అందం కోసం పాటించిన ఇంటి చిట్కాలే ప్రాణం తీశాయా

వైద్య నిపుణుల సహాయం లేకుండా ఇంటి చిట్కాలు  పాటించి ఓ వ్యక్తి తన ప్రాణాలను  పణంగా పెట్టాల్సి వచ్చింది. ఇదిలావుంటే ఏళ్ల తరబడి ఇంటి వైద్యం, డైట్ అనుసరించి నీలం రంగులోకి మారిపోయిన వ్యక్తి పదేళ్ల కిందట వార్లల్లో నిలిచాడు. తాజాగా, మరోసారి అతడి ఫోటోలు, వీడియో సోషల్ మీడియాలో ప్రస్తుతం వైరల్ అవుతున్నాయి. వాస్తవానికి ఆయన 2013లోనే చనిపోయాడు. డైలీ మెయిల్ ప్రకారం.. అమెరికాకు చెందిన పాల్ కరాసన్ డెర్మటైటీస్, కీళ్లనొప్పులు సహా అనేక ఇతర వ్యాధులకు చికిత్సలో భాగంగా సంవత్సరాల తరబడి ఇంట్లో తయారుచేసిన పోషకాహార సప్లిమెంట్‌ను తీసుకున్నాడు. దీని వల్ల అసాధారణమైన దుష్ప్రభావానికి గురయ్యాడు. పోషకాల సప్లిమెంట్‌లోని సిల్వర్ అతడి చర్మాన్ని నీలంగా మార్చింది. దీంతో అతడి నీలం రంగులోకి మారిపోయాడు.

బ్రిటన్‌కు చెందిన న్యూ ఏజ్ మ్యాగజైన్‌లో ఆరోగ్య చిట్కాలను చదివిన తర్వాత ఇంట్లో తయారుచేసిన సిల్వర్ క్లోరైడ్ కొల్లాయిడ్‌ను తాగాడు. డెర్మటైటీస్‌తో బాధపడుతోన్న పాల్.. తన చర్మం పొరలుగా మారకుండా సమ్మేళనం ద్రావణాన్ని తన ముఖంపై రుద్దుకునేవాడు. యాసిడ్ రిఫ్లక్స్, ఆర్థరైటిస్‌ను ఇంటి చిట్కాలు నయం చేశాయని కరాసన్ అప్పట్లో తెలిపారు. ఇదే సమయంలో ఆర్గిరియా (సిల్వర్ క్లోరైడ్ వల్ల చర్మం నీలం లేదా బూడిద రంగులోకి మారిపోవడం)కు గురయ్యాడు. చర్మం రంగు మారుతున్నట్టు స్నేహితుడు గుర్తించేవరకూ కరాసన్ తెలుసుకోలేకపోవడం గమనార్హం.

‘కొంతకాలంగా నన్ను చూడని ఒక స్నేహితుడు వచ్చి ఏమి చేశావు.. చర్మం ఇలా నీల రంగులోకి మారిపోయిందని అడిగాడు’ అని 2008లో ఇన్‌సైడ్ ఎడిషన్‌కు ఇచ్చిన ఇంటర్వ్యూలో పాల్ చెప్పాడు. చర్మం నీలం రంగులోకి మారడం అతడ్ని ‘బ్లూ మెన్’, ‘పాపా స్మర్ఫ్’ అనే మారు పేర్లతో పిలవడం అతడికి నచ్చేదికాదు. సూర్యరశ్మికి తగలకపోవడం వల్లే ఇలా జరిగినట్టు అర్ధమైనప్పటికీ.. మునుపటి రంగులోకి తిరిగి వస్తారా? అని అడిగితే 'నిజంగా తెలియదు' అని చెప్పాడు. అయితే, 2013లో 62 ఏళ్ల వయస్సులో గుండెపోటుకు గురైన కరాసన్.. న్యుమోనియాతో ఆసుపత్రిలో చేరి చికిత్స పొందుతూ చనిపోయాడు.