మంత్రుల వ్యాఖ్యలు దారుణం
Andhra Pradesh Telugu | Suryaa Desk | Published : Wed, Mar 22, 2023, 12:37 PM
పీఆర్సీ సిఫారసు చేసిన పేస్కేల్ కోసం ఎప్పటినుంచో ఉద్యమం చేస్తున్నామని, గతంలో ప్రభుత్వం ఇచ్చిన కరస్పాండింగ్ పేస్కేల్స్ను ఇప్పుడు మళ్లీ బయటపెట్టి ఉద్యోగులకు తీవ్ర అన్యాయం చేయడం సమంజసం కాదని ఏపీజేఏసీ అమరావతి చైర్మన్ బొప్పరాజు వెంకటేశ్వర్లు అన్నారు. ఉద్యమ కార్యాచరణలో భాగంగా రాష్ట్రంలోని అన్ని ప్రభుత్వ కార్యాలయాల్లో ఉద్యోగులు మంగళవారం ‘వర్క్ టు రూల్’’ పాటించారు. ఇరిగేషన్ ఈఎన్సీ, సర్వే సెటిల్మెంట్ కమిషనరేట్, హెల్త్ వర్సిటీ, సర్వశిక్షా అభియాన్, రాష్ట్ర భూగర్భ, జలవనరుల శాఖ, రాష్ట్ర గృహ నిర్మాణ సంస్థ కార్యాలయాలను బొప్పరాజు, ఏపీజేఏసీ సెక్రటరీ జనరల్ పలిశెట్టి దామోదరరావు సందర్శించారు. ఉద్యమానికి ఉద్యోగులను సమాయత్తం చేశారు. ఈ సందర్భంగా హెల్త్ వర్సిటీ దగ్గర బొప్పరాజు మాట్లాడారు. ఉద్యోగులు దాచుకున్న డబ్బులు కొంత చెల్లిస్తూ బకాయిలన్నీ తీర్చేశామని అసెంబ్లీ సాక్షిగా ఆర్థిక మంత్రి చెప్పడం అన్యాయం కాదా అని ప్రశ్నించారు. ఒకటో తేదీన జీతాలు, పెన్షన్లు ఇవ్వాలని స్పష్టంగా ఉత్తర్వులు ఉన్నా.. ఎప్పుడైతే ఏమిటి? జీతాలు ఇస్తున్నాం...! అంటూ మంత్రులు వ్యాఖ్యానించడం బాధాకరమని బొప్పరాజు వాపోయారు.
|
|