యువగళం యాత్రకు ఎన్నికల సంఘం బ్రేక్... హైదరాబాద్ కు నారా లోకేశ్

తన పాదయాత్రకు టీడీపీ జాతీయ ప్రధాన కార్యదర్శి నారా లోకేష్‌ విరామం ప్రకటించారు.  ఇదిలావుంటే ఈ పాదయాత్రకు ఎన్నికల సంఘం బ్రేక్ ఇచ్చింది. లోకేష్ రిక్వెస్ట్‌ను ఎన్నికల సంఘం తోసిపుచ్చింది. దీంతో పాదయాత్రకు లోకేష్ బ్రేక్‌ ఇచ్చి హైదరాబాద్‌కు బయల్దేరారు. సోమవారం రాష్ట్రంలో గ్రాడ్యుయేట్స్, టీచర్స్ ఎమ్మెల్సీ ఎన్నికలు జరగనున్న విషయం తెలిసిందే. అన్నమయ్య జిల్లాలో తన పాదయాత్ర కొనసాగుతున్న తరుణంలో.. తాను కంటేవారిపల్లి విడిది కేంద్రంలో ఉండేందుకు మినహాయింపు ఇవ్వాలని కేంద్ర ఎన్నికల సంఘాన్ని లోకేష్ కోరారు.

రాష్ట్రవ్యాప్తంగా పాదయాత్ర చేసేందుకు ముందుగానే నిర్ణయించుకున్నందున స్థానికంగా ఉండేందుకు అనుమతి ఇవ్వాలని ఎన్నికల సంఘాన్ని లోకేష్ విజ్ఞప్తి చేశారు. 2013లో తెలుగు దేశం పార్టీ అధినేత చంద్రబాబునాయుడు వస్తున్నా మీ కోసం పాదయాత్రకు ఇచ్చిన మినహాయింపును ఎన్నికల సంఘం దృష్టికి తీసుకెళ్లారు. తూర్పు గోదావరి జిల్లాలో చంద్రబాబు పాదయాత్రకు అప్పట్లో ఎన్నికల కోడ్ నుంచి మినహాయింపు ఇచ్చారని గుర్తు చేశారు.

అయితే, ఎన్నికల నిబంధనల ప్రకారం ప్రస్తుతం నియోజకవర్గాన్ని వీడాలంటూ లోకేష్‌కు ప్రధాన ఎన్నికల అధికారి కార్యాలయం సమాధానం పంపింది. లోకేష్ పంపిన విజ్ఞప్తిని కేంద్ర ఎన్నికల సంఘం దృష్టికి తీసుకెళ్లినట్లు తెలిపింది. అక్కడి నుంచి వచ్చిన సమాధానాన్ని మళ్లీ కమ్యూనికేట్ చేస్తామని సమాధానం ఇచ్చింది. దీంతో, ఎన్నికల సంఘాన్ని, చట్టాలను గౌరవించి జిల్లాను వీడుతున్నట్లు నారా లోకేష్‌ ప్రకటించారు. అనంతరం కంటేవారిపల్లి నుంచి హైదరాబాద్‌కు లోకేష్ బయల్దేరారు.

ఇక, నారా లోకేష్ చేపనట్టిన యువగళం పాదయాత్ర వివరాల్లోకి వెళ్తే.. ఇప్పటి వరకు 529.1 కిలోమీటర్ల పాదయాత్ర పూర్తి చేశారు. శనివారం 41వ రోజు 9.5 కిలో మీటర్లు నడిచారు. కానీ, ఎమ్మెల్సీ ఎన్నికల కోడ్ కారణంగా యువగళం పాదయాత్రకు బ్రేక్‌ పడింది. దీంతో ఆదివారం, సోమవారం (ఈ నెల 12, 13 తేదీల్లో) పాదయాత్రకు లోకేష్ విరామం ఇచ్చారు. 42వ రోజు పాదయాత్ర 14వ తేదీన కంటేవారిపల్లి నుంచి ప్రారంభం కానుంది.