విడివిడిగా పోటీచేస్తే పవన్ సీఎం కావడం ఖాయం: హరిరామజోగయ్య

వచ్చే ఎన్నికల్లో అన్ని పార్టీలు విడివిడిగా పోటీచేస్తే జనసేన అధినేత పవన్ కళ్యాణ్ సీఎం కావడం ఖాయమని కాపు సంక్షేమ సేన వ్యవస్థాపకుడు, మాజీ మంత్రి చేగొండి హరిరామజోగయ్య స్పష్టంచేశారు. ఆంధ్రప్రదేశ్ రాష్ట్రంలో జనసేన పార్టీ బలం గతంలో కంటే ఇప్పుడు బాగా పెరిగిందని ఆయన అన్నారు. జనసేన పార్టీ వచ్చే ఎన్నికల్లో రాష్ట్రంలోని 175 స్థానాల్లో ఎలాంటి ఇబ్బంది లేదన్నారు. అధికార వైఎస్సార్ కాంగ్రెస్ పార్టీ, విపక్ష తెలుగు దేశం, జనసేన పార్టీలు విడివిడిగా పోటీ చేస్తే.. పవన్ కళ్యాణ్‌ ముఖ్యమంత్రి కావడం ఖాయమన్నారు. జనసేనాని పవన్ కళ్యాణ్ ముఖ్యమంత్రి కావడమే కాదు.. ఐదేళ్లు ఆయనే సీఎంగా ఉంటారని అభిప్రాయపడ్డారు.

ఇక, పవన్‌ కళ్యాణ్‌ ఒంటరిగా ఎన్నికలకు వెళ్లాలనుకుంటే భారతీయ జనతా పార్టీ (బీజేపీ)ని కలుపుకొని వెళ్లడం మంచిదని హరిరామ జోగయ్య అన్నారు. బీజేపీతో కలిసివెళ్లడం వల్ల జనసేన పార్టీకి లాభమే తప్ప.. నష్టం ఏమీలేదన్నారు. పైగా, ప్రధాని నరేంద్ర మోదీ చరిష్మా.. పవన్ కల్యాణ్‌కు కలిసొస్తుందని అభిప్రాయపడ్డారు.

మరోవైపు, జనసేన- తెలుగు దేశం పార్టీలు కలిసి పోటీ చేస్తే.. వైఎస్సార్ కాంగ్రెస్‌ పార్టీని ఓడించడం మరింత సులువు అవుతుందని హరిరామ జోగయ్య అభిప్రాయపడ్డారు. అలాగే, కాపులంతా అన్ని వర్గాలను కలుపుకొని జనసేనాని పవన్ కళ్యాణ్‌‌కు 100 శాతం సహకరించాలని పిలుపునిచ్చారు.

ఇదిలావుంటే ఆంధ్రప్రదేశ్‌లో ఎన్నికల హీట్‌ అప్పుడే మొదలైపోయింది. అధికార వైసీపీ సింగిల్‌గానే ఎన్నికలకు వెళ్లడం పక్కా! కానీ, మిగతా పార్టీల సంగతి ఇంకా తెలాల్సి ఉంది. ప్రస్తుతం పొత్తులో ఉన్న జనసేన- బీజేపీ.. వచ్చే ఎన్నికల్లోనూ కలిసి పోటీ చేస్తాయా లేదా అన్నది సస్పెన్స్‌గా ఉంది. 2014 పొత్తులు రిపీట్ కావాలని టీడీపీ, జనసేన భావిస్తుండగా.. కొంత మంది బీజేపీ నాయకులు మాత్రం తెలుగు దేశం పార్టీతో కలిసేది లేదని కుండబద్ధలు కొడుతున్నారు. దీంతో ఏయే పార్టీలు కలిసి ఎన్నికలకు వెళ్తాయనే దానిపై ఆసక్తికర చర్చ జరుగుతోంది. ఈ క్రమంలోనే ఇటీవల కాలంలో జనసేనాని పవన్‌ కళ్యాణ్‌కు అన్ని విధాలుగా బాసటగా నిలుస్తూ వస్తున్న హరిరామజోగయ్య.. పొత్తులపై మరోసారి ఆసక్తికర వ్యాఖ్యలు చేశారు.