ఇంటి నుంచే ఓటు వేసే అవకాశం,,,ఈసీ నిర్ణయాన్ని స్వాగతించిన లక్ష్మీనారాయణ

కేంద్ర ఎన్నికల సంఘం తీసుకొన్న నిర్ణయాన్ని సీబీఐ మాజీ జేడీ లక్ష్మీనారాయణ స్వాగతించారు.  ఇదిలావుంటే ఎన్నికల సంఘం తొలిసారి కర్ణాటక ఎన్నికల్లో ఇంటి నుంచే ఓటు వేసే సదుపాయం కల్పించింది. కర్ణాటక ఎన్నికల షెడ్యూల్ విడుదల చేసిన భారత ప్రధాన ఎన్నికల కమిషనర్ రాజీవ్ కుమార్ ఈ నిర్ణయాన్ని ప్రకటించారు. ఈ నిర్ణయాన్ని సీబీఐ మాజీ జేడీ లక్ష్మీనారాయణ స్వాగతించారు. ట్విట్టర్ వేదికగా స్పందించిన ఆయన.. కర్ణాటక అసెంబ్లీ ఎన్నికలలో 80 ఏళ్లు పైబడిన వారిని ఇంటి నుండి ఓటు వేయడానికి అనుమతించాలని భారత ఎన్నికల సంఘం నిర్ణయించడం మంచి పరిణామం అన్నారు. భవిష్యత్తులో జరిగే ఎన్నికలలో ఓటింగ్ శాతాన్ని పెంచడానికి ఈ సదుపాయాన్ని ఇతర వయసుల వారికి కూడా వర్తింపజేయాలని విన్నవించారు.

ఎన్నికల సంఘం నిర్ణయం ప్రకారం.. కర్ణాటకలో జరిగే అసెంబ్లీ ఎన్నికల్లో.. 80 ఏళ్ల పైబడిన సీనియర్ సిటిజన్లు ఇంటి దగ్గర నుంచే ఓటు హక్కు వినియోగించుకోవచ్చు. అలాగే దివ్యాంగులకు కూడా ఇంటి దగ్గర నుంచే ఓటు వేయొచ్చు. ఎన్నికల సిబ్బంది ఫారం-12డీతో.. దివ్యాంగులు, సీనియర్ సిటిజన్ల ఇళ్లకు వెళ్లి ఓటు వేసే సదుపాయం కల్పిస్తాయని తెలిపింది ఈసీ. అంతేకాదు వీరు ఓటు ఎవరికి వేస్తారో కూడా గోప్యత ఉంటుంది. ఈ ప్రక్రియ మొత్తాన్నీ వీడియో కూడా తీస్తారు. అలాగే వికలాంగుల కోసం ‘సాక్షం’.. అభ్యర్థులు నామినేషన్లు, అఫిడవిట్లు దాఖలు చేసేందుకు ‘సువిధ’ ఆన్‌లైన్‌ పోర్టల్‌ను రూపొందించామన్నారు.

ఇంటి నుంచి ఓటు వేసే విధానం పూర్తి పారదర్శకతతో ఉంటుందని.. అపోహలు అవసరం లేదంటోంది ఎన్నికల సంఘం. ఈసీ నిర్ణయం ప్రకారం.. పోలింగ్‌కు ఐదు రోజుల ముందే 80 ఏళ్లు పైబడిన వారు, దివ్యాంగులు.. ఫారం 12 D కోసం దరఖాస్తు చేసుకోవాలి. ఎన్నికల సిబ్బంది దరఖాస్తు చేసుకున్నవాళ్లు అర్హులా కాదా నిర్ణయిస్తుంది. నిబంధనల ప్రకారం అన్నీ ఓకే అనుకుంటే.. ఎన్నికల సిబ్బంది పోలింగ్ జరిగే రోజు ఫారం 12D తీసుకుని నేరుగా వారి ఇళ్లకు వెళతారు.

పోలింగ్ సిబ్బంది వెంట పార్టీలకు సంబంధించిన ఏజెంట్లు కూడా ఉంటారు. ఓటరుకు బ్యాలెట్ పేపర్ వారికి ఇచ్చి ఓటు వేయిస్తారు. ఓటు హక్కు వినియోగించుకునే సమయంలో ఆ పక్కన ఎవరూ లేకుండా చూస్తారు. ఈ ఓటింగ్ ప్రక్రియ మొత్తాన్ని వీడియో కూడా తీయనున్నారు. ఓటు ఎవరికి వేశారన్నది పూర్తిగా గోప్యత ఉంటుంది. కర్ణాటకలో 80 ఏళ్లకు పైబడిన ఓటర్లు ఏకంగా 12 లక్షల 15 వేల మంది ఉన్నారని చెబుతున్నారు. దివ్యాంగులు 5 లక్షల 55 వేల మంది ఉన్నారట. అంతేకాదు ఎంతమంది ఇలా ఇంటి నుంచి ఓటు వేయడానికి దరఖాస్తు చేసుకున్నారో కూడా పార్టీలకు, అభ్యర్థులకు సమాచారం అందిస్తారు.