ఆ విషయంలో జగన్ సర్కార్ క్లారిటీ ఇవ్వాలి: నాదెండ్ల మనోహర్

పోలవరం ప్రాజెక్టు ఎత్తు తగ్గించేందుకు సంతకాలు చేసిందా? లేదా? అనే విషయంపై జగన్ సర్కారు క్లారిటీ ఇవ్వాలని జనసేన పార్టీ పీఏసీ ఛైర్మన్ నాదెండ్ల మనోహర్ డిమాండ్ చేశారు. పోలవరం ప్రాజెక్టుకు సంబంధించి వైసీపీ ప్రభుత్వంపై నాదెండ్ల మనోహర్ తీవ్ర ఆరోపణలు చేశారు. పోలవరం ఎత్తును 41.15 మీటర్లకు పరిమితం చేసేందుకు అంగీకరిస్తూ ఏపీ ప్రభుత్వం సంతకాలు చేసిందని ఆరోపించారు. ఈ క్రమంలో త్వరలోనే జనసేనాని పవన్ కళ్యాణ్ పోలవరం ప్రాజెక్టును సందర్శించేందుకు వెళ్తారని వెల్లడించారు.

పోలవరం ప్రాజెక్టుపై కేంద్ర మంత్రి గజేంద్ర సింగ్ షెకావత్‌ను సైతం కలిశామని నాదెండ్ల మనోహర్ చెప్పారు. పోలవరం విషయంలో రాష్ట్ర ప్రభుత్వ వ్యవహరంపై తెలిసిన కొన్ని విషయాలు తమను ఆశ్చర్యానికి గురి చేశాయని తెలిపారు. పోలవరం ఎత్తును 41.15 మీటర్లకే పరిమితం చేస్తామని రాష్ట్ర ప్రభుత్వ అధికారులు సంతకాలు చేశారని వివరించారు. పునరావాసం ఖర్చును తగ్గించుకునేందుకే ఈ ప్రయత్నం చేసినట్లు పేర్కొన్నారు. పునరావాసం మొత్తాన్ని పెంచుతామన్న హామీని అమలు చేయకుండా ఉండేందుకే పోలవరం ఎత్తును తగ్గించేందుకు ఏపీ ప్రభుత్వం అంగీకరించిందని చెప్పారు.

అసలు, పోలవరం ఎత్తును తగ్గించేందుకు రాష్ట్ర ప్రభుత్వం సంతకాలు చేసిందా? లేదా? అనే విషయంపై మొదల స్పష్టతనివ్వాలని నాదెండ్ల మనోహర్ డిమాండ్ చేశారు. పోలవరం నిర్మాణానికి సంబంధించి ఖర్చులు రీయింబర్స్ చేస్తామని కేంద్రం చెప్పినా.. పనులెందుకు చేపట్టడం లేదని ప్రశ్నించారు. పోలవరం ప్రాజెక్టు.. జగనన్న పాపాల పథకం అని తీవ్ర వ్యాఖ్యలు చేశారు.

ఢిల్లీ పర్యటనలో వైసీపీ ప్రభుత్వం వల్ల రాష్ట్రానికి ఎలాంటి నష్టం జరుగుతుందో చర్చించామని నాదెండ్ల మనోహర్ పేర్కొన్నారు. సీఎం జగన్‌కు పోలవరం ప్రాజెక్టును పూర్తి చేద్దామనే చిత్తశుద్ధి లేదన్నారు. పోలవరం ప్రాజెక్టును నిర్మించకుండా ప్రజలను మోసగించేలా వైసీపీ వ్యవహరిస్తోందని చెప్పారు. పోలవరం ప్రాజెక్టును పూర్తి చేసి సాగునీరు అందిస్తామని వివిధ తేదీలు ప్రకటించారని.. కానీ, ఏదీ నిలబెట్టుకోలేదని తెలిపారు. ఈ క్రమంలో త్వరలోనే పవన్ కళ్యాణ్ పోలవరంలో పర్యటిస్తారని నాదెండ్ల మనోహర్ వెల్లడించారు.