అకస్మాత్తుగా భర్త తిరిగి రావడంతో పారిపోయే క్రమంలో బాల్కనీ నుంచి పడ్డ ప్రియుడు
Crime | Suryaa Desk | Published : Thu, Mar 02, 2023, 12:31 AM
భర్త లేని సమయంలో వివాహిత ఇంటికి వెళ్లిన యువకుడు.. అకస్మాత్తుగా ఆమె భర్త రావడంతో, పారిపోయే క్రమంలో మూడో అంతస్తు నుంచి జారిపడ్డాడు. తీవ్రంగా గాయపడి మృతి చెందాడు. ఈ విషాద ఘటన విజయనగరంలోని తోటపాలెంలో సోమవారం (ఫిబ్రవరి 28) మధ్యాహ్నం చోటు చేసుకుంది. పోలీసులు, స్థానికులు తెలిపిన వివరాల ప్రకారం.. విజయనగరం జిల్లాకు చెందిన నాయుడు (25) అనే యువకుడు డిగ్రీ పూర్తి చేసి, ఉద్యోగాన్వేషణలో ఉన్నాడు. ఇంటర్ చదివే సమయంలో తన కాలేజీలో చదివే ఓ అమ్మాయితో ఏర్పడిన పరిచయం కాస్త ప్రేమగా మారింది. అయితే, ఆ అమ్మాయిని ఆమె తల్లిదండ్రులు ఆరేళ్ల కిందట ఓ ప్రొఫెసర్‌కు ఇచ్చి వివాహం చేశారు. ఈ దంపతులకు ఓ పాప కూడా ఉంది. అయినప్పటికీ నాయుడు ఆమెను మర్చిపోలేక, పాత పరిచయాన్ని కొనసాగిస్తున్నాడు.
ఈ క్రమంలో సోమవారం మధ్యాహ్నం ఆమె భర్త ఇంట్లో లేని సమయంలో ఆమె ఇంటికి వెళ్లాడు. వారిద్దరూ మాట్లాడుకుంటుండగా.. ఇంతలో భర్త రావడంతో అతడు ఇంటి వెనకాల బాల్కనీలోకి వెళ్లి, అక్కడ నుంచి కిందకు దిగే ప్రయత్నం చేశాడు. ఈ క్రమంలో పట్టుతప్పి కింద పడిపోయాడు. తీవ్ర గాయాలపాలైన అతడిని ఆసుపత్రికి తరలిస్తుండగా మార్గమధ్యంలో చనిపోయాడు.
స్థానికుల నుంచి సమాచారం అందుకున్న పోలీసులు ఘటనా స్థలానికి వచ్చి పరిశీలించారు. అది ప్రమాదం కాదని, తన కుమారుడి మృతిపై అనుమానం ఉందని నాయుడు తండ్రి ఫిర్యాదు చేశారు. పోలీసులు అనుమానాస్పద మృతిగా కేసు నమోదు చేసి దర్యాప్తు చేస్తున్నారు.
|
|