రష్యాకు సహకరించేందుకు సిద్దమవుతున్న ఈజిప్ట్

ఉక్రెయిన్‌పై దండయాత్ర కొనసాగిస్తోన్న రష్యాకు సాయం చేయడానికి ఈజిప్టు సిద్ధమయ్యిందా? రహస్యంగా 40 వేల రాకెట్లను తయారుచేసి పంపనుందా? అంటే లీకైన అమెరికా నిఘా నివేదికలు అవునంటున్నాయని వాషింగ్టన్ పోస్ట్ కథనం ఉటంకించింది. అంతేకాదు, ఈజిప్టు సైనిక ఉన్నతాధికారులతో సమావేశమైన ఆ దేశ అధ్యక్షుడు అబ్దేల్ ఫతాహ్ ఎల్-సిసి.. ఆర్టిలరీ రౌండ్లు, గౌన్ పౌడర్‌ను రష్యాకు సరఫరా చేయడంపై చర్చించినట్టు పేర్కొంది. పశ్చిమ దేశాల నుంచి ఎటువంటి సమస్య లేకుండా రష్యాకు ఆయుధాల తరలింపు పక్కా ప్రణాళికతోనే జరగాలని అధికారులను ఆయన ఆదేశించినట్టు వివరించింది. ఫిబ్రవరి 17 నాటి అమెరికా నిఘా వర్గాల నివేదికలో ఈ విషయం ఉన్నట్టు వాషింగ్టన్ పోస్ట్ తెలిపింది.

ఈ పరిణామం అమెరికా అధికారులను, రాజకీయ నాయకులను దిగ్భ్రాంతికి గురి చేసింది. ‘సిసి రహస్యంగా రష్యా కోసం ఉక్రెయిన్‌లో ఉపయోగించగల రాకెట్‌లను నిర్మిస్తుందనేది నిజమైతే, మన సంబంధాల స్థితి గురించి మనం తీవ్రంగా పరిగణించాలి’ అని కనిక్టికట్ జూనియర్ సెనేటర్ క్రిస్ ముర్ఫీ వ్యాఖ్యానించారు. జాతీయ భద్రతా మండలి ప్రతినిధి జాన్ కిర్బీ స్పందిస్తూ.. పత్రాల చెల్లుబాటును నిర్ధారించడానికి నిరాకరించారని ఫాక్స్ న్యూస్ తెలిపింది. అయితే, మెటీరియల్ ప్రజల వినియోగం కోసం కాదని హెచ్చరించారు.

ఈ పరిణామం మధ్యప్రాచ్యం, ఉత్తర ఆఫ్రికాలో సన్నిహిత మిత్రులలో ఒకటైన ఈజిప్టుతో అమెరికా సంబంధాలను ప్రభావితం చేస్తుంది. అమెరికా విదేశాంగ మంత్రి ఆంటోనీ బ్లింకెన్ ఈ ఏడాది జనవరి చివరలో కైరోలో ఎల్-సిసితో సమావేశమయ్యారు. ఆ తర్వాత విదేశాంగ శాఖ ఒక ప్రకటన విడుదల చేసింది. ఉక్రెయిన్‌లో రష్యా క్రూరమైన యుద్ధం వల్ల ఆర్థికంగా ప్రభావితమైన ఈజిప్టుకు అమెరికా తరఫున బ్లింకేన్ సంఘీభావం తెలిపారని చెప్పింది. అమెరికా అధ్యక్షుడు జో బైడెన్ గతేడాది నవంబరులో ఈజిప్టు పర్యటనకు వెళ్లి ఎల్-సిసితో భేటీ అయ్యారు.

యుద్ధంపై ఆ దేశం వైఖరిపై ఈజిప్టు అధ్యక్షుడిని బైడెన్ ఈ సందర్భంగా అభినందించారు. గతంలో మాస్కో చేసిన సాయాన్ని తిరిగి చెల్లించి రష్యాకు సహాయం చేయాలని ఈజిప్ట్ నిర్ణయించినట్టు మిలటరీ ప్రొడక్షన్ విభాగం సహాయ మంత్రి మొహమ్మద్ సలా అల్-దిన్ చెప్పినట్టు ఓ అధికారి పేర్కొన్నారు. ఆ సహాయం ఏంటి? అనేది అస్పష్టంగా ఉంది. అయితే, ఉక్రెయిన్‌లో రష్యా యుద్ధం కారణంగా ప్రపంచ మార్కెట్‌కు అంతరాయాల మధ్య ఈజిప్ట్ గత సంవత్సరం రష్యన్ గోధుమలపై ఆధారపడటాన్ని పెంచిందని రాయిటర్స్ వార్తా ఏజెన్సీ తెలిపింది.