సీఎం జగన్ కి షాక్ ఇచ్చిన చిన్నారి
Andhra Pradesh Telugu | Suryaa Desk | Published : Wed, Mar 22, 2023, 12:45 PM
బొబ్బిలి నియోకవర్గం పరిధిలోని రామభద్రపురం జిల్లా పరిషత్ ఉన్నత పాఠశాలలో మంగళవారం జగనన్న గోరుముద్ద కార్యక్రమంలో భాగంగా విద్యార్థులకు రాగిజావ అందించే కార్యక్రమాన్ని సీఎం జగన్ వీడియో కాన్ఫరెన్స్ ద్వారా ప్రారంభించారు. విద్యాశాఖమంత్రి బొత్స సత్యనారాయణ సొంత జిల్లా అయిన విజయనగరానికి సంబంధించి రామభద్రపురం హైస్కూలులో జిల్లాస్థాయి కార్యక్రమాన్ని నిర్వహించారు. ఈ సందర్భంగా ముఖ్యమంత్రి స్థానిక తొమ్మిదో తరగతి విద్యార్థిని హైమావతితో మాట్లాడారు. ఆ బాలిక.. ఉపాధ్యాయులు, అధికారులు ముందుగా తర్ఫీదు ఇచ్చిన విధంగా విద్యారంగానికి సంబంధించిన అన్ని రకాల అంశాలపై చక్కగా మాట్లాడింది. దీంతో ముఖ్యమంత్రి ముసిముసి నవ్వులతో మురిసిపోయారు. అయితే, ఆ అమ్మాయి తన ప్రసంగాన్ని ముగించే ముందు సైకిళ్లు ఇవ్వాలని కోరింది. దీంతో తోటి విద్యార్థినులంతా ఆమెకు మద్దతు పలుకుతూ ఒక్కసారిగా చప్పట్లు కొట్టారు. ఊహించని పరిణామంతో అధికారులు ఉలిక్కిపడ్డారు. సైకిళ్లు తెలుగుదేశం ప్రభుత్వ హయాంలో ఇచ్చినవి కాగా, ఆ విద్యార్థిని వాటి ప్రస్తావన తేవడంతో ఒకింత ఆందోళనకు గురయ్యారు.
|
|