అర్ధరాత్రి రెండు రైళ్ల ఢీ... 32 మంది సజీవ దహనంం

అర్థరాత్రి సమయంలో గ్రీస్‌ ఉల్లిక్కిపడే ఘటన చోటు చేసుకొంది. ఆ దేశంలో మంగళవారం రాత్రి ఘోర రైలు ప్రమాదం సంభవించింది. ఎదురెదురుగా వచ్చిన రెండు రైళ్లు ఢీకొని 32 మంది సజీవదహనం కాగా.. మరో 85 మందికిపైగా గాయపడ్డారు. మంగళవారం రాత్రి ఏథెన్స్‌ నుంచి థెసాలోన్కి నగరం మధ్య నడిచే ఇంటర్ సిటీ ఎక్స్‌ప్రెస్ రైలు తెంపీ సమీపంలో ఎదురుగా వస్తున్న మరో కార్గో రైలును ( బలంగా ఢీకొట్టింది. దీంతో ప్రయాణికుల రైలు బోగీలు పట్టాలు తప్పి.. తొలి మూడు బోగీల్లో మంటలు చెలరేగాయి. ఈ మంటల్లో చిక్కుకున్నవారిలో 32 మంది ప్రాణాలు కోల్పోయారు. ప్రస్తుతం ఆస్పత్రిలో చికిత్స పొందుతున్న క్షతగాత్రుల్లో కొందరి పరిస్థితి విషమగా ఉంది.

ప్రమాదం గురించి సమాచారం అందుకున్న భద్రతా సిబ్బంది, పోలీసులు వెంటనే ఘటనాస్థలికి చేరుకుని సహాయకచర్యలు చేపట్టారు. ప్రమాద ఇంటర్ సిటీ రైలులో దాదాపు 350 మంది ప్రయాణికులున్నారు. వీరిలో 250 మంది ఇప్పటి వరకూ సురక్షితంగా బయటపడ్డారు. ప్రమాద తీవ్రతకు ధ్వంసమైన మూడు ముందు బోగీల్లో 32 మంది సజీవదహనం కాగా.. మరి కొందర్ని సహాయక సిబ్బంది కాపాడి ఆసుపత్రికి తరలించారు. క్షతగాత్రుల్లో కొందరి పరిస్థితి విషమంగా ఉన్నట్లు తెలుస్తోంది.

చుట్టూ చిమ్మ చీకట్లు మంటలు పెద్దఎత్తున చెలరేగడంతో సహాయకచర్యలకు విఘాతం కలుగుతోందని అధికారులు తెలిపారు. మృతుల సంఖ్య మరింత పెరిగే అవకాశముందని సమాచారం. కాగా, ప్రమాదానికి సంబంధించిన దృశ్యాలు సోషల్‌ మీడియాలో వైరల్‌గా మారాయి. రైళ్లు ఢీకొట్టిన తర్వాత ఉలిక్కిపడ్డామని, భూకంపం వచ్చిందేమోనని భయపడ్డామని ప్రమాదం నుంచి బయటపడిన ప్రయాణికుడు ఒకరు తన అనుభవాన్ని తెలిపాడు. సూట్ కేసు సాయంతో రైలు కిటికీ అద్దం పగలుగొట్టుకుని బయటకు వచ్చానని మరో వ్యక్తి తెలిపాడు. బోగిలో పరిస్థితి భయంకరంగా ఉందని, జనం హాహాకారాలు చేస్తున్నారని చెప్పాడు.

ప్రమాదం జరిగిన వెంటనే రెండు బోగీలకు మంటలు అంటుకుని, మరో దానికి వ్యాపించాయి. దట్టమైన పొగలు, విరిగిన కిటికీలు, రోడ్డుపై అడ్డంగా శిధిలాలు.. అందులో చిక్కుకున్న ప్రయాణీకుల కోసం చేతుల్లో టార్చి లైట్లతో వెతుకుతున్న రెస్క్యూ సిబ్బంది సంఘటనా స్థలంలోని దృశ్యాలు సీసీటీవీలో రికార్డయ్యాయి. రెండు రైళ్లు బలంగా ఢీకొట్టడంతో దాని తీవ్రత వల్ల ప్రయాణీకుల తరలింపు చాలా క్లిష్టంగా మారిందని అగ్నిమాపక విభాగం అధికారి ఒకరు చెప్పారు. కార్గో రైలు థెసాల్కోని నుంచి లారిస్సాకు వెళ్తోందని ఆయన తెలిపారు.