చైనా సైన్యం కదలికలపై భారత్ ఆర్మీ గట్టి నిఘా.
national | Suryaa Desk | Published : Sat, Mar 04, 2023, 09:14 PM
గల్వాన్ లోయలో ఘర్షణలు తలెత్తిన పెట్రోలింగ్ పాయింట్ 14 వద్ద ఇప్పుడు పెట్రోలింగ్ చేపట్టడం లేదు. కానీ ఇప్పటికీ ఆ ప్రాంతానికి చేరువలోనే పెద్ద సంఖ్యలో చైనా సైనికులు ఉంటున్నారు. దీంతో చైనా కార్యకలపాలను గమనించడం కోసం ఆ ప్రాంతంపై నిఘా పెట్టడం మాత్రం తప్పనిసరి. తాము గాల్వన్లోకి తిరిగి అడుగుపెట్టామని 2022 జనవరి 1న చైనా సైన్యం ఓ వీడియోను పోస్టు చేసింది. కానీ అది ఘర్షణలు జరిగిన ప్రాంతానికి దాదాపు 1.5 కిలోమీటర్ దూరంలో తీసిన వీడియోగా గుర్తించారు. చైనా సైన్యం కదలికలను గమనించడం కోసం భారత సైన్యం తాజాగా ఎల్ఏసీ సమీపంలో పెట్రోలింగ్ను ప్రారంభించింది.
కార్ప్స్ కమాండర్ స్థాయిలో 17 రౌండ్ల చర్చలు జరిగినప్పటికీ.. ఇరు దేశాల మధ్య చర్చలు ఇప్పటికీ ఓ కొలిక్కి రాలేదు. ఉద్రిక్తతలు తలెత్తిన ప్రాంతాల నుంచి పాక్షికంగా సైన్యాలను వెనక్కి మళ్లించారు. కానీ కొన్ని ప్రాంతాల విషయంలో మాత్రం ఇప్పటికీ చైనా బెట్టు చేస్తూనే ఉంది. ఇరు దేశాలు సరిహద్దులకు చేరువగా సైనిక మోహరింపును పెంచుతూ.. మైండ్ గేమ్స్ ఆడుతున్నాయి. చైనాకు ఏ మాత్రం తగ్గని రీతిలో భారత సైన్యం దూకుడుగా బదులిస్తోంది. గడ్డ కట్టిన పాంగాంగ్ సరస్సు మీద భారత జవాన్లు హాఫ్ మారథాన్ నిర్వహించారు. తాజాగామంచు కొండల్లో క్రికెట్ ఆడి తమకు ఏదీ అసాధ్యం కాదని చాటారు.
|
|