వయాగ్రాను వాడి ప్రాణం కోల్పోయాడు... నాగ్ పూర్ లో విషాధ ఘటన

నాగ్‌పూర్‌కి చెందిన 41 ఏళ్ల వ్యక్తి.. తన మహిళా స్నేహితురాలితో ఓ హోటల్‌కు వెళ్లినప్పుడు వయాగ్రా బ్రాండ్ పేరుతో విక్రయించే రెండు సిల్డెనాఫిల్ 50 ఎం.జీ.  టాబ్లెట్లను తీసుకుని ఆ రోజు రాత్రి శృంగారంలో పాల్గొన్నట్టు వైద్యులు వెల్లడించారు. గుర్తుతెలియని ఆ వ్యక్తికి ఎటువంటి అనారోగ్య సమస్యలు లేవని, అయితే, మద్యం సేవించి ఉన్నాడని తెలిపారు. మర్నాడు ఉదయం అతడు అస్వస్థతకు గురయ్యాడు. వాంతులు చేసుకోవడంతో అతడి వెంట వచ్చిన మహిళ ఆందోళనకు గురై.. ఆస్పత్రికి వెళ్దామని సలహా ఇచ్చింది. అందుకు అతడు అవసరం లేదని.. గతంలోనూ ఒకసారి ఇలాగే జరిగిందని సర్దిచెప్పాడు.

కానీ, క్రమంగా అతడి పరిస్థితి దిగజారడంతో ఆస్పత్రికి తీసుకెళ్లారు. కానీ, దురదృష్టవశాత్తూ అక్కడకు వెళ్లేసరికే అతడు మృతిచెందినట్టు వైద్యులు ధ్రువీకరించారు. మెదడుకు ఆక్సిజన్ సరఫరా తగ్గిపోయి కార్డియోవాస్క్యూలర్ హెమరేజ్‌కు గురైనట్టు అధ్యయనంలో వెల్లడయ్యింది. ‘‘ఎటువంటి అనారోగ్య సమస్యలు, శస్త్రచికిత్స జరిగిన దాఖలు లేని 41 ఏళ్ల వ్యక్తి.. ఒక మహిళతో కలిసి హోటల్ గదిలో ఉన్నాడు.. అతను రాత్రిపూట 2 మాత్రలు సిల్డెనాఫిల్ (ఒక్కొక్కటి 50 మి.గ్రా), ఆల్కహాల్ తీసుకున్నాడు. మరుసటి రోజు ఉదయం అసౌకర్యానికి గురయ్యాడు.. తరువాత అతడ్ని ఆసుపత్రికి తీసుకెళ్లారు.. కానీ, అక్కడకు వెళ్లేసరికే మరణించినట్లు ప్రకటించారు’’ అని అధ్యయనం పేర్కొంది.

పోస్ట్‌మార్టమ్‌ నిర్వహించగా.. అతడి మెదడులో 300 గ్రాముల రక్తం గడ్డకట్టినట్లు వైద్యులు గుర్తించారు. ఆల్కహాల్, వయాగ్రా మిశ్రమం, అలాగే ముందుగా ఉన్న అధిక రక్తపోటు అతని మరణానికి దారితీసిందని నిర్ధారించారు. వైద్య సలహా లేకుండా వయాగ్రా తీసుకోవడం వల్ల కలిగే నష్టాల గురించి అవగాహన కల్పించేందుకు ఈ అరుదైన కేసును ప్రచురించినట్లు అధ్యయన రచయితలు పేర్కొన్నారు. కాగా, యూపీకి చెందిన ఓ కొత్త పెళ్లికొడుకు విపరీతంగా వయాగ్రా తీసుకుని ఇబ్బందుల్లో పడిన ఘటన ఆ మధ్య వైరల్ అయ్యింది.