నా దూకుడు... ఆపేదెవ్వరూ... కొనసాగుతున్న ఉత్తర కొరియా కవ్వింపు చర్యలు

ఉత్తరకొరియా అధినేత  తీరు ఎలా ఉంటుందో ప్రత్యేకించి చెప్పనక్కర్లేదు. ఈ క్రమంలో  దక్షిణ కొరియా, అమెరికాలను రెచ్చగొట్టేలా మరోసారి ఉత్తర కొరియా బాలిస్టిక్ క్షిపణి ప్రయోగించింది. కొరియా ద్వీపకల్ప ప్రాంతంలో తీవ్ర ఉద్రిక్తతలు కొనసాగుతున్న వేళ ఉత్తర కొరియా గురువారం బాలిస్టిక్ క్షిపణిని ప్రయోగించినట్టు దక్షిణ కొరియా సైన్యం వెల్లడించింది. కొరియా ద్వీపకల్పం తూర్పు తీరప్రాంత జలాల్లోకి గుర్తుతెలియని ఓ ప్రక్షేపాన్ని మండించినట్టు దక్షిణ కొరియా జాయింట్ చీఫ్స్ ఆఫ్ స్టాఫ్ తెలిపారు. అయితే, దీని గురించి పూర్తి వివరాలను తెలియజేయలేదు. రెచ్చగొట్టేలా నిషేధిత ఆయుధ పరీక్షలను నిర్వహిస్తున్న ఉత్తర కొరియా నుంచి సైనిక, అణు బెదిరింపుల పెరుగుతోన్న నేపథ్యంలో అమెరికా, దక్షిణ కొరియా రక్షణ సహకారాన్ని పెంచుకున్నాయి.

ఉత్తర కొరియా క్షిపణి, అణు పరీక్షల సహా పలు అంశాలే అజెండగా టోక్యో వేదికగా దక్షిణ కొరియా, జపాన్‌లు సమావేశం కానున్న కొద్ది గంటల ముందే తాజా పరిణామం చోటుచేసుకోవడం గమనార్హం. అటు, సోమవారం నుంచి ప్రారంభమైన అమెరికా, దక్షిణ కొరియా సంయుక్త సైనిక విన్యాసాలపై గుర్రుగా ఉన్న కిమ్.. నిజమైన యుద్ధానికి సిద్ధంగా ఉండాలని సైన్యాలకు సూచించారు. మంగళవారం కూడా తక్కువ దూరంలోని లక్ష్యాలను చేరుకునే రెండు బాలిస్టిక్ క్షిపణులను ఉత్తర కొరియా ప్రయోగించింది. ఐదేళ్ల తర్వాత ఇలాంటి ప్రయోగించడం ఇదే తొలిసారి. వీటితో పాటు అమెరికా, ద.కొరియా విన్యాసాలకు నిరసగా జలాంతర్గామి నుంచి రెండు వ్యూహాత్మక క్రూయిజ్ క్షిపణులను ఆదివారం ప్రయోగించడం గమనార్హం.

ఫ్రీడమ్ షీల్డ్ పేరుతో సోమవారం ప్రారంభమైన వాషింగ్టన్, సియోల్ సంయుక్త విన్యాసాలు పది రోజుల పాటు కొనసాగనున్నాయి. ఫ్రీడమ్ షీల్డ్ కంటే ముందు ఈ నెలలో రెండు మిత్రదేశాల ప్రత్యేక బలగాలు ‘టేక్ నైఫ్’ అనే పేరుతో సైనిక విన్యాసాలను నిర్వహిస్తున్నట్లు సియోల్ సైన్యం వెల్లడించింది. ఉత్తర కొరియాలోని కీలక స్థావరాలపై ఖచ్చితమైన దాడులను అనుకరించడం. ఫ్రీడమ్ షీల్డ్ విన్యాసాలు ఉత్తర కొరియా దూకుడు కారణంగా మారుతున్న భద్రతా వాతావరణంపై దృష్టి సారించాయని మిత్రరాజ్యాలు తెలిపాయి.