లంచం అడిగిన అధికారికి... ఎద్దును తీసుకో అన్న అన్నధాత

లంచం అడిగిన అధికారికి తనదైన శైలీలో బుద్దిచెప్పాడో రైతు.  తన స్థలానికి సంబంధించి మున్సిపల్ రికార్డుల్లో మార్పు కోసం ఓ రైతు దరఖాస్తు చేసుకోగా.. పని జరగాలంటే కొత్త మొత్తం చెల్లించాలని అధికారులు డిమాండ్ చేశారు. వారు కొరినట్టుగానే డబ్బులిచ్చినా పని పూర్తికాకుండానే అధికారి బదిలీ అయ్యాడు. దీంతో కొత్తగా వచ్చిన అధికారి కూడా చేతులు తడపనిదే పని జరగదని చెప్పాడు. దీంతో నిస్సాహాయుడైన రైతులో అప్పటి వరకూ ఉన్న సహనం నశించింది. డబ్బులకు బదులు తన ఎద్దును తీసుకొచ్చి ఆఫీసు ముందు కట్టేశాడు. విస్తుగొలిపే ఈ ఘటన కర్ణాటకలో చోటుచేసుకుంది. ముఖ్యమంత్రి బసవరాజ్ బొమ్మై సొంత జిల్లా హవేరిలోనే జరగడం గమనార్హం.

వివరాల్లోకి వెళితే.. సవనూర్‌ మున్సిపాలిటీకి చెందిన ఎల్లప్ప రానోజి అనే రైతు మున్సిపల్‌ రికార్డుల్లో మార్పు కోసం దరఖాస్తు చేసుకున్నారు. పని పూర్తిచేయాలంటే లంచం డిమాండ్ చేశారు అధికారులు. గత్యంతరం లేక ఎల్లప్ప లంచం ఇచ్చినప్పటికీ, అతడి పని చేయకుండానే డబ్బులు తీసుకున్న అధికారులు బదిలీ అయ్యారు. దీంతో వ్యవహారం మొదటికొచ్చింది. కొత్త ఆఫీసర్లు కూడా ఎల్లప్పను రూ.25 వేలు లంచం అడగడంతో అతడికి ఓపికి నశించిపోయింది. ఎల్లప్పకు చిర్రెత్తుకొచ్చి తన పొలం నుంచి ఎద్దును తోలుకుని మున్సిపల్‌ కార్యాలయానికి వెళ్లాడు.

అక్కడ ఓ స్తంభానికి దానిని కట్టేసి.. డబ్బుకు బదులు ఎద్దును తీసుకోవాలని అధికారులకు చెప్పాడు. ఊహించని ఈ పరిణామానికి అధికారులు ఖంగుతిన్నారు. కార్యాలయ ఆవరణలో కలకలం రేగింది. అక్కడ ఉన్నవారు గుమిగూడి చర్చించుకోవడంతో విషయం ఉన్నతాధికారి దృష్టికి చేరింది. ఆయన జోక్యం చేసుకుని ఎల్లప్పకు సంబంధించిన రికార్డుల్లో మార్పు చేస్తామని హామీ ఇచ్చారు. లంచం అడిగిన అధికారులకు షోకాజ్‌ నోటీసులు జారీ చేశారు.

ఎల్లప్ప రానోజీ మీడియాతో మాట్లాడుతూ.. రికార్డుల్లో మార్పులు కోసం గతంలో ఓ అధికారికి లంచం ఇచ్చానని, అతడు పని చేయకుండానే బదిలీపై వెళ్లిపోయాడని చెప్పాడు. అతడి స్థానంలో వచ్చిన కొత్త అధికారి కూడా లంచం అడిగాడు. అంత సొమ్ము తన వద్ద లేకపోవడంతో ఎద్దును తీసుకొచ్చానని తెలిపాడు.