ఒకవైపు ల్యాండింగ్...మరోవైపు టేకాఫ్.. గాల్లో ఢీకొన్న హెలికాప్టర్లు

ఓవైపు లాండింగ్ అవుతున్న హెలికాప్టర్..అదే సందర్భంలో సమీపంనుంచి టేకాఫ్ అవుతున్న హెలికాప్టర్ రెండు ఢీ కొన్నాయి. ఈ రెండు హెలికాప్టర్లు గాలిలోనే ఢీకొట్టుకున్నాయి. ఈ ప్రమాదంలో నలుగురు దుర్మరణం పాలవ్వగా, ముగ్గురు చిన్నారులు తీవ్ర గాయాలతో చికిత్స పొందుతున్నారు. ప్రమాదానికి కొన్ని క్షణాల ముందు ఒక హెలికాప్టర్‌లో ప్రయాణిస్తున్న వ్యక్తి చిత్రీకరించిన వీడియో వైరల్ అవుతోంది. వాళ్లు ప్రయాణిస్తున్న హెలికాప్టర్‌‌ను ల్యాండింగ్ చేసేందుకు ప్రయత్నిస్తున్న సమయంలో అప్పుడు టేకాఫ్ అయిన మరో హెలికాప్టర్.. కింద నుంచి ఎగురుతూ వచ్చి ఆ విమానాన్ని ఢీకొట్టడం ఈ వీడియోలో కనిపిస్తోంది. ఆస్ట్రేలియాలోని ప్రముఖ పర్యాటక ప్రాంతం గోల్డ్ కోస్ట్‌లో జనవరి నెలలో ఈ ప్రమాదం జరిగింది. నాడు ప్రమాదానికి గురవ్వడానికి ముందు మహిళా పర్యాటకురాలు చిత్రీకరించిన వీడియో తాజాగా వెలుగులోకి వచ్చింది.

ఈ ప్రమాదంలో పైలట్ యాష్ జెంకిన్సన్, బ్రిటన్‌కు చెందిన దంపతులు రాన్, డయాన్ హ్యూస్, సిడ్నీకి చెందిన వెనెస్సా టాడ్రోస్ మృతి చెందారు. రాన్, డయాన్ దంపతుల ఇద్దరు చిన్నారులు తీవ్రంగా గాయపడి ఆస్పత్రిలో ప్రాణాలతో పోరాడుతున్నారు. వీరితో పాటు మరో ప్రయాణికుడు తీవ్రంగా గాయపడ్డాడు.

హెలికాప్టర్‌లో పర్యటిస్తూ అక్కడి ప్రకృతి అందాలను తమ సెల్‌ఫోన్లో చిత్రీకరిస్తున్న ప్రయాణికులకు తమకు దగ్గరగా ఏదో శబ్దం వినిపించింది. కిటికీ వెలుపల ఏదో చూపిస్తూ పైలట్‌ను అప్రమత్తం చేసేందుకు ప్రయత్నించారు. ఇంతలోనే కింద నుంచి వచ్చిన హెలికాప్టర్ వారు ప్రయాణిస్తున్న హెలికాప్టర్‌ను ఢీకొట్టింది. క్యాబిన్ గ్లాస్ పగిలిపోయిన దృశ్యాలు.

‘నా అంచనాలో ఆ విమానం 1000 అడుగుల కంటే తక్కువ ఎత్తులో ఉంది. అంటే ల్యాండింగ్ జోన్లలో ఒకదాన్ని దాటింది. అయితే, పైలట్‌కు ఇతర విమానాల గురించి తెలియదు. ప్రయాణీకుల్లో ఒకరు ఆ విషయాన్ని అప్రమత్తం చేసేందుకు ప్రయత్నిస్తుండవచ్చు ’ అని సీనియర్ పైలట్, న్యాయవాది పీటర్ కార్టర్ అన్నారు.

ఈ ఘటనలో ఫుటేజీని చిత్రీకరిస్తున్న ఆ ప్రయాణికులు ఉన్న హెలికాప్టర్‌ను పైలట్ సురక్షితంగా ల్యాండింగ్ చేశాడు. కింద నుంచి వచ్చి ఆ హెలికాప్టర్‌ను ఢీకొట్టిన హెలికాప్టర్ మాత్రం రెండు ముక్కలుగా విరిగిపోయి కుప్పకూలిపోయింది. సందర్శకులతో సందడిగా ఉన్న గోల్డ్ కోస్ట్ తీరంలో ఈ ప్రమాదంతో విషాదం నెలకొంది.