ఒక్క యాడ్‌తో కెల్లీకి ప్రపంచవ్యాప్తంగా గుర్తింపు,,,సోషల్ మీడియాలో పోస్ట్ పెట్టిన కాాసేపటికే మరణం

పైవాడు  మనకు  ఇచ్చే గౌరవం,  కీర్తి ప్రతిష్టలు  అమాంతంగా చావు రూపంలో తీసుకెళ్తుంటాడు.  ఇదిలావుంటే  యునైటెడ్ ఎయిర్‌లైన్స్ వాణిజ్య ప్రకటనలో కనిపించి ప్రపంచవ్యాప్తంగా గుర్తింపు పొందిన అమెరికాకు చెందిన ట్రాన్స్‌జెండర్‌ ఫ్లైట్ అటెండెంట్ కైలీ స్కాట్ (25) ఇకలేరు. సోషల్ మీడియాలో భావోద్వేగ పోస్టు పెట్టిన కొద్ది సేపటికే ఆమె బలవన్మరణానికి పాల్పడ్డారు. కొలరాడోలోని తన నివాసంలో కైలీ గత సోమవారం చనిపోయారు. అంతకు ముందు స్కాట్‌ తన ఇన్‌స్టాగ్రామ్, ఫేస్‌బుక్ పేజ్‌లో స్నేహితులు, కుటుంబసభ్యులకు హృదయవిదారక నోట్ పెట్టారు. ‘మనం పంచుకున్న మధుర జ్ఞాపకాలను గుర్తు చేసుకోండి’ అంటూ భావోద్వేగానికి గురయ్యారు.

‘నేను నా తుదిశ్వాస తీసుకుంటూ ఈ భూమి మీద నుంచి నిష్క్రమిస్తూ.. ఆవేదనకు గురియ్యే ప్రతి ఒక్కరికీ క్షమాపణ చెబుతున్నాను.. నేను మళ్లీ మీ అందరూ మరోచోట కలుసుకుంటాను’ అని స్కాట్ రాశారు. ‘‘ నేను సరిగా ఉండలేకపోయినందుకు నన్ను క్షమించండి.. నేను ఇష్టపడే వారికి.. నేను ధైర్యంగా ఉండలేకపోయినందుకు క్షమించండి. నా కోసం ఎన్నో ఇచ్చిన వారికి.. నేను చేసిన ప్రయత్నం ఫలించనందుకు క్షమించండి.. దయచేసి నా మరణానికి మీరెవరూ కారణం కాదని అర్థం చేసుకోండి.. నన్ను నేను సరిగా మార్చుకోలేకపోవడమే ఈ ఫలితం’’ అంటూ స్కాట్ కన్నీటిపర్యంతమయ్యారు.

తన కుమార్తె మరణవార్తను ధ్రువీకరించిన స్కాట్ తల్లి ఆండ్రియా సిల్వెస్ట్రో.. ఈ మేరకు ఆమె ఫేస్‌బుక్ పోస్ట్‌ చేశారు. ‘కైలీ స్కాట్.. నువ్వు నా కూతురిగా పుట్టినందుకు చాలా గర్వపడుతున్నా.. నీ నవ్వు చాలా అందంగా ఉండేది.. నీ హృదయం మాలో ఎవరికీ అర్థం కానంత పెద్దది’ అని రాసుకొచ్చారు. కాగా, స్కాట్‌ మరణంపై డెన్వర్ పోలీసులు దర్యాప్తు చేపట్టారు.

మరోవైపు, స్కాట్‌ మరణవార్తపై యునైటెడ్ ఎయిర్‌లైన్స్ విచారం వ్యక్తం చేసింది. ‘‘కైలీ స్కాట్ విషాదకర మరణానికి మేము చాలా చింతిస్తున్నాం.. ఆమె కుటుంబం, స్నేహితులు, సహోద్యోగులకు మా ప్రగాఢ సానుభూతిని తెలియజేస్తున్నాం’’ అని ఓ ప్రకటన విడుదల చేసింది.

2020లో యునైటెడ్ ఎయిర్‌లైన్స్ వైవిధ్య ప్రచారంలో భాగంగా కైలీ స్కాట్ వార్తల్లో నిలిచారు. ట్రాన్స్ డే ఆఫ్ విజిబిలిటీ ప్రాముఖ్యత గురించి మాట్లాడుతూ ‘‘నేను ట్రాన్స్‌గా మారడంలో సిగ్గుపడ్డాను.. నేను కోరుకున్నదంతా కలిసిపోవడమే’’ అంటూ చెప్పారు. ఆ మరుసటి ఏడాది ట్రాన్స్‌జెండర్‌గా పురోగతి గురించి మాట్లాడారు. డిప్రెషన్‌తో పోరాడాలని ఆమె పిలుపునిచ్చారు. ‘సంతోషం, ఆశ కోసం నేను నిజంగా కష్టపడుతున్నాను. 2023 నాకు మంచిగా ఉండాలని నేను కోరుకుంటున్నాను’ స్కాట్ రాసుకొచ్చారు.