డేటా చోరీ కేసులో వెలుగులోకి సంచలన నిజాలు,,,ఏకంగా అన్ని రాష్ట్రాల డేటా చోరీ

డేటా చోరీ కేసు దేశంలో ప్రకంపనలు పుట్టిస్తోంది. ఈ కేసులో సంచలన నిజాలు బయటపడుతున్నారు. 66.9 కోట్ల వ్యక్తిగత సమాచారాన్ని లీక్ చేసిన వ్యక్తిని పోలీసులు అరెస్టు చేశారు. 24 రాష్ట్రాల్లో 8 మెట్రోపాలిటిన్ సిటీల్లో డేటా చోరీకి పాల్పడ్డ ఫరీదాబాద్‌కు చెందిన వినయ్‌ భరద్వాజ్‌ను ఎట్టకేలకు సైబరాబాద్ పోలీసులు అరెస్టు చేశారు. ఈ విధమైన మోసాలకు పాల్పడానికి భరద్వాజ్ 6 మెట్రోపాలిటిన్ సిటీల్లో 4.5 లక్షల ఉద్యోగాలను నియమించుకున్నాడు. డీమార్ట్‌, నీట్, పాన్‌కార్డ్‌, క్రెడిట్ కార్డ్‌, డెబిట్ కార్డ్, ఇన్సూరెన్స్, ఇన్‌కం ట్యాక్స్‌, డిఫెన్స్‌కు సంబంధించిన వ్యక్తుల డేటాను చోరీ చేసినట్టు పోలీసులు గుర్తించారు. ఇందులో.. 9, 10, 11, 12 తరగతుల విద్యార్థుల డేటా కూడా చోరీ జరిగినట్టు తేలింది. జీఎస్టీ, ఆర్టీవో, అమెజాన్‌, నెట్‌ఫ్లిక్స్‌, యూట్యూబ్‌, పేటీఎం, ఫోన్‌ పే, బిగ్‌ బాస్కెట్‌, బుక్‌ మై షో, ఇన్‌స్టాగ్రామ్‌, జోమాటో, పాలసీ బజార్ల నుంచి డేటా చోరీ అయినట్టు అధికారులు గుర్తించారు. బైజూస్‌, వేదాంత సంస్థల డేటా కూడా లీక్ అయినట్లుగా సమాచారం. దేశవ్యాప్తంగా డేటా చోరీ చేసి సైబర్ కేటుగాళ్లకు విక్రయించిన నిందితున్ని సైబరాబాద్ పోలీసులు ఎట్టకేలకు అరెస్టు చేశారు.

అయితే.. దేశంలో సంచలనంగా మారిన డేటా చోరీ కేసుపై సిట్ అధికారులు ముమ్మర దర్యాప్తు చేస్తున్నారు. ఈ కేసులో ముందుగా.. 16.8 కోట్ల మంది వ్యక్తుల వ్యక్తిగత సమాచారం చోరీ అయినట్టు మొదట గుర్తించారు. అయితే.. ఈ కేసుపై లోతుగా దర్యాప్తు జరపగా.. మొత్తం 66. 9 కోట్ల మంది వ్యక్తిగత సమాచారం చోరీ అయినట్టు తేలింది. ఈ వ్యవహారంలో ఇప్పటికే.. నితీష్‌ భూషణ్‌ కుమార్‌, ముస్కాన్‌ హసన్‌, సుశీల్‌ తోమర్‌, పూజా కుమారి, అతుల్‌ ప్రతాప్‌ సింగ్‌, సందీప్‌ పాల్‌, జియా ఉర్‌ రెహ్మాన్‌ అనే నిందితులను అరెస్టు చేసిన అధికారులు.. మిగతావారి వివరాలు రాబట్టే ప్రయత్నం చేస్తున్నారు. ఇదిలా ఉంటే.. ఈ కేసులో తాజాగా ఎన్‌ఫోర్స్‌మెంట్ డైరెక్టరేట్ కూడా ఎంట్రీ ఇచ్చింది.

ఈ కేసులో నిందితుల నుంచి డేటాబేస్‌ను అధికారులు స్వాధీనం చేసుకున్నారు. ఈ డేటాబేస్‌లో ఉన్న సమాచారం చూసి.. పోలీసులే అవాక్కయ్యారు. ఈ ముఠా ఎక్కువగా దేశ రాజధాని ఢిల్లీ పరిసర ప్రాంతాల నుంచి కార్యకలాపాలు నిర్వహిస్తోందని గుర్తించారు. చోరీ చేసిన డేటాను 140 కేటగిరీలుగా విభజించి నిందితుడు చెప్పడంపై పోలీసులు సైతం ఆశ్చర్యపోయారు.