ప్రజా ప్రతినిధుల్ని బురిడీ కొట్టిస్తున్న బాలాజీ నాయుడు,,ఎట్టకేలకు అరెస్ట్

సాదాసీద వ్యక్తులనే మోసం చేస్తే అతడో మోసగాడు అంటారు. మరి ఏకంగా ప్రజాప్రతినిధులనే మోసం చేస్తే...అతడో పెద్ద మోసగాడే. బాలాజీ నాయుడు.. తెలుగు రాష్ట్రాల్లో ప్రజా ప్రతినిధులు, రాజకీయ నేతలకు బాగా తెలిసిన పేరు. మనోడి మోసాలు ఓ రేంజ్‌లో ఉంటాయి.. లీడర్లను ఈజీగా నమ్మించి బుట్టలో వేసుకోవడంలో మనోడు మంచి ఎక్స్‌పర్ట్. ఈ మోసాల్లో కూడా మనోడిది ఆల్ టైమ్ రికార్డు. ఇప్పుడీ ప్రస్తావన ఎందుకు అనుకుంటున్నారా.. బాలాజీ మరోసారి రెచ్చిపోయాడు.. నెల్లూరు జిల్లాకు చెందిన ఓ ప్రజాప్రతినిధిని బురిడీ కొట్టించాడు.. పోలీసులకు అడ్డంగా దొరికిపోయాడు.

బాలాజీ నాయుడు తాజాగా నెల్లూరుకు చెందిన ఓ ప్రజాప్రతినిధికి ఫోన్‌ చేసి మోసగించేందుకు ప్రయత్నించాడు. ఆయన ఇచ్చిన ఫిర్యాదుతో బాలాజీనగర్‌ పోలీసులు కేసు నమోదు చేశారు. నగరానికే చెందిన ఓ వ్యక్తిని కూడా రూ. 2.66 లక్షల మేరకు మోసం చేసినట్లు పోలీసుల విచారణలో తేల్చారు. బాలాజీ నాయుడు చెన్నైలో ఉండగా.. అదుపులోకి తీసుకున్నట్లు తెలుస్తోంది.

బాలాజీ నాయుడు గతంలో ప్రభుత్వ ఉద్యోగి.. కాకినాడ జిల్లా కిర్లంపూడి సొంత ఊరు. కాకినాడ జేఎన్‌టీయూలో ఇంజినీరింగ్‌ పూర్తి చేసి.. హైదరాబాద్‌ పవర్‌ ప్రాజెక్టులో ఏఈగా ఉద్యోగం వచ్చింది. ఏసీబీ అధికారులు అవినీతి ఆరోపణలతో కేసు నమోదు చేసి అరెస్టు చేశారు. అతడి ఉద్యోగం పోవడంతో భార్య పిల్లలు, కుటుంబ సభ్యులు దూరంగా పెట్టారు. ఆ తర్వాతే మోసాలు మొదలు పెట్టాడు. ప్రజాప్రతినిధులు, రాజకీయ నేతలకు ఫోన్‌ చేసి సీఎంవో కార్యాలయంలో అధికారినని చెప్పి నమ్మించేవాడు.

ప్రభుత్వం నుంచి కొన్ని పథకాలు మంజూరయ్యాయని.. దీనికి సంబంధించిన నగదు డిపాజిట్‌ చేస్తే నిధులు మంజూరు చేస్తామని చెప్పి బురిడీ కొట్టించేవాడు. ఇతడి మాటలు నమ్మి మోసపోయిన ప్రజాప్రతినిధులు చాలామంది గతంలో కేసులు పెట్టారు. తెలంగాణలో పది, ఏపీలో 24 కేసులు నమోదయ్యాయి. పలుమార్లు జైలుకు వెళ్లి కూడా వచ్చాడు. అయినా సరే మనోడు మాత్రం మారలేదు.. మళ్లీ అవే మోసాలు చేస్తూ పోలీసులకు దొరికిపోతున్నాడు.

బాలాజీ నాయుడు స్కెచ్ మామూలుగా ఉండదు. ప్రజా ప్రతినిధులతో పాటూ వారి పీఏల ఫోన్‌ నెంబర్లు సేకరిస్తాడు. కేంద్ర, రాష్ట్ర ప్రభుత్వాలకు చెందిన పథకాలు, సంస్థల్లో ఉద్యోగాల పేరుతో నమ్మిస్తాడు. తనను ఉన్నతాధికారిగా పరిచయం చేసుకుని ముందు డిపాజిట్లు చెల్లించాలని మాయ మాటలు చెబుతాడు. నమ్మి చాలామంది మోసపోయారు. తాజా మరోసారి ఓ ప్రజా ప్రతినిధిని బురిడీ కొట్టించబోయి దొరికిపోయాడు. ఈసారి ఏపీ సీఎంవో నుంచి ఫోన్ చేస్తున్నట్లు చెప్పి మోసం చేయబోయాడు.. కానీ సీన్ రివర్స్ కావడంతో పోలీసులకు అడ్డంగా దొరికిపోయాడు.