తల్లి చెంతన నిద్రిస్తున్న పసికందును లాక్కెళ్లి చంపేసిన వీధి కుక్కలు.

కేవలం తెెలంగాణ రాష్ట్రంలోనే కాదు కుక్కల సమస్య దేశవ్యాప్తంగా మారింది. తాజాగా తల్లి చెంతన నిద్రిస్తున్న నెల రోజుల పసికందును లాక్కెళ్లి చంపేశాయి వీధి కుక్కలు. ఈ హృదయ విదారక ఘటన రాజస్థాన్‌లోని సిరోహి జిల్లాలోని ఆస్పత్రిలో సోమవారం (ఫిబ్రవరి 27) రాత్రి చోటు చేసుకుంది. చిన్నారి తండ్రి కొద్ది రోజుల కిందట అస్వస్థతకు గురై TB వార్డులో చికిత్స పొందుతున్నాడు. నెల రోజుల బాలింత అయిన అతడి భార్య.. భర్త బాగోగులు చూసుకుంటూ ఆస్పత్రిలో ఉంది. నెల రోజుల పసికందుతో పాటు మరో ఇద్దరు పిల్లలు ఆమెతో పాటే ఆస్పత్రిలో ఉన్నారు. సోమవారం రాత్రి అలసటకు గురైన ఆమె నిద్రలోకి జారుకున్న సమయంలో ఈ దారుణం  జరిగిందని ఆస్పత్రి వర్గాలు తెలిపాయి.

ఘటనకు సంబంధించిన దృశ్యాలు వార్డులో అమర్చిన సీసీటీవీ కెమెరాల్లో రికార్డయ్యాయి. ఒక దాని వెనుక మరొకటి రెండు కుక్కలు.. టీవీ వార్డులోకి వెళ్లాయి. అనంతరం వాటిలో ఒక కుక్క పసికందును నోట కరచుకొని వస్తున్న దృశ్యాలు కనిపిస్తున్నాయి..‘చిన్నారి తండ్రి టీబీ వ్యాధి చికిత్స కోసం ఆస్పత్రిలో చేరాడు. అతడి భార్య తన పిల్లలతో కలిసి అక్కడే ఉంది. భర్తకు, పిల్లలకు సపర్యలు చేసి, ఆమె నిద్రమత్తులోకి జారుకుంది. ఘటన జరిగిన సమయంలో ఆ వార్డులో ఆస్పత్రి సిబ్బంది కూడా ఎవరూ లేరు’ అని పోలీస్ అధికారి సీతారాం తెలిపారు.

పసికందు మృతదేహాన్ని స్వాధీనం చేసుకొని పోస్టుమార్టం నిమిత్తం తరలించారు. ఘటనపై కేసు నమోదు చేసి విచారణ చేస్తున్నట్లు ఎస్ హెచ్ ఓ తెలిపారు. ఆసుపత్రి యాజమాన్యం కూడా అంతర్గతంగా ఈ ఘటనపై విచారణ ప్రారంభించింది. ఘటన జరిగిన సమయంలో ఆసుపత్రి గార్డు పక్క వార్డులో ఉన్నాడని అధికారులు తెలిపారు. బిడ్డ మృతి, భర్త అనారోగ్యంతో ఆస్పత్రి మంచంపై ఉండటంతో ఆ మహిళ రోదిస్తున్న తీరు అక్కడున్న వారిని కదిలించింది.

పెరుగుతున్న కుక్కల దాడి ఘటనలు.. కారణమిదేకుక్కల పేరు వింటేనే ఇప్పుడు వణుకు పుట్టే పరిస్థితి నెలకొంది. హైదరాబాద్‌లోని అంబర్‌పేటలో 4 ఏళ్ల బాలుడిపై వీధి కుక్కులు దాడి చేసి బలి తీసుకున్న దారుణ ఘటన.. తెలుగు రాష్ట్రాలతో పాటు యావత్ దేశాన్ని కలచివేసింది. తెలుగు రాష్ట్రాల్లో కుక్కల దాడి ఘటనలు క్రమంగా పెరుగుతున్నాయి. వేసవి సమీపిస్తుండటంతో కుక్కల దాడి ఘటనలు పెరుగుతున్నాయి. రాత్రి సమయంలో బైకులపై వెళ్తున్న వారి వెంట పడి బెంబేలెత్తిస్తున్నాయి. ఆహారం, నీరు దొరక్క కుక్కలు పిచ్చిగా ప్రవర్తిస్తాయని, ఒంటరిగా ఉన్న మనుషులపై దాడి చేస్తాయని నిపుణులు చెబుతున్నారు.