దేశంపై మళ్లీ పడగవిప్పిన కరోనా... మూడో వేవ్‌ తర్వాత అత్యధికంగా పాజిటివిటీ రేటు

మనదేశంలో చాపకింద నీరులా విస్తుతంగా కరోనా వ్యాపిస్తోంది. దేశంలో ఆరు నెలల తర్వాత అత్యధికంగా రోజువారీ కరోనా కేసులు శనివారం నమోదయ్యాయి. గతేడాది జనవరిలో మూడో వేవ్ తర్వాత గతవారం ఇన్‌ఫెక్షన్లు వేగంగా పెరగడం ఇదే  మొదటిసారి. గతవారం (మార్చి 26-ఏప్రిల్ 1 మధ్య) దేశంలో 18,450 కేసులు నమోదుకాగా.. ముందు వారం నమోదైన 8,781తో పోల్చితే ఇవి రెండు రెట్లు అధికం కావడం గమనార్హం. ప్రస్తుతం డబ్లింగ్ సమయం ఏడు రోజుల కంటే తక్కువగా ఉంది. చివరిసారిగా మూడో వేవ్‌లో రోజువారీ కేసుల డబ్లింగ్ రేటు ఈ విధంగా ఉంది. అయితే, రోజువారీ కేసులు  చాలా తక్కువగా ఉండటం, కోవిడ్ మరణాల పెరుగుదల నిలకడగా ఉండటం ఊరటనిచ్చే అంశం. గత ఏడు రోజుల్లో మరణాలు 29 నుంచి 36కి చేరాయి.

గతవారం ఏడు రోజులలో కొత్త కోవిడ్ కేసుల సంఖ్య రెట్టింపయ్యింది. కేరళ, గోవా, ఉత్తరాది రాష్ట్రాలైన ఢిల్లీ, హిమాచల్ ప్రదేశ్, పంజాబ్, హరియాణా, ఉత్తర్ ప్రదేశ్‌లో పెరుగుదల వేగంగా ఉంది. ఈ రాష్ట్రాల్లో చాలా వరకు మునిపటి వారం కంటే గతవారం మూడు రెట్లు ఎక్కువ. హిమాచల్ ప్రదేశ్‌ అత్యధికంగా 1,200 కొత్త కేసులతో దేశంలో ఆరో స్థానంలో నిలిచింది. అంతకు ముందు వారం ఈ సంఖ్య 409గా ఉంది. కొన్ని వారాలుగా వైరస్ వ్యాప్తి చెందుతున్న మహారాష్ట్ర, గుజరాత్‌లలో తాజా కేసుల సంఖ్య సాపేక్షంగా ఎక్కువగానే ఉంది. వృద్ధి రేటు మహారాష్ట్రలో స్థిరంగా ఉండగా... గుజరాత్‌లో గత వారం మందగించింది.

కర్ణాటక, తమిళనాడు ఇన్‌ఫెక్షన్ స్థిరమైన రేటుతో పెరుగుతూనే ఉంది. అదే సమయంలో తెలంగాణలో క్షీణించగా, ఆంధ్రప్రదేశ్‌లో ఇప్పుడిప్పుడే ప్రారంభమైంది. గత వారం కేరళ దాదాపు 4,000 కేసులతో 1,333 నుంచి మూడు రెట్లు పెరిగి, దేశంలో అత్యధిక కేసులు నమోదైన రాష్ట్రంగా మహారాష్ట్రను వెనక్కి నెట్టింది. మహారాష్ట్రలో గత వారం 70 శాతం పెరుగుదలతో 3,323 కేసులు (గతవారం 1956 కేసులు), గుజరాత్ 2,412 కేసులతో మూడో స్థానంలో నిలిచాయి. ముందు వారం కంటే గుజరాత్‌లో వ్యాప్తి రేటు తగ్గింది.

హిమాచల్ ప్రదేశ్‌లో కేసులు మూడు రెట్లు పెరిగాయి. ఢిల్లీలో గత వారంలో 1,733 తాజా ఇన్‌ఫెక్షన్లు నమోదయ్యాయి. అంతకుముందు వారం 681తో పోలిస్తే 2.5 రెట్లు పెరిగింది. ఇతర రాష్ట్రాలైన పంజాబ్‌లో 3.3 రెట్లు.. హరియాణాలో మూడు రెట్లు, యూపీలో రెండున్నర రెట్లు మేర పెరిగాయి. దేశంలో వరుసగా ఏడో వారం కేసుల పెరుగుదల నమోదయ్యింది. శనివారం నాటికి రోజువారీ పాజిటివిటీ రేటు మూడు శాతానికి చేరింది. ఇది వారం కిందట 1.4గా ఉంది.