ప్రాణాలు తీస్తున్న గన్ కల్చర్...తాజాగా ఓ చిన్నారి మరణం
international | Suryaa Desk | Published : Wed, Mar 29, 2023, 07:31 PM
వేరొకరితో గొడవపడి భారతీయ-అమెరికన్‌ చిన్నారి మృతికి కారణమైన వ్యక్తికి అమెరికా కోర్టు 100 ఏళ్ల కఠిన కారాగార శిక్ష విధిస్తూ సంచలన తీర్పు వెలువరించింది. 2021లో లూసియానా రాష్ట్రంలోని ష్రెవెపోర్ట్‌లో జరిగిన ఘటనకు సంబంధించి నిందితుడు జోసెఫ్‌ లీ స్మిత్ (35)ను జిల్లా కోర్టు దోషిగా నిర్దారించినట్టు స్థానిక మీడియా తెలిపింది. దోషికి న్యాయమూర్తి వందేళ్ల జైలు శిక్ష విధించారని పేర్కొంది. కేసు పూర్వాపరాల్లోకి వెళ్తే.. మాంక్‌హౌస్‌ డ్రైవ్‌లోని భారతీయ సంతతికి చెందిన స్నేహల్‌ పటేల్‌, విమల్‌ దంపతులు ఓ హోటల్‌ను నడిపేవారు.
మార్చి 2021లో వారి ఐదేళ్ల కుమార్తె మాయా పటేల్‌ హోటల్‌ గదిలో ఆడుకుంటుండగా తలలోకి ఓ తూటా దూసుకెళ్లింది. వెంటనే కుటుంబ సభ్యులు ఆ చిన్నారిని చికిత్స కోసం ఆస్పత్రికి తరలించగా, మూడు రోజుల పాటు మృత్యువుతో పోరాడి మార్చి 23న చనిపోయింది. హోటల్‌ పార్కింగ్‌ స్థలంలో ఓ వ్యక్తితో గొడవపడిన నిందితుడు లీ స్మిత్.. అతడిపై తుపాకీతో కాల్పులు జరిపాడు. అది గురి తప్పి హోటల్‌ గదిలో ఆడుకుంటోన్న చిన్నారి తలలోకి దూసుకెళ్లినట్టు పోలీసుల దర్యాప్తులో తేలింది.
ఈ ఏడాది జనవరిలోనే స్మిత్‌ను దోషిగా నిర్దారించిన జిల్లా న్యాయస్థానం.. తాజాగా శిక్షను ఖరారు చేసింది. హత్య చేసినందుకు 60 ఏళ్లు, న్యాయ విచారణకు ఆటంకం కలిగించినందుకు 20 ఏళ్లు, హాని తలపెట్టినందుకు 20 ఏళ్లు కలిపి మొత్తం 100 ఏళ్ల జైలు శిక్ష విధిస్తున్నట్టు తెలిపింది. ప్రొబేషన్‌, పెరోల్‌, శిక్ష తగ్గింపు లాంటి సదుపాయాలేవీ లేకుండా శిక్షను అనుభవించాలని కోర్టు ఆదేశించింది.
|
|