ఆమె శ్రమ వేతనం వెలకట్టలేనిది.... ఎస్బీఐ సర్వేలో ఆసక్తికర అంశాలు

ఎస్బీఐ ఇటీవల నిర్వహించిన ఓ సర్వేలో ఆసక్తికర అంశాలు వెలుగులోకి వచ్చాయి. ఇదిలావుంటే భార్యగా, పిల్లలకు తల్లిగా, కోడలిగా.. ఒక గృహిణి చేసే సేవలకు వెలకట్టలేం. ఆమె కష్టానికి ఒకవేళ వేతనం చెల్లించాల్సి వస్తే.. అది ఎంత పెద్ద మొత్తం అవుతుందో తెలుసా..? స్టేట్ బ్యాంక్ ఆఫ్ ఇండియా ఇదే అంశంపై దేశవ్యాప్తంగా సర్వే నిర్వహించింది. ఆ సర్వే ఫలితాలు చూస్తే.. మగవాళ్ల కళ్లు బైర్లు కమ్ముతాయంటే అతిశయోక్తి కాదు. కుటుంబం కోసం అహర్నిశలు కష్టపడుతూ.. ఇంటి పనులు చేసే మహిళలందరికీ వారి ఉద్యోగానికి జీతం చెల్లించాల్సి వస్తే.. ఆ మొత్తం 22.7 లక్షల కోట్ల రూపాయలు అవుతాయని ఎస్బీఐ సర్వేలో తేలింది. భారతదేశ జీడీపీలో ఇది 7.5 శాతానికి సమానం.

గృహిణుల శ్రమకు అత్యంత కనిష్టంగా వేతనం చెల్లించినా.. ఇంత పెద్ద మొత్తం అవుతోంది. ఎస్బీఐ  పరిశోధన ప్రకారం.. గ్రామీణ ప్రాంతాల్లో గంటకు రూ. 21, పట్టణ ప్రాంతాల్లో గంటకు రూ. 33 చొప్పున లెక్కగట్టగా, గ్రామీణ మహిళకు నెలకు రూ. 5,000, పట్టణ ప్రాంత మహిళకు నెలకు రూ. 8,000 చెల్లించాల్సి ఉంటుంది. రోజులో 8 గంటలకు గాను నెలవారీగా పొందే వేతనం లెక్క ఇది. స్త్రీలు నిర్వహించే ఇంటి పని.. ఆర్థిక పరిభాషలో ‘చెల్లించని స్వభావం’ కింద ఉంది. అంటే.. ప్రభుత్వ గణాంకాల్లో పేర్కొనని శ్రమ ఇది. ఆర్థిక ఉత్పత్తి రంగానికి వెలుపల ఉంటుంది. ఆర్థిక విధానం పరిధికి కూడా ఇది దూరంగా ఉండే అంశం. అలాంటప్పుడు, మహిళల ఇంటిపనిని ఎందుకు కొలవాల్సి వచ్చింది అనే అనుమానం రావొచ్చు. ఎస్‌బీఐ యూరోప్ నివేదికలో ఈ విషయాన్ని కూడా స్పష్టం చేశారు.

‘లేబర్ మార్కెట్‌లో మహిళల శ్రమను లెక్కించాల్సి వచ్చినప్పుడు, వారి స్థితిని అర్థం చేసుకోవడానికి మహిళలు చేసే జీతం లేని పని స్వభావాన్ని కూడా అర్థం చేసుకోవడం చాలా ముఖ్యం. ఆర్థిక వ్యవస్థలో మహిళల పని భాగస్వామ్య రేటును లెక్కించడంలో దీనికి ఎంతో ప్రాధాన్యం ఉంది. కాబట్టి, మా అధ్యయనం లక్ష్యం భారతదేశంలోని మహిళల జీతంలేని గృహ పని స్థితి పరిమాణాన్ని పరిశీలించడం మాత్రమే’ అని ఎస్‌బీఐ తన నివేదికలో పేర్కొంది.

సర్వేలో పేర్కొన్న ఇతర ముఖ్యాంశాలు:

✦ ఇంటి పనులను చక్కబెట్టడంతో పాటు కొంత మంది మహిళలు.. కుటుంబానికి ఆదాయం సమకూర్చే పనుల్లోనూ తమ సహకారం అందిస్తున్నారు.

✦ గ్రామీణ ప్రాంతాల్లో 5 శాతం మంది, పట్టణ ప్రాంతాల్లో 30 శాతం మంది వేతనాల కోసం అదనపు పనులు చేస్తున్నారు.

✦ గృహిణిగా విధులు నిర్వహిస్తూ అదనంగా ఉద్యోగాలు నిర్వహించే మహిళలు గ్రామీణ ప్రాంతాల్లో కంటే పట్టణ ప్రాంతాల్లో అధికంగా ఉన్నారు.

✦ సగటున ఓ మహిళ తన కుటుంబం కోసం రోజుకు 7.2 గంటలు పనిచేస్తోందని ఈ సర్వే వెల్లడించింది.

✦ ఆర్థిక వ్యవస్థకు చెల్లించని మహిళల ఇంటి పని వేతనం మొత్తం గ్రామీణ ప్రాంతాల్లో రూ. 14.7 లక్షల కోట్లు, పట్టణ ప్రాంతాల్లో రూ. 8 లక్షల కోట్లుగా ఉంది.

✦ ఎలాంటి ఆదాయం లేని మహిళలు గ్రామీణ ప్రాంతాల్లో 27.3 కోట్లు, పట్టణ ప్రాంతాల్లో 9.3 కోట్ల మంది ఉన్నారు.

✦ వర్కింగ్ ఏజ్ మహిళలు గ్రామీణ ప్రాంతాల్లో కంటే పట్టణ ప్రాంతాల్లోనే అధికంగా (సుమారు 3 రెట్లు) ఉన్నారు.

ఎస్‌బీఐ ఈ సర్వే కోసం ‘జాతీయ గణాంక సర్వే 2019 జనవరి-డిసెంబర్‌’కు సంబంధించిన నివేదిక డేటాను ఉపయోగించుకుంది. ఇంటర్నేషనల్ లేబర్ ఆర్గనైజేషన్ విడుదల చేసిన ఇదే విధమైన నివేదిక ప్రకారం.. ప్రపంచవ్యాప్తంగా 64 దేశాలలోని మహిళలు రోజువారీగా ఎలాంటి జీతం లేకుండా 1640 కోట్ల గంటలు పనిచేస్తున్నారు. ఈ శ్రమకు వేతనం చెల్లించాల్సి వస్తే.. ఎంత పెద్ద మొత్తం అవుతుందో ఊహించండి. కానీ, ‘సహనమూర్తి’కి అవేమీ అక్కర్లేదు. తన శ్రమను గుర్తిస్తే చాలు, మనిషిగా ప్రేమిస్తే చాలు..!