరం ఆయణ్ని పోలీసులు అరెస్టు చేశారు. తమ తండ్రిని పోలీసులు తీవ్రంగా కొట్టి అరెస్టు చేశారని 2020 జూన్‌లో గాల్వాన్ లోయలో జరిగిన ఘర్షణలో చైనా సైనికులతో పోరాడుతూ అమరులైన జై కిషోర్ సింగ్ కుటుంబసభ్యులు ఆరోపించారు. అమరుడైన జవాన్ కోసం స్మారకాన్ని నిర్మించడమే అందుక్కారణం అని వారు తెలిపారు. అయితే, ఆ స్మారకం నిర్మించిన స్థలం ప్రభుత్వ భూమిలో, దాని చుట్టూ ఏర్పాటు చేస్తున్న ప్రహారి గోడ ఓ ప్రైవేట్ వ్యక్తికి చెందిన భూమిలో ఉందని పోలీసులు తెలిపారు. బీహార్‌లోని వైశాలి జిల్లా జందాహాలో ఈ ఘటన చోటు చేసుకుంది.

తమ తండ్రి రాజ్ కపూర్ సింగ్‌ను వైశాలి జిల్లాలోని కజారి బుజుర్గ్ గ్రామంలోని తమ ఇంటి నుంచి పోలీసులు అరెస్టు చేసి తీసికెళ్లారని అమర జవాన్ కిషోర్ సింగ్ కుటుంబసభ్యులు పేర్కొన్నారు. కిషోర్ సింగ్ సోదరుడు కూడా సైనికుడే కావడం గమనార్హం. ఆయన ఇండియన్ ఆర్మీలో పనిచేస్తున్నారు.

‘స్మారకం నిర్మించిన స్థలాన్ని డీఎస్పీ మేడమ్ సందర్శించారు. 15 రోజుల్లో విగ్రహాన్ని తొలగించాలని మాకు చెప్పారు. ఆ తర్వాత పోలీసు స్టేషన్ ఇన్‌చార్జి మా ఇంటికి వచ్చి మా నాన్నను అరెస్టు చేసి, కొట్టారు. నేను కూడా సైనికుడినే’ అని జవాన్ కిషోర్ సింగ్ సోదరుడు చెప్పారు. ఈ స్మారకాన్ని వాస్తవానికి గత ఏడాది ఫిబ్రవరి 24న నిర్మించారు. అమర జవాన్ విగ్రహాన్ని ఆయన ఇంటి ముందు ప్రభుత్వ భూమిలో ఏర్పాటు చేశారు. నాటి ప్రారంభ కార్యక్రమంలో ప్రభుత్వ అధికారులు, పోలీసులు కూడా ఈ కార్యక్రమానికి హాజరయ్యారు. అనంతరం గతేడాది డిసెంబరులో ఈ స్మారకం చుట్టూ గోడ నిర్మించడం మొదలుపెట్టారు.

ఈ స్మారకం పక్కన హరినాథ్ రామ్ అనే వ్యక్తికి 0.78 ఎకరాల భూమి ఉంది. స్మారకం చుట్టూ నిర్మించిన గోడ తన భూమిలో ఉందని ఆయన అభ్యంతరం వ్యక్తం చేశారు. ప్రభుత్వ అనుమతి లేకుండా స్మారకం నిర్మాణాన్ని చేపట్టారని ఆరోపిస్తూ ఫిబ్రవరి 23న ఆయన ఫిర్యాదు చేశారు. పోలీసులు కేసు నమోదు చేశారు.

హరినాథ్ రామ్ భూమిలో, జందాహాలోని ప్రభుత్వ భూమిలో విగ్రహాన్ని ఏర్పాటు చేయడంపై అమర జవాన్ తండ్రి రాజ్ కపూర్ సింగ్‌పై ఎస్సీ, ఎస్టీ చట్టం కింద కేసు నమోదు చేసినట్లు ఎస్‌డీపీవో మహువా తెలిపారు. అక్రమంగా చేపట్టిన ఈ నిర్మానం వల్ల ఓ వ్యక్తి భూమి ఆక్రమణకు గురి అయ్యిందని, భూ యజమాన్య హక్కులు ఉల్లంఘించినట్లైందని ఆయన వివరించారు. రాజ్ కపూర్ సింగ్‌పై IPC సెక్షన్ 188, 323, 504, 506 కింద కేసు నమోదు చేసినట్లు పోలీసులు తెలిపారు.