పుతిన్ యుద్ధ నేరాలకు పాల్పడినట్టు ఐసీసీ వారెంట్,,,తీవ్రంగా స్పందించిన రష్యా

ఉక్రెయిన్ పై యుద్దంతో  రష్యా ప్రపంచంలోని కొన్ని దేశాలకు  శత్రువుగా మారిన విషయం తెలిసిందే. ఈ క్రమంలోనే ఉక్రెయిన్‌పై ఏడాదిగా దండయాత్ర కొనసాగిస్తోన్న రష్యా అధ్యక్షుడు వ్లాదిమిర్ పుతిన్‌పై అమెరికా సహా పాశ్చాత్య దేశాలు తీవ్ర ఆగ్రహంతో రగిలిపోతున్నాయి. ఈ నేపథ్యంలో అంతర్జాతీయ క్రిమినల్‌ కోర్టు వారెంట్‌తో ఏ దేశమైనా తమ అధ్యక్షుడు వ్లాదిమిర్‌ పుతిన్‌ను అరెస్టు చేసే ప్రయత్నం చేస్తే వారిపై యుద్ధం ప్రకటిస్తామని రష్యా హెచ్చరించింది. తమ దేశంలోకి అడుగుపెడితే రష్యా అధ్యక్షుడు పుతిన్‌ను అదుపులోకి తీసుకుంటామని ఇటీవల జర్మనీ మంత్రి సంచలన ప్రకటన చేశారు. ఈ క్రమంలో రష్యా భద్రతా మండలి డిప్యూటీ ఛైర్మన్ దిమిత్రి మెద్వ్‌దెవ్‌ నాటో, ఐరోపా కూటమికి వార్నింగ్ ఇవ్వడం గమనార్హం.

‘పుతిన్‌ను అరెస్టు చేయాలన్న ఊహ ఎప్పటికీ నెరవేరదు.. పోనీ వాస్తవమైందనే ఊహిద్దాం.. ఉదాహరణకు పుతిన్‌ జర్మనీ వెళ్లారు.. అక్కడ అరెస్టు చేశారనుకుందాం. అది రష్యా సమాఖ్యపై యుద్ధం ప్రకటించడమే.. తక్షణమే మా క్షిపణులు, మిగతా ఆయుధాలన్నీ జర్మనీ ఛాన్సలర్‌ కార్యాలయంవైపు దూసుకుపోతాయి’’ అని మెద్వ్‌దెవ్‌ తెలిపారు. కాగా, ఉక్రెయిన్‌ నుంచి వందలాది మంది చిన్నారులను చట్టవిరుద్ధంగా బహిష్కరించి పుతిన్ యుద్ధ నేరానికి పాల్పడ్డారని పేర్కొంటూ గతవారం ఐసీసీ అరెస్ట్ వారెంట్ జారీచేసింది. పుతిన్ వ్యక్తిగతంగా బాధ్యతను వహిస్తారని నమ్మడానికి సహేతుకమైన కారణాలు ఉన్నాయని పేర్కొంది.

ఈ నేపథ్యంలో రష్యా, చైనా, యునైటెడ్ స్టేట్స్‌తో సహా ప్రపంచ దేశాలు గుర్తించని ఐసీసీకి చట్టబద్ధత లేదని మాజీ అధ్యక్షుడు మెద్వ్‌దేవ్ అన్నారు. ఐసీసీ అరెస్ట్ వారెంట్ దారుణమైన పక్షపాత నిర్ణయమని, అయితే రష్యాకు సంబంధించి అర్థరహితమని క్రెమ్లిన్ పేర్కొంది. రష్యా అధికారులు ఉక్రెయిన్‌లో యుద్ధ నేరాలను ఖండించారని, ఉక్రెయిన్ యుద్ధ నేరాలను పశ్చిమ దేశాలు విస్మరించాయని మాస్కో ఆరోపించింది.

అణు ముప్పు తొలగిపోయిందా? అన్న ప్రశ్నకు మెద్వ్‌దేవ్ స్పందిస్తూ.. ‘‘ఎక్కడా తగ్గలేదు. ఉక్రెయిన్‌కు వాళ్లు (పాశ్చాత్య దేశాలు) ఆయుధాలు పంపిస్తున్న కొద్దీ ఈ ముప్పు పెరుగుతూనే ఉంటుంది’’ అని వ్యాఖ్యానించారు. పశ్చిమ దేశాలతో సంబంధాల గతంలో ఎన్నడూ లేనంతగా దిగజారాయని మెద్వ్‌దేవ్ అంగీకరించారు. సోవియట్ పతనం తర్వాత రష్యాకు తామే అధిపతులమని పశ్చిమ దేశాలు భ్రమపడ్డాయి కానీ, పుతిన్ వారి భ్రమలను పటాపంచలు చేశారన్నారు.

ఇదిలావుంటే  ఉక్రెయిన్‌కు రాబోయే 12 నెలల్లో 10 లక్షల రౌండ్ల ఆర్టిలరీ ఆయుధాలను పంపాలన్న ప్రతిపాదనకు యూరోపియన్‌ యూనియన్‌ (ఈయూ) ఆమోదం తెలిపింది. ఈ ప్రణాళికకు ఈయూ కూటమికి చెందిన 27 దేశాల విదేశీ, రక్షణమంత్రులు అంగీకారం తెలిపారు. గురువారం దేశాధినేతలూ ఆమోదముద్ర వేశారు.