హోలీ కోసం 10 రోజుల సెలవు కోరుతూ లెటర్,,,వైరల్ అవుతోన్న యూపీ పోలీస్ అధికారి లేఖ

నో హాలిడేస్ అనే ఏకైక శాఖ దేశంలో ఏదైనా ఉంది అంటే అది పోలీస్ శాఖ అని చెప్పవచ్చు. ఇదిలావుంటే హోలీ పండగ సందర్భంగా సెలవు కోసం ఓ పోలీస్ అధికారి రాసిన లేఖ వైరల్ అవుతోంది. గత 22ఏళ్లుగా తన భార్య హోలీకి తన పుట్టింటికి వెళ్లనందుకు అలిగిందని.. ఆమెను బుజ్జగించాలంటే 10 రోజులు సెలవు కావాలని పోలీస్ ఇన్స్స్పెక్టర్ లేఖ రాశారు. ఉత్తర్ ప్రదేశ్‌లోని ఫరూఖాబాద్ పోలీస్ అధికారి రాసిన ఈ లేఖ సోషల్ మీడియాలో ప్రస్తుతం హల్‌చల్ చేస్తోంది. ఫరూఖాబాద్‌లోని స్పెషల్ ఇన్వెస్టిగేషన్ సెల్ ఇన్‌ఛార్జిగా పనిచేస్తున్న ఇన్స్పెక్టర్.. హోలీ పండుగకు సెలవు కోసం జిల్లా ఎస్పీ అశోక్ కుమార్ మీనాకు బుధవారం లేఖ రాశారు.

వివాహమైన 22 ఏళ్ల నుంచి తన భార్యను హోలీ రోజున తన పుట్టింటికి తీసుకెళ్లకపోవడంతో తనపై కోపంగా ఉందని తెలిపాడు. ఆమెను శాంతింప చేయడానికి హోలీకి 10 రోజులు సెలవు కావాలని దరఖాస్తు చేసుకున్నారు. ఆ ఇన్‌స్పెర్టర్ రాసిన ఆ లేఖ ప్రస్తుతం వైరల్గా మారింది. ‘హోలీ పండుగ రోజు నా భార్య నాతో కలిసి తన పుట్టింటికి వెళ్లాలనుకుంటోంది.. కచ్చితంగా నాకు సెలవులు అవసరం.. సర్, నా సమస్యను అర్ధం చేసుకుని మార్చి4 నుంచి 10 రోజుల పాటు సెలవు ఇవ్వాలని వినయపూర్వకంగా కోరుతున్నాను’ అని ఇన్స్స్పెక్టర్ సెలవు కోసం లేఖ రాశారు. ఈ లేఖను చదివిన ఎస్పీ అశోక్ కుమార్ మీనా .. పెద్దగా నవ్వినట్లు పోలీసు వర్గాలు తెలిపాయి. అయితే, చివరకు ఇన్స్పెక్టర్ అభ్యర్థనను పరిగణలోకి తీసుకున్న ఉన్నతాధికారి.. అతడు కోరినట్టుగా పది రోజులకు బదులు ఐదు రోజుల సెలవు మంజూరు చేశారు.

అయితే, సెలవుల కోసం ఉద్యోగులు ఇలాంటి విచిత్రమై కారణాలతో దరఖాస్తు చేయడం ఇదే మొదటిసారి కాదు. జనవరిలో ఉత్తర్ ప్రదేశ్లోని మహారాజగంజ్‌లో కొత్తగా పెళ్లయిన ఓ కానిస్టేబుల్.. తన భార్య ఫోన్ ఎత్తడం లేదని పేర్కొంటూ సెలవు కోసం దరఖాస్తు చేయగా ఆ లేఖ తెగ వైరల్ అయింది. సెలవు పెట్టి తనతో పాటు పుట్టింటికి రాలేదని అలిగిన నా భార్య.. ఫోన్ చేసినా ఎత్తడం లేదని, ఆమె దగ్గరకు వెళ్లడానికి సెలవు కావాలని యూపీలోని మౌ జిల్లాకు చెందిన ఇండో-నేపాల్ సరిహద్దు పీఆర్‌బీలో విధులు నిర్వహిస్తున్న కానిస్టేబుల్ విచిత్రంగా లీవ్ లెటర్ రాశారు. అతడి అభ్యర్థనపై కూడా ఉన్నతాధికారులు సానుకూలంగా స్పందించారు. స్థానిక అసిస్టెంట్ సూపరింటెండెంట్ ఆఫ్ పోలీస్.. కానిస్టేబుల్‌కు 5 రోజుల సెలవు మంజూరు చేశారు.