వీధి కుక్కల దాటికి భయంతో పరుగులు తీసిన సింహం

సింహానికి ఎదురే లేదు అన్నది అందరీ  మాట.. కానీ  సింహానికి కుక్కలు సైతం ఎదిరించగలవన్నది నేటి మాట. సింహం.. మృగరాజు.. దీనిని చూస్తే అడవిలో జంతువులు పరుగు లంకించుకుంటాయి. అలాంటి కొదమ సింహానికి వీధి కుక్కులు వెన్నులో వణుకుపుట్టించి పరుగులు పెట్టించాయంటే నమ్ముతారా? అవును ఇది నిజం. అడవికి రాజు కావచ్చు.. కానీ, ఊర్లోకి వస్తే నీ పప్పులు ఉడకవని, గ్రామాల్లో తమను మించిన సింహం మరొకటి లేదని నిరూపించాయి. ఆ గ్రామ సింహాలు వెంట పడుతుంటే భయంతో పరిగెడుతున్న ఆ మృగరాజు వీడియో ప్రస్తుతం సోషల్ మీడియాలో వైరల్‌ అవుతోంది. ఈ వీడియోను సురెందర్ మెహ్రా అనే ఐఎఫ్ఎస్ అధికారి తన ట్విట్టర్‌ అకౌంట్‌లో షేర్ చేశారు.

గుజరాత్‌లోని గిర్ సోమ్‌నాథ్ జిల్లాలో ఈ ఘటన జరిగినట్టు తెలుస్తోంది. వీడియో ప్రకారం.. గిర్ నేషనల్ పార్క్ సమీపంలోని ఓ గ్రామంలోకి రాత్రిపూట ఓ సింహం ప్రవేశించింది. అక్కడ వీధిలో ఆవుల మంద కనిపించడంతో వాటిన టార్గెట్ చేసిన సింహం అటువైపు వెళుతుండగా.. సరిగ్గా అప్పుడే వీధి కుక్కలు సీన్‌లోకి ఎంట్రీ ఇచ్చాయి. సింహాం అటుగా వెళ్తుండటం గమనించిన ఓ నాలుగైదు శునకాలు దాని వెంటపడ్డాయి. రిస్క్ చేస్తే మొదటికే మోసమని అనుకుందో ఏమో గానీ గ్రామ సింహాలను చూడగానే అక్కడి నుంచి అది జారుకుంది. వాటి నుంచి తప్పించుకోడానికి పలాయనం చిత్తగించింది.

30 సెకెన్ల నిడివి ఉన్న ఈ వీడియోపై ప్రస్తుతం నెట్టింట్లో పెద్ద చర్చ జరుగుతోంది. ‘స్థాన బలిమి కాని తన బలిమి కాదు..’ అన్నట్టు ఈ సీన్ ఉందని కొందరు కామెంట్ చేశారు. తమ అడ్డాను కాపాడుకునేందుకు జంతువులు ఎంతటి రిస్క్ అయినా చేస్తాయని మరికొందరు... ఐకమత్యమే మహాబలం అని ఇంకొందరు చెప్పుకొచ్చారు. అలాగే, గ్రామంలో మనుషులు కంటే సింహాలే ఎక్కువగా ఉన్నట్టుంది అని ఒకరు.. చిక్కుల్లో పడటం ఎందుకని సింహం మంచి నిర్ణయమే తీసుకుందని మరొకరు పోస్ట్ చేశారు.

గత నెలలో ఓ సింహాల గుంపు గ్రామ వీధుల్లో స్వైర విహారం చేసిన వీడియో కూడా వైరల్ అయ్యింది. ఒకటి కాదు రెండు కాదు... ఏకంగా ఎనిమిది సింహాలు అర్ధరాత్రి వేళ గ్రామంలోకి చొరబడి దర్జాగా సంచరించాయి. గ్రామస్థులెవరూ వీధుల్లో వాటికి తారసపడలేదు. దీంతో అటు సింహరాజాలకు, ఇటు ప్రజలకూ ఏ ఇబ్బందీ లేకుండా పోయింది. వీధుల్లోని సీసీ కెమెరాల్లో రికార్డయిన ఈ దృశ్యాలను గుజరాత్ అటవీ శాఖ మంత్రి సుశాంత నంద సోషల్ మీడియాలో షేర్ చేయడంతో ఇది కాస్తా వైరల్ గా మారింది. దాదాపు లక్ష మంది ఈ వీడియోకు లైకులు కొట్టేశారు.