ఎంఓయూలు కాదు ముఖ్యం..గ్రౌండింగ్ వర్క్ ముఖ్య: బొత్స సత్యనారాయణ

తెలుగు దేశం పార్టీ అధినేత చంద్రబాబునాయుడు ఊరికే గొప్పలు చెప్పుకోవడం కాదని, చేసి చూపించాలని రాష్ట్ర విద్యా శాఖ మంత్రి బొత్స సత్యనారాయణ వ్యాఖ్యానించారు. ఎమ్మెల్సీ ఎన్నికలు సమీపిస్తున్న తరుణంలో విజయనగరం సుజాత కన్వెన్షన్ ఫంక్షన్ హాల్‌లో ఆదివారం జరిగిన వైసీపీ నాయకుల సమావేశంలో మంత్రి బొత్స సత్యనారాయణ పాల్గొన్నారు. ఈ సందర్భంగా మంత్రి బొత్స మాట్లాడుతూ.. గతంలో చంద్రబాబు ముఖ్యమంత్రిగా ఉన్నప్పుడు పెట్టుబడులకు సంబంధించిన సమ్మిట్‌లు నిర్వహించారని, అయితే అంతకు ముందు మరెవ్వరూ నిర్వహించనట్లుగా వాటి గురించి ఆర్భాటంగా ప్రచారాలు చేసుకునేవారన్నారు.

కానీ, ముఖ్యమంత్రి వైఎస్ జగన్మోహన్ రెడ్డి మాత్రం విశాఖపట్నంలో ఎంతో క్రమశిక్షణగా గ్లోబల్ ఇన్వెస్టర్స్ సమ్మిట్ నిర్వహించారని మంత్రి బొత్స పేర్కొన్నారు. దేశవ్యాప్తంగా ఉన్న ప్రముఖ పారిశ్రామికవేత్తలు ఈ సమ్మిట్‌గా వచ్చారని, హుందాగా ఎంవోయూలు చేసుకున్నారని తెలిపారు. తన అధ్యక్షతనే కమిటీ వేసి, ఎంవోయూలపై నిరంతరం పర్యవేక్షిస్తామని సీఎం జగన్ చెప్పారన్నారు. కేవలం ఎంవోయూలే ముఖ్యం కాదని, గ్రౌండింగ్ కూడా ముఖ్యమన్నది సీఎం జగన్ ఆలోచన అని చెప్పారు.

ఇక, ఈ నెల 13వ తేదీన గ్రాడ్యుయేట్స్ ఎమ్మెల్సీ ఎన్నికలు జరగబోతున్నాయని మంత్రి బొత్స పేర్కొన్నారు. ఉత్తరాంధ్ర గ్రాడ్యుయేట్స్ ఎన్నికల్లో 2.70 లక్షల మంది ఓటర్లు ఉన్నారని, ఒక్క పట్టణంలోనే 17 వేల మంది ఓటర్లుగా నమోదు చేసుకున్నారని తెలిపారు. ఒక్కొక్క బూత్‌కు 800 మంది ఓటర్లు ఉంటారన్నారు. రాజకీయ పార్టీలకు ఏ ఎన్నికలైనా ప్రతిష్టాత్మకమైనవేనని అన్నారు.

డిప్యూటీ స్పీకర్ కోలగట్ల వీరభద్రస్వామి మాట్లాడుతూ.. గత వారం రోజులుగా వైసీపీ ఎమ్మెల్సీ అభ్యర్థి సీతంరాజు సుధాకర్‌ని గెలిపించుకోవడానికి తామంతా కలిసికట్టుగా పని చేస్తున్నామని పేర్కొన్నారు. నిర్భయంగా తాము ప్రజల వద్దకు వెళ్లి అడగగలుతున్నామని చెప్పారు. ఎన్నికలు వచ్చినా, రాకపోయినా నిరంతరం ప్రజల్లోనే ఉంటున్నామని పేర్కొన్నారు. కేంద్ర మాజీ మంత్రి అశోక్ గజపతిరాజు ఎన్నికల సమయంలోనే కనిపిస్తారని, కానీ వీరభద్రస్వామి ఎప్పుడూ ప్రజలలోనే ఉంటారని పేర్కొన్నారు. ప్రభుత్వ పథకాలను వినియోగించుకొని చాలా మంది విద్యావంతులుగా తయారయ్యారని తెలిపారు.