మరణం తరువాత కోట్ల ఆస్తిని క్యాన్సర్ ఆసుపత్రికి విరాళం

మనస్సుల్లోనూ మహోన్నత్తులు పుడుతుంటారు. ఇదిలావుంటే తల్లిదండ్రులు, తోబుట్టువులు కుటుంబంలో అందరూ ఒకరి తర్వాత ఒకరు కేన్సర్‌ మహమ్మారి బారినపడి మరణించారు. దీంతో ఒంటరైన ఓ మహిళ తీవ్ర మనస్థాపానికి గురై.. అనారోగ్యంతో మంచానపడ్డారు. మనోవేదనతో ఆమె గత నెల 17న తనువు చాలించారు. అయితే, చనిపోయే ముందు తన పేరిట ఉన్న రూ.2 కోట్ల ఆస్తులను కేన్సర్ హాస్పిటల్‌కు విరాళంగా ఇస్తూ వీలునామా రాశారు. ఈ ఘటన తమిళనాడులోని అవడి కామరాజ్‌ పట్టణంలో చోటుచేసుకుంది. లేఖలో ఆమె కోరిక మేరకు అధికారులు ఆస్తులను శనివారం స్వాధీనం చేసుకున్నారు.

వివరాల్లోకి వెళ్తే.. అవడి కామరాజ్ నగర్‌లోని మహిజుంబు వీధిలో ఉండే 54 ఏళ్ల సుందరీబాయ్‌ గత ఫిబ్రవరి 17న మరణించారు. ఈ విషయం గురించి ఇరుగుపొరుగు వారు పోలీసులకు సమాచారం ఇచ్చారు. దీంతో అక్కడకు చేరుకున్న పోలీసులు.. ఆమె చనిపోయినట్టు ధ్రువీకరించారు. ఆమె కుటుంబం గురించి పోలీసులు ఆరా తీయగా గతేడాది ఫిబ్రవరి 15న సుందరీబాయ్ అక్క జానకి అనారోగ్యంతో చనిపోయినట్టు తెలిసింది. దీంతో ఆ ఇంట్లో అధికారులు సోదాలు నిర్వహించగా.. వారికి ఓ లేఖ లభ్యమయ్యింది. చనిపోయే ముందు అధికారులను ఉద్దేశించి లేఖ రాసిన సుందరీబాయ్‌.. తన పేరిట ఉన్న దాదాపు రూ.2 కోట్ల ఆస్తులను కాంచీపురం అరిజార్‌ అన్నా కేన్సర్‌ సెంటర్‌కు అందించాలని కోరారు.

‘‘ మా అమ్మానాన్నలు 2000 సంవత్సరంలో గుండెపోటుతో చనిపోయారు.. 2013లో నా సోదరి, 2014లో సోదరుడు కేన్సర్‌ బారినపడి కన్నుమూశారు.. పదేళ్లుగా నేను, నా అక్క జానకి మాత్రమే ఒంటరిగా ఉంటున్నాం.. అక్క కూడా గతేడాది ఫిబ్రవరి 15న అనారోగ్యంతో చనిపోయింది.. అప్పటి నుంచి నేను ఒంటరయ్యాను.. నా అనే వాళ్లు లేకపోవడంతో జీవితం దుర్బరమయ్యింది.. నా ఇల్లు, 90 సవర్ల బంగారం, పోస్టాఫీసు బ్యాంకు ఖాతాలో రూ.30 లక్షలు, ఇండియన్ బ్యాంకులో ఉన్న రూ.31 లక్షలు మొత్తం అన్నా కేన్సర్‌ సెంటర్‌కు అందజేయండి.. అందులోంచి కొంత మొత్తం మా ఎదురింటివాళ్లకు, ఆటోడ్రైవర్‌కు ఇచ్చి నా బాకీ తీర్చండి.. నేను ఇంట్లో పెంచుకొంటున్న పిల్లులు పదికి పైగా ఉంటాయి. దయచేసి వాటిని కాపాడండి’’ అని సుందరీబాయ్‌ లేఖ ముగించారు. ఆమె కోరిక మేరకు ఆయా ఆస్తులను సీజ్‌ చేసిన స్థానిక అధికారులు శనివారం వాటి డాక్యుమెంట్లను జిల్లా డిప్యూటీ కలెక్టర్‌కు అందజేశారు. 90 సవర్ల బంగారానికి సంబంధించి 54 ఐటెమ్స్ బీరువాలో లభించాయి. వాటిని అవడి ట్రెజరీలో భద్రపరిచారు.