సీఎం జగన్‌తో పొంగులేటికి సన్నిహిత సంబంధాలు కలిసొచ్చాయా

ఏపీలో త్వరలోనే వ్యవసాయ మోటార్లు, నివాస గృహాలకు స్మార్ట్ మీటర్లను బిగించనున్నారు. ఇందుకు కోసం దక్షిణ, మధ్య డిస్కమ్‌లలో టెండర్లను ఏపీ సర్కారు ఖరారు చేసినట్లు సమాచారం. రూ.4,592 కోట్ల విలువైన టెండర్లను రాఘవ కన్‌స్ట్రక్షన్స్, షిర్డీసాయి ఎలక్ట్రికల్స్ కంపెనీకి జగన్ సర్కారు అప్పగించిందని తెలుస్తోంది. ఉమ్మడి నెల్లూరు, చిత్తూరు జిల్లాలకు సంబంధించిన రూ.2056.95 కోట్ల విలువైన పనులను రాఘవ కన్‌స్ట్రక్షన్స్‌కు కట్టబెట్టారని తెలుస్తుండగా.. ఉమ్మడి కడప, అనంతపురం, అనంతపురం జిల్లాలకు చెందిన రూ.2,535.66 కోట్ల విలువైన టెండర్లను షిర్డీసాయి ఎలక్ట్రికల్స్‌కు అప్పగించారని తెలుస్తోంది.

రాఘవ కన్‌స్ట్రక్షన్స్ కంపెనీ ఖమ్మం జిల్లాలకు చెందిన పొంగులేటి శ్రీనివాస రెడ్డి కుటుంబానికి చెందినదని.. ఆయన జగన్‌కు సన్నిహితుడు కావడంతోనే ఈ పనులను రాఘవ కన్‌స్ట్రక్షన్స్ అప్పగించారని టీడీపీ ఆరోపిస్తోంది. ఆ మధ్య పొంగులేటి శ్రీనివాస రెడ్డి సీఎం జగన్‌ను కలవడాన్ని ప్రస్తావిస్తోంది. పొంగులేటి, పెద్దిరెడ్డి మధ్య వ్యాపార లావాదేవీలు ఉన్నాయని.. అలాగే షిర్డీసాయి ఎలక్ట్రికల్స్ సంస్థ కడప ఎంపీ వైఎస్‌ అవినాశ్‌రెడ్డి అనుచరుడైన విశ్వేశ్వర్‌ రెడ్డిదని టీడీపీ నేత పట్టభిరామ్ ఆరోపించారు. జగన్ తన బినామీలకే విద్యుత్ కాంట్రాక్టులు కట్టబెట్టారని ఆయన ఆరోపించారు.

ఎస్‌పీడీసీఎల్ పరిధిలోనే రూ.4592 కోట్ల విలువైన పనులను జగన్ తన బినామీ కంపెనీలకు అప్పగించారని.. మూడు డిస్కమ్‌ల పరిధిలో సుమారు రూ.14 వేల కోట్ల వరకు దోచుకోవడానికి ప్లాన్ వేశారని పట్టభిరామ్ ఆరోపించారు. మూడు డిస్కంల పరిధిలోని టెండర్లకు సంబంధించిన వివరాలను ప్రజల ముందు ఉంచాలని ఆయన మంత్రి పెద్దిరెడ్డిని డిమాండ్ చేశారు.

నివాస గృహాలకు విద్యుత్ మీటర్లను బిగించే టెండర్లను అదానీకి అప్పగించే అవకాశం ఉందని ప్రచారం జరుగుతోంది. కాగా ఇప్పటి వరకు ఈ టెండర్లపై నిర్ణయం తీసుకోలేదని ఏపీ సర్కారు చెబుతోంది. వచ్చే ఏడాది ఎన్నికలు జరగనున్న వేళ.. జగన్ సన్నిహితులకు చెందిన కంపెనీలకు టెండర్లు కట్టబెట్టినట్లు జరుగుతున్న ప్రచారం అధికార పార్టీని ఇరకాటంలో పడేసే అవకాశం ఉంది. టీడీపీ ఆరోపణలపై జగన్ సర్కారు ఎలా స్పందిస్తుందో చూడాలి.

టీడీపీ ఆరోపణల సంగతి పక్కనబెడితే.. పొంగులేటి శ్రీనివాస రెడ్డికి సీఎం జగన్‌ కుటుంబంతో సన్నిహిత సంబంధాలు ఉన్నాయి. 2014లో పొంగులేటి వైఎస్సార్సీపీ తరఫున ఖమ్మం ఎంపీగా విజయం సాధించారు. తెలంగాణలో పార్టీ బాధ్యతలను జగన్ ఆయనకు అప్పగించారు. కానీ కొంత కాలం తర్వాత ఆయన టీఆర్ఎస్‌లో చేరారు. 2019లో పొంగులేటి కుమారుడి ఎంగేజ్‌మెంట్‌కు సీఎం జగన్ హాజరయ్యారు. గత ఏడాది ఖమ్మంలో జరిగిన పొంగులేటి శ్రీనివాస రెడ్డి కుమార్తె వివాహ రిసెప్షన్‌కు వైఎస్ షర్మిల హాజరయ్యారు.