వేసవి కాలం ప్రారంభంలోనే,,,సాధారణ సగటు కంటే 11 డిగ్రీల అధికం

ఈ సారి వేసవి ప్రారంభంలోనే మనదేశ వాసులకు చుక్కలు చూపించనున్నది. ఇదిలావుంటే దేశంలో 1877 తర్వాత ఈ ఏడాది ఫిబ్రవరిలోనే గరిష్ట సగటు ఉష్ణోగ్రతలు నమోదైనట్లు భారత వాతావరణ విభాగం (IMD) వెల్లడించింది. దేశవ్యాప్తంగా ఈ ఏడాది సగటు ఉష్ణోగ్రత 29.54 డిగ్రీలుగా నమోదైందని, అందుకు గ్లోబల్‌ వార్మింగ్‌ కారణమని వివరించింది. దక్షిణ భారతం, మహారాష్ట్రలోని కొన్ని ప్రాంతాలు మినహా దేశవ్యాప్తంగా ఈ వేసవిలో ఉష్ణోగ్రతలు పెరిగే అవకాశముందని పేర్కొంది. మిగిలిన ప్రాంతాల్లో సాధారణ, సాధారణం కంటే తక్కువ ఉష్ణోగ్రతలు నమోదవుతాయని అంచనా వేసింది. మధ్యభారతం, దాన్ని ఆనుకొని ఉన్న నైరుతి భాగంలో మార్చి నుంచి మే మధ్యకాలంలో వడగాల్పులు వీచే అవకాశం ఉందని హెచ్చరించింది.

సాధారణంగా కనిష్ఠ ఉష్ణోగ్రతలు సగటున 15.49 డిగ్రీలమేర నమోదుకాగా ఈ ఏడాది 16.82 డిగ్రీలుగా నమోదయ్యాయి. కనిష్ఠ ఉష్ణోగ్రతలు ఇంత ఎక్కువ స్థాయిలో నమోదుకావడం ఐదోసారి. ఈ ఫిబ్రవరిలో వాయవ్య భారత్‌లో 24.86 డిగ్రీలు (సగటు కంటే 3.40 డిగ్రీలు అధికం), మధ్యభారత్‌లో 31.93 (2.05 డిగ్రీలు అధికం), తూర్పు, ఈశాన్య భారత్‌లో 13.99డిగ్రీల (1.67 డిగ్రీలు అధికం)మేర నమోదయ్యాయి.

రాబోయే మార్చి నుంచి మే నెలల మధ్యకాలంలో ఈశాన్యం, తూర్పు, మధ్యభారతంలోని చాలా ప్రాంతాల్లో, నైరుతి భాగంలోని కొన్ని ప్రాంతాల్లో సాధారణంకంటే ఎక్కువ గరిష్ఠ ఉష్ణోగ్రతలు నమోదయ్యే అవకాశం ఉందని ఐఎండీ పేర్కొంది. వరుసగా రెండో సంవత్సరం వడగాల్పులు గోధుమ, శెనగ ఉత్పత్తిపై తీవ్ర ప్రభావం చూపి, ఆహార ద్రవ్యోల్బణాన్ని తగ్గించే ప్రభుత్వ ప్రయత్నాలను క్లిష్టతరం చేస్తుందని నిపుణులు ఆందోళన వ్యక్తం చేస్తున్నారు. అధిక ఉష్ణోగ్రతలు వేసవి కాలంలో సరఫరా కంటే విద్యుత్ వినియోగాన్ని పెంచుతాయి.

మార్చి రబీ పంటల పరిపక్వతకు కీలకమైన నెల. ఈ నేపథ్యంలో దేశంలోని కొన్ని చోట్ల తప్పా మిగతా ప్రాంతంలో సాధారణ గరిష్ట సగటు ఉష్ణోగ్రతలకు మించి నమోదవుతాయన్ని ఐఎండీ అంచనాలు ఆందోళన పెంచుతున్నాయి. ‘గోధుమ పంట ఇప్పటికే అధిక ఉష్ణోగ్రత కారణంగా ఒత్తిడిని చవిచూస్తోంది. మార్చి ఉష్ణోగ్రతలు ఖచ్చితంగా దిగుబడి నష్టానికి దారితీస్తాయి’ అని ముంబయికి చెందిన ఓ ప్రపంచ వాణిజ్య కేంద్రం అధికారి అన్నారు. దేశంలోనే గోధుమ పంట ఏడాదికి ఒకసారి మాత్రమే సాగవుతుంది. అక్టోబరు, నవంబరులో వేసిన పంట మార్చిలో కోతకు వస్తుంది.