టీడీపీ నేత హఠాన్మరణం... అధికార లాంచనాలతో అంత:క్రియలు

టీడీపీకి మరో గట్టి దెబ్బ తగిలింది. తెలుగు దేశం పార్టీ నేత, కాకినాడ జిల్లా ప్రత్తిపాడు నియోజకవర్గ ఇన్‌ఛార్జ్‌ వరుపుల రాజా (49) ఆకస్మికంగా మరణించారు. ఆయన హఠాన్మరణంపై ముఖ్యమంత్రి వైఎస్ జగన్మోహన్ రెడ్డి తీవ్ర దిగ్భ్రాంతి వ్యక్తం చేశారు. అధికారిక లాంఛనాలతో రాజా అంత్యక్రియలు నిర్వహించాలని అధికారులను ఆదేశించారు. గుండెపోటుతో శనివారం రాత్రి మరణించిన వరుపుల రాజా భౌతికకాయానికి ఆదివారం వైఎస్సార్ కాంగ్రెస్ పార్టీ నాయకులు నివాళులర్పించారు. వైసీపీ ఎంపీ వంగా గీత, మాజీ మంత్రి కురుసాల కన్నబాబు, ఎమ్మెల్యే ద్వారంపూడి చంద్రశేఖర్‌రెడ్డి, రాష్ట్ర గృహనిర్మాణ సంస్థ ఛైర్మన్‌ దొరబాబు తదితరులు ఆదివారం రాజా మృతికి సంతాపం తెలిపి ఆయన కుటుంబాన్ని ఓదార్చారు.

ఈ సందర్భంగా మాజీ మంత్రి కన్నబాబు మాట్లాడుతూ.. గతంలో వైసీపీలో తమతో పనిచేసిన వరుపుల రాజా.. అందరితోనూ కలుపుగోలుగా ఉండేవారని గుర్తు చేసుకున్నారు. రాజా మరణవార్త తెలియగానే దిగ్భ్రాంతికి గురయ్యామని తెలిపారు. అలాగే, రాజా మృతి పట్ల సీఎం జగన్‌ సంతాపం తెలిపారని.. అధికారిక లాంఛనాలతో అంత్యక్రియలు నిర్వహించాలని అధికారులను ఆదేశించారని కన్నబాబు చెప్పారు.

ఇదిలావుంటే శనివారం ప్రత్తిపాడులో గుండెపోటుతో తీవ్ర అస్వస్థతకు గురైన వరుపుల రాజాను కాకినాడ అపోలో ఆస్పత్రికి తీసుకొచ్చారు. ఈ క్రమంలో ఆయనను ప్రాణాపాయం నుంచి రక్షించేందుకు వైద్యులు సీపీఆర్‌ చేసినా ఫలితం లేకపోయింది. దీంతో రాత్రి 11 గంటల సమయంలో రాజా మృతి చెందినట్లు వైద్యులు ప్రకటించారు. రాజాకు భార్య, కుమారుడు, కుమార్తె ఉన్నారు. దివంగత ముఖ్యమంత్రి వైఎస్‌ రాజశేఖరరెడ్డి హయాంలో ఉమ్మడి తూర్పు గోదావరి జిల్లా డీసీసీబీ చైర్మన్‌గా వరుపుల రాజా పనిచేశారు. వైసీపీలో కూడా పని చేసిన రాజా.. ప్రస్తుతం టీడీపీలో ఉన్నారు.