ప్రచారం పిచ్చి పీక్ స్టేజ్ కు వెళ్లి... ఏకంగా కోట్లాది విలువ చేసే కారును ముక్కలు చేశాడు

నాలుకకో రుచి...బుర్రకో ఆలోచన ఇది నిన్నటి మాట. ప్రచార పిచ్చి ఏమైన చేయిస్తుందన్నది నేటి మాటగా మారింది. ఇటీవల కాలంలో జనాలకు ప్రచారం కోసం పాకులాట ఎక్కువైపోయింది. సోషల్ మీడియా కొందరి జీవితాలనే మార్చేసింది. రాత్రికి రాత్రే పలువురు సెలబ్రిటీలపోతున్నారు. వీడియోలు చేయడం సోషల్ మీడియాలో పెట్టడం, అంతే ఒక్కసారిగా పాపులర్ అయిపోవడం. పలువురి విషయంలో ఇదే జరిగింది. అయితే, కొందరు పిచ్చి పనులతో పాపులర్ అవుతున్నారు. తాజాగా, ఓ యువకుడు ప్రచారం కోసం కోట్లాది రూపాయల ఖరీదైన కారును ముక్కలు చేశాడు. ఇదంతా ఎనర్జీ డ్రింక్‌ ప్రచారం కోసమేకావడం గమనార్హం. ఈ ఘటనకు సంబంధించిన వీడియో ఇప్పుడు సోషల్ మీడియాలో వైరల్‌గా మారింది.

రష్యాకు చెందిన మిఖాయిల్‌ లిట్విన్‌ అనే యూట్యూబర్ తన లిట్‌ ఎనర్జీ డ్రింక్‌కు ప్రచారం కల్పించేందుకు ఈ వింత ప్రయత్నం చేశాడు. ఒక పెద్ద క్యాన్‌లో ఎనర్జీ డ్రింక్‌ను ఉంచి దానిని క్రేన్‌కు వేలాడగట్టి.. కింద తెలుపు రంగు లంబోర్ఘిని కారును ఉంచాడు. సరిగ్గా కారు మీద క్యాన్ పడేలా ఏర్పాటు చేశాడు. క్రేన్ పై నుంచి క్యాన్‌ను వదిలేయడంతో కారు మూడు ముక్కలు కావడం ఆ వీడియోలో కనిపించింది. ఇటీవల ఈ వీడియోను యూట్యూబ్‌, ఇన్‌స్టాగ్రామ్‌లో షేర్‌ చేయగా.. ఇప్పుడది వైరల్‌ అవుతోంది. ఇప్పటికే 80 లక్షలకుపైగా వ్యూస్ వచ్చాయి. షూటింగ్‌కు సంబంధించిన వీడియోను కూడా లిట్విన్ తన ఇన్‌స్టాలో ఉంచాడు.

అయితే అతడి చర్యలపై నెటిజన్ల నుంచి మిశ్రమ స్పందన వస్తోంది. ‘నువ్వు వృథా చేసిన ఆ డబ్బుతో ఎన్నో ప్రాణాలు కాపాడుకోవచ్చు’ అని ఒకరు, ‘ప్రజల దృష్టిని తమ ఉత్పత్తి వైపు మరల్చే విషయంలో ఎలాంటి విలువలను పాటించడం లేదు’ అంటూ మరొకరు విమర్శలు గుప్పించారు. ప్రపంచంలోని ఇతర ప్రాంతాల్లో తమకు సమస్యలు లేవని రష్యా నటించకూడదని ఒకరు. మరిన్ని వ్యూస్ పొందడానికి ఇలాంటి వ్యక్తులు ఇంకా ఏమి చూపిస్తారని మరొకరు వ్యాఖ్యానించారు. ఆ డబ్బును పర్యావరణానికి లేదా స్వచ్ఛంద సంస్థకు ఇవ్వవచ్చు కాదా? అని మరో వ్యక్తి సలహా ఇచ్చారు.

లంబోర్ఘిని ఉరుస్ ప్రపంచంలోని అత్యంత వేగవంతమైన ఎస్‌యూవీలలో ఒకటి. ఈ వాహనాన్ని 2018లో ఈ మోడల్‌‌ను మార్కెట్‌లోకి తీసుకొచ్చింది. రెండు టర్బో ఇంజిన్లు కలిగిన పెట్రోల్‌తో నడిచే వీ8 వాహనం మైలేజీ లీటరుకు 4 కిలోమీటర్లు. ప్రపంచంలోనే అతి ఖరీదైన కార్లలో ఇది కూడా ఒకటి.