జ్వరం, దగ్గు, జలుబు, ఒళ్లు నొప్పులతో జనం సతమతం,,దేశంలో పెరుగుతున్న జ్వరపీడితుల సంఖ్య

మనదేశంపై ఏకంగా జ్వరం దాడిచేస్తోందా అన్నట్లుగా ప్రస్తుత పరిస్థితి నెలకొంది. దేశంలో జ్వరం, ఇతర ఇన్ఫెక్షన్ల పీడితుల సంఖ్య పెరుగుతున్న నేపథ్యంలో ఇండియన్ మెడికల్ అసోసియేషన్ (ఐఎంసీ) కీలక సూచన చేసింది. యాంటీ బయోటిక్స్‌కు దూరంగా ఉండాలని సూచించింది. ‘దగ్గు, జ్వరం, వికారం, గొంతు నొప్పి, జ్వరం, ఒళ్లు నొప్పులు, డయేరియా లక్షణాలతో బాధపడుతున్న వారి సంఖ్య అకస్మాత్తుగా పెరిగింది. ఈ ఇన్ఫెక్షన్ సాధారణంగా ఐదు నుంచి వారం రోజులపాటు ఉంటుంది. మూడు రోజుల తర్వాత జ్వరం తగ్గుతుంది. కానీ దగ్గు మాత్రం మూడు వారాల వరకు ఉండే అవకాశం ఉంది. నేషనల్ సెంటర్ ఫర్ డిసీజ్ కంట్రోల్ (ఎన్‌సీడీసీ) వివరాల ప్రకారం హెచ్3ఎన్2 ఇన్‌ఫ్లుయెంజా వైరస్ కారణంగా ఈ కేసులు వస్తున్నాయి’ అని ఐంఎసీ తెలిపింది.

‘ఈ లక్షణాలు కనిపించగానే జనాలు అజిత్రోమైసిన్, అమోగ్జిక్లావ్ లాంటి యాంటీ బయోటిక్స్ వాడటం సాధారణంగా మారింది. ఎంత డోసు తీసుకోవాలి.. ఎంత గ్యాప్‌లో తీసుకోవాలనే విషయాన్ని కూడా చాలా మంది పట్టించుకోవడం లేదు. లక్షణాలు తగ్గగానే యాంటీ బయోటిక్స్ వాడకం మానేస్తున్నారు. ఇలా చేయడం వల్ల యాంటి బయోటిక్స్ నిరోధక శక్తి సూక్ష్మజీవులకు లభిస్తుంది. శరీరానికి నిజంగా అవసరమైనప్పుడు యాంటీ బయోటిక్స్ పని చేయకుండా పోతాయి’ అని ఐంఎఏ హెచ్చరించింది. రోగ లక్షణాలను బట్టి చికిత్స అందించాలని డాక్టర్లకు సూచించిన ఐఎంఏ.. యాంటీబయోటిక్స్ ఇవ్వడం మానుకోవాలని హితవు పలికింది.

యాంటీ బయోటిక్స్ దుర్వినియోగం అవుతున్నాయన్న ఇండియన్ మెడికల్ అసోసియేషన్.. ఎక్కువగా యాంటీ బయోటిక్స్ వాడితే రెసిస్టెన్స్ వస్తుందని హెచ్చరించింది. 70 శాతం డయోరియా కేసులు వైరల్ డయోరియాకు సంబంధించినవేనన్న ఐఎంఏ.. ఇలాంటి కేసుల్లో యాంటీ బయోటిక్స్ అవసరం లేకపోయినప్పటికీ డాక్టర్లు ప్రిస్క్రైబ్ చేస్తుండటం పట్ల ఆందోళన వ్యక్తం చేసింది.

యాంటీబయోటిక్స్ ఇచ్చే ముందు ఇన్ఫెక్షన్ బ్యాక్టీరియల్ ఔనో కాదో తెలుసుకోవడం కోసం పరీక్షలు నిర్వహించాలని డాక్టర్లకు ఐంఎఏ సూచించింది. యాంటీ బయోటిక్స్ వాడకం విషయంలో స్వీయ నియంత్రణ పాటించాలని హితవు పలికింది. అమోక్సీసిలిన్, నోర్‌ఫ్లోక్సాసిన్, సిప్రోఫ్లోక్సాసిన్, ఓఫ్లోక్సాసిన్, లెవ్‌ఫ్లోక్సాసిన్ యాంటీ బయోటిక్స్ ఎక్కువగా దుర్వినియోగం అవుతున్నాయని ఇండియన్ మెడికల్ అసోసియేషన్ తెలిపింది. ఇప్పటికే కోవిడ్ సమయంలో అజిత్రోమైసిన్, ఐవర్‌మెస్టిన్ మందుల వాడకం విపరీతమైందన్న ఐంఎఏ.. వాటికి కూడా రిసిస్టెన్స్ వస్తుందని హెచ్చరించింది.

ఇన్‌ఫ్లుయెంజా, ఇతర వైరస్‌ల కారణంగా అక్టోబర్ నుంచి ఫిబ్రవరి వరకు సీజనల్ జలుబు, దగ్గు రావడం సహజమేనని ఐఎంఏ తెలిపింది. 15 ఏళ్లలోపు, 50 ఏళ్లు దాటిన వారిలో ఈ సమస్య ఎక్కువన్న ఐఎంఏ.. వీరిలో శ్వాస సంబంధ సమస్యలు, జ్వరం వస్తాయని తెలిపింది. వాయు కాలుష్యం కారణంగా ఈ సమస్య అధికం అవుతోందని తెలిపింది. ఇన్ఫెక్షన్లు రాకుండా ఉండటం కోసం రద్దీగా ఉండే ప్రదేశాలకు వెళ్లడం మానేయాలని.. చేతులు శుభ్రంగా కడుక్కోవాలని.. వ్యాక్సిన్లు తీసుకోవాలని ఐఎంఏ సూచించింది.