మిస్ అయిన ఆ జంట మిగిత జీవులుగా కనిపించారు

విశాఖపట్నం స్టీల్ ప్లాంట్ ఉద్యోగి దంపతులు సెల్ఫీ తీసుకుని మిస్సింగ్ అయిన వ్యవహారం విషాదాంతమైంది. తాము ఆత్మహత్య చేసుకుంటున్నామని సెల్ఫీ వీడియో తీసుకుని ఇంట్లో నుంచి వెళ్లిపోయిన దంపతులు చివరికి, విగతజీవులుగా తేలారు. విశాఖపట్నం జిల్లా గాజువాక పరిధిలోని తిరుమనగర్‌కు చెందిన వరప్రసాద్‌ (47), మీరా (41) కలిసి.. ‘‘మేమిద్దరమూ వెళ్లిపోతున్నాం. మా పిల్లల్ని జాగ్రత్తగా చూసుకోండి. వాళ్లను ఎవరూ ఏమీ అనొద్దు. ఒకవేళ ఎవరైనా ఏమన్నా అన్నా... పిల్లలూ మీరు కూడా పట్టించుకోకండి’ అంటూ సెల్ఫీ వీడియో తీసుకున్నారు.

ఈ వీడియోను వరప్రసాద్, మీరా దంపతులు బంధువులకు పంపించి, వారు కనిపించకుండా పోయారు. దీంతో కుమారుడు కృష్ణతేజ ఫిర్యాదు మేరకు పోలీసులు కేసు నమోదు చేశారు. ఈ దంపతుల ఫోన్‌ సిగ్నల్‌ చివరిసారిగా అనకాపల్లి సమీపంలోని కొప్పాక ఏలేరు కాలువ వద్ద చూపించడంతో గజ ఈతగాళ్ల సాయంతో గాలింపు చేపట్టి మృతదేహాలను బయటకు తీశారు.

పోలీసులు తెలిపిన వివరాల మేరకు.. విశాఖపట్నం ఉక్కు కర్మాగారం ఎస్‌ఎంఎస్‌-2 విభాగంలో పని చేస్తున్న చిత్రాడ వరప్రసాద్‌, మీరా దంపతులు విశాఖపట్నం 87వ వార్డు తిరుమలనగర్‌ సమీపంలోని శివాజీనగర్‌లో ఉంటున్నారు. వీరికి కుమారుడు కృష్ణ సాయితేజ, కుమార్తె దివ్యలక్ష్మి ఉన్నారు. కుమార్తెకు గత ఏడాది వివాహమైంది. కుమారుడు బ్యాటరీ దుకాణం నిర్వహిస్తున్నారు.

ఈ క్రమంలో వరప్రసాద్‌, మీరా దంపతులు ఆత్మహత్య చేసుకుంటున్నామని విలపిస్తూ సెల్ఫీ వీడియో తీసుకొని, దాన్ని సోమవారం సాయంత్రం బంధువులకు పంపించారు. ఆ తర్వాత ఫోన్‌ను స్విచ్ ఆఫ్‌ చేసి వెళ్లిపోయారు. దీనిపై కృష్ణ సాయితేజ దువ్వాడ పోలీసులకు ఫిర్యాదు చేశారు. పోలీసులు దంపతుల ఫోన్‌ సిగ్నల్‌ చివరిసారిగా అనకాపల్లి సమీపంలోని కొప్పాక ఏలేరు కాలువ వద్ద చూపించడంతో అక్కడికి వెళ్లి చూశారు. కాలువ గట్టున వారి చెప్పులు, చేతి సంచి, ఇతర వస్తువులు గుర్తించారు.

మంగళవారం ఉదయం గజ ఈతగాళ్లతో కాలువ మొత్తాన్ని గాలించారు. అయితే, రాత్రి వరకూ ఆచూకీ లభించలేదు. తిరిగి బుధవారం ఉదయం కూడా గాలింపు కొనసాగించడంతో మృతదేహాలు లభ్యమయ్యాయి. వరప్రసాద్‌ అధిక వడ్డీలకు అప్పులు చేయడంతో ఇటీవలే రుణదాతల నుంచి ఒత్తిళ్లు పెరిగాయని స్థానికులు చెబుతున్నారు. ఈ క్రమంలోనే వారు ఆత్మహత్యకు పాల్పడ్డట్లు అంటున్నారు.