పోలీసుల కళ్లుగప్పి గంజాయి స్మగ్లర్ జైలు నుంచి జంప్

విశాఖపట్నంలో గంజాయి స్మగ్లర్ కు బేడీలు వేసినా పోలీసుల కళ్లుగప్పి స్టేషన్ నుంచి పరారయ్యాడు. దీంతో పోలీసులు అతడి కోసం తీవ్రంగా గాలింపు చేపట్టారు. విశాఖపట్నంలో గంజాయి కేసులో పట్టుబడ్డ ఓ యువకుడు.. పోలీస్‌ స్టేషన్‌ నుంచి బేడీలతో తప్పించుకున్నాడు. పోలీసులు వెంటనే అప్రమత్తమై తీవ్రంగా గాలించినప్పటికీ నిందితుడి ఆచూకీ మాత్రం లభించలేదు. పోలీసులు తెలిపిన వివరాల మేరకు.. అనకాపల్లి జిల్లా రావికమతం మండలం చిన్నపాచిల గ్రామానికి చెందిన పప్పు నూకరాజు (27), చోడవరం మండలం లక్ష్మీపురం గ్రామానికి చెందిన సిరియాల సత్తిబాబు (24) లిక్విడ్‌ గంజాయి తరలిస్తున్నారు. ఈ క్రమంలో వీరిపై శుక్రవారం విశాఖపట్నం నగర టాస్క్‌ఫోర్స్‌ పోలీసులకు సమాచారం అందింది.

దీంతో రంగంలోకి దిగిన పోలీసులు.. నిందితులను రైల్వే స్టేషన్‌లో పట్టుకున్నారు. అనంతరం నిందితులు ఇద్దరినీ ఫోర్త్‌ టౌన్‌ పోలీస్‌ స్టేషన్‌కు తీసుకెళ్లి అప్పగించారు. పోలీసులు ఎన్‌డీపీఎస్‌ యాక్ట్‌ కింద ఇద్దరిపైనా కేసు నమోదు చేశారు. అప్పటికే రాత్రి కావడంతో శనివారం రిమాండ్‌కు పెట్టాలనే భావనతో ఇద్దరి చేతులకు బేడీలు వేసి పోలీస్ స్టేషన్‌లో ఉంచారు.

ఈ క్రమంలో శనివారం తెల్లవారుజామున ఏడు గంటల సమయంలో సత్తిబాబు, నూకరాజులకు వేసిన బేడీల లింక్‌ వీడిపోయింది. ఈ నేపథ్యంలో సత్తిబాబు స్టేషన్‌లో వున్న మహిళా కానిస్టేబుల్‌ కళ్లు కప్పి బేడీలతోనే స్టేషన్‌ నుంచి తప్పించుకున్నాడు. కొద్దిసేపటి తర్వాత మహిళా కానిస్టేబుల్‌ ఈ విషయాన్ని గుర్తించి ఉన్నతాధికారులకు సమాచారం ఇచ్చారు. దీంతో అంతా కలిపి తీవ్రంగా గాలింపు చేపట్టారు.

అయితే, పోలీస్ స్టేషన్‌ నుంచి బయటకు వెళ్లిన సత్తిబాబు చేతికి బేడీలు ఉండటంతో పోర్టు క్వార్టర్స్‌ వద్ద ఇద్దరు యువకులు గుర్తించి పట్టుకునే ప్రయత్నం చేయగా వారిని పక్కకు నెట్టేసి అక్కడి నుంచి తప్పించుకున్నాడు. తర్వాత పోలీసులు దీనిపై విస్తృత ప్రచారం చేయడంతో మధ్యాహ్నం 12 గంటల సమయంలో కంచరపాలెం ధర్మానగర్‌ బ్రిడ్జి వద్ద సత్తిబాబును గుర్తించిన కొందరు పట్టుకునే ప్రయత్నం చేయగా అక్కడి నుంచి తప్పించుకున్నట్టుగా పోలీసులు చెబుతున్నారు.

అయితే అప్పుడు సత్తిబాబు చేతికి బేడీలు లేకపోవడంతో వాటిని తొలగించుకుని ఉంటాడని పోలీసులు భావిస్తున్నారు. బేడీలు వేసిన వ్యక్తి తప్పించుకుని పోవడంతో సిబ్బందితో పాటు స్టేషన్‌ సీఐ నిర్లక్ష్యంపై అధికారులు సీరియస్‌ అయినట్లు తెలుస్తోంది. త్వరలోనే నిందితుడిని అదుపులోకి తీసుకుంటామని పోలీసులు వెల్లడించారు.