సినీ హీరో అయితే, టీడీపీకి గొప్ప ఏమోగాని నాకు కాదు: గోపిరెడ్డి శ్రీనివాసరెడ్డి

ప్రముఖ సినీ నటుడు, హిందూపురం తెలుగు దేశం పార్టీ ఎమ్మెల్యే నందమూరి బాలకృష్ణ వాస్తవాలు తెలుసుకొని మాట్లాడాలి అని నరసరావుపేట వైఎస్సార్ కాంగ్రెస్ పార్టీ ఎమ్మెల్యే గోపిరెడ్డి శ్రీనివాసరెడ్డి తీవ్ర స్థాయిలో ఫైరయ్యారు.  బాలయ్య గతంలోనూ తప్పుడు మాటలు మాట్లాడిన సందర్భాలు చాలా ఉన్నాయని తెలిపారు. ముందు ఏదో ఒకటి మాట్లాడి.. ఆ తర్వాత, తప్పయిందంటూ వెనక్కి తీసుకోవడం బాలకృష్ణకు అలవాటుగా మారిందని ఎద్దేవా చేశారు.

తన సినిమాలోని పాట వేశారని ఓ కార్యకర్తను వైసీపీ ఎమ్మెల్యే ఇబ్బంది పెట్టారని బాలయ్య ఆగ్రహం వ్యక్తం చేసిన విషయం తెలిసిందే. సినిమాను సినిమాలాగే చూడాలని.. రాజకీయ నేత హుందాగా ఉండాలని, నీచానికి దిగజారొద్దని హితవు పలికారు. తాను ఒక్కసారి చిటికేస్తే, మూడో కన్ను తెరిస్తే, ఏమవుతుందో తెలుసుకుని మసలు కోవాలని హెచ్చరించారు. దీంతో బాలయ్య కామెంట్స్‌పై ఎమ్మెల్యే గోపిరెడ్డి ఫైరయ్యారు.

అయినా, తమకు వార్నింగ్ ఇవ్వడానికి బాలకృష్ణ ఎవరని ఎమ్మెల్యే గోపిరెడ్డి ప్రశ్నించారు. తమ నియోజకవర్గ సమస్యలపై మాట్లాడటానికి మీకేం పని అని నిలదీశారు. ఏదైనా మాట్లాడేముందు వాస్తవాలు తెలుసుకోవాలన్నారు. ఆయన సినిమాల్లో హీరో అయితే, టీడీపీకి గొప్ప ఏమోగాని, తనకు కాదని స్పష్టం చేశారు. తమ నియోజకవర్గంలో జరిగిన విషయంపై స్పందించడానికి మీరెవరని ప్రశ్నించారు. ఏదైనా మాట్లాడే ముందు వ్యక్తుల గురించి తెలుసుకోవాలన్నారు.

జరిగిన సంఘటనపై చర్చించేందుకు తాను సిద్ధమని బాలకృష్ణకు ఎమ్మెల్యే గోపిరెడ్డి సవాల్ విసిరారు. ఓ పనికిమాలిని వెధవకు వత్తాసు పలికి బాలకృష్ణ దిగజారొద్దని హితవు పలికారు. అయినా, మనుషులకు మూడో కన్ను ఉండదని.. బాలకృష్ణ కూడా మనిషే అన్న విషయం గుర్తుంచుకోవాలన్నారు. సినిమాల్లో మాదిరిగా రాజకీయాల్లో నటన కుదరదన్న సంగతి బాలకృష్ణ తెలుసుకోవాలని హితవు పలికారు.