వాటికవే స్టార్ట్ అయి షోరూంలోకి దూసుకెళ్లాయి

హరర్ సినిమా తరహాలో యూపిలో ఓ ఘటన చోటు చేసుకొంది.  ఓ షోరూమ్ ముందు పార్క్ చేసిన ట్రాక్టర్ దానికదే స్టార్ట్ అయ్యింది. షోరూమ్ అద్దాలను ధ్వంసం చేసి లోపలికి దూసుకెళ్లబోయింది. ఇంతలో షోరూమ్ సిబ్బంది ఒకరు సమయస్ఫూర్తితో బ్రేక్ వేయడంతో నిలిచిపోయింది. డ్రైవర్ గానీ, ఇతర మానవమాత్రుడు ఎవరూ లేకుండానే ట్రాక్టర్ ఇంజిన్ దానికదే స్టార్ట్ కావడం, ముందుకు వెళ్లడం అందరినీ ఆశ్చర్యపరుస్తోంది. ఉత్తర ప్రదేశ్‌లోని బిజ్నూర్‌లో ఈ ఘటన చోటు చేసుకుంది. ఘటనకు సంబంధించిన సీసీటీవీ దృశ్యాలు వైరల్ అవుతున్నాయి. ట్రాక్టర్‌పై భూతం ఉందని కామెంట్లు చేస్తూ.. ట్విటర్ యూజర్లు ఈ వీడియోను షేర్ చేస్తున్నారు.

దానికదే స్టార్ట్ అయిన ట్రాక్టర్.. ముందున్న ఓ బైక్‌ను, సైకిల్‌ను ఢీకొట్టి ధ్వంసం చేసింది. ఆ తర్వాత షోరూమ్ అద్దాలను ఢీకొట్టి ధ్వంసం చేసింది. షూ దుకాణంలోకి ట్రాక్టర్ దూసుకొస్తుండటం చూసి.. క్యాషియన్ భయంతో బయటకి పరుగులు తీశాడు. ట్రాక్టర్‌ను ఆపేందుకు, వాహనానికి సంబంధించిన వారు అక్కడ ఎవరైనా ఉన్నారేమోనని ఆరా తీశాడు. ఈలోగా ఆ ట్రాక్టర్ దుకాణం అద్దాలను పగులగొట్టింది. ఇంతలో దుకాణం లోపలి నుంచి పరుగెత్తుకొచ్చిన మరో ఉద్యోగి.. సమయస్ఫూర్తితో వ్యవహరించి, తన చేతుల్తో బ్రేకులను అదిమిపట్టి వాహనాన్ని నిలిపివేశాడు. మరో వ్యక్తిని ఇంజిన్ ఆపేయాల్సిందిగా పురమాయించాడు. దీంతో ప్రమాదం తప్పింది.

బిజ్నూర్‌లోని కొత్వాలి పోలీస్ స్టేషన్ వద్ద ఈ ఘటన చోటు చేసుకుంది. హోళీ వేడుకను శాంతియుతంగా నిర్వహించే చర్యల్లో భాగంగా అక్కడ ఒక సమావేశాన్ని ఏర్పాటు చేశారు. ఈ సమావేశానికి హాజరయ్యేందుకు వచ్చిన కిషన్ కుమార్ అనే వ్యక్తి తన ట్రాక్టర్‌పై వచ్చాడు. ట్రాక్టర్‌ను అక్కడ పార్క్ చేసి మీటింగ్‌కు వెళ్లిపోయాడు. ఆ తర్వాత ఈ ఘటన చోటు చేసుకుంది.

రూ. 80 వేల విలువ చేసే తన బైక్ ధ్వంసమైందని, వాహనం యజమాని ఆవేదన వ్యక్తం చేశాడు. సైకిల్ యజమాని తనకు నష్టపరిహారం చెల్లించాలని కోరాడు. షూ దుకాణం నిర్వాహకులు కూడా నష్టపరిహారాన్ని కోరుతూ పోలీసులకు ఫిర్యాదు చేశారు. మీటింగ్‌కు ట్రాక్టర్ మీద వచ్చాడు సరే.. మరి బుల్డోజర్ మీద వచ్చుంటే..? ఇంకెంత నష్టం జరిగేదో..!