ట్వీట్ చేసిన టీడీపీ అధినేత బాబు,,,ట్రెండింగ్‌లో జస్టిస్ ఫర్ వై.ఎస్.వివేకా

మాజీ మంత్రి వైఎస్ వివేకా హత్యకు నాలుగేళ్లు అయిన సందర్భంగా జస్టిస్ ఫర్ వివేకా అంటూ టీడీపీ అధినేత చంద్రబాబు ట్వీట్ చేశారు. 'వైఎస్ జగన్ అధికారం లోకి వచ్చిన నాలుగేళ్లలో రాష్ట్రంలో ఒక్క పనీ చేయలేక పోయారు.. చివరకు సొంత బాబాయ్ హత్య కేసులో నిజమైన నిందితులను శిక్షించడంతో సహా.. వివేకా హత్య జగనాసుర రక్త చరిత్రే అని పులివెందుల పూల అంగళ్ల సెంటర్ నుంచి రాష్ట్రం లో ప్రతి ఇంటా తెలుసు.. అది ఆ ఇంట జరిగిన కుట్రే. తండ్రి శవం పక్కన ఉండగానే పదవి కోసం సంతకాలు సేకరించిన వ్యక్తి.. బాబాయ్ హత్యతో రాజకీయ లబ్ధి పొందిన వ్యక్తి.. ఆడబిడ్డకు న్యాయం చేస్తాడా?' అంటూ ప్రశ్నించారు.

మరోవైపు వైఎస్ వివేకా 4వ వర్ధంతి సందర్భంగా కడప జిల్లా పులివెందుల్లో వివేకా సమాధి దగ్గర కుమార్తె సునీత కుటుంబం నివాళులర్పించారు. కేసు విచారణ దశలో తాను మాట్లాడబోనన్నారు సునీత. ఇన్వెస్టిగేషన్ ఏజెన్సీలను ప్రభావితం చేయకూడదని.. పోలీసుల మీద ఒత్తిడి పెట్టకుండా వాళ్ల పని వాళ్లని చేయనీయాలన్నారు. పిల్లలు తప్పు చేస్తే ఖండిస్తాం.. అలాగే పెద్దలు తప్పు చేసినా వదిలిపెట్టకూడదన్నారు. వైఎస్ వివేకా హత్య కేసులో ఎంతటి వారైనా సరే బయటకు రావాలన్నారు.

2019 మార్చి 15న మాజీమంత్రి వైఎస్‌ వివేకానందరెడ్డిని కడప జిల్లా పులివెందులలోని స్వగృహంలోనే దారుణంగా హత్య చేశారు. ఈ కేసు విచారణ కోసం అప్పట్లో సిట్ ఏర్పాటు చేయగా.. ఆ తర్వాత హైకోర్టు సీబీఐకి అప్పగించింది. ఇటీవల ఈ కేసు విచారణను ఏపీ నుంచి తెలంగాణకు బదిలీ చేసిన సంగతి తెలిసిందే. మరోవైపు వైఎస్ వివేకానందరెడ్డి వర్థంతి రోజు ఓ హ్యాష్ ట్యాగ్ ట్విటర్ ట్రెండింగ్‌లో ఉంది. జస్టిస్ ఫర్ వై.ఎస్.వివేకా అనే హ్యాష్ టాగ్‌తో ట్వీట్స్ చేస్తున్నారు.