బాలుడ్ని ముద్దుపెట్టుకున్న బౌద్ధ గురువు,,,తీవ్ర విమర్శలు రావడంతో క్షమాపణలు

సోషల్ మీడియాలో వైరల్ అవుతోన్న తన వీడియోపై బౌద్ధమత గురువు దలైలామా క్షమాపణలు చెప్పారు. బాలుడి పెదాలపై ముద్దుపెట్టుకుని, అతడి నోటితో తన నాలుకను తాకాలని కోరుతున్న వీడియోపై తీవ్ర దుమారం రేగిన విషయం తెలిసిందే. దీంతో దలైలామా బృందం స్పందిస్తూ.. బాలుడు, అతడి కుటుంబానికి క్షమాపణలు చెప్పింది. ‘తనను కలుసుకునే వ్యక్తులతో ఆధ్యాత్మిక గురువు ఉల్లాసంగా గడిపి, ఆటపట్టిస్తుంటారు’ అని పేర్కొంది.

‘ఇటీవల జరిగిన సమావేశంలో ఒక బాలుడ్ని దలైలామాను ఆలింగనం చేసుకుంటారా? అని అడుగుతోన్న వీడియో వైరల్ అవుతోంది.. ఈ మాటలు బాధించినందుకు బాలుడు, అతడి కుటుంబానికి అలాగే ప్రపంచవ్యాప్తంగా ఉన్న అతని చాలా మంది స్నేహితులకు క్షమాపణలు చెప్పాలని కోరుకున్నారు.. బహిరంగంగా, కెమెరాల ముందు కూడా అమాయకంగా, సరదాగా కలుసుకునే వ్యక్తులను ఆటపట్టిస్తుంటారు.. జరిగిన ఘటనపై విచారం వ్యక్తం చేశారు’ అని తెలిపారు.

‘దలైలామా ఒక బౌద్ధ కార్యక్రమంలో ఒక భారతీయ బాలుడ్ని ముద్దుపెట్టుకుంటున్నాడు.. అతని నాలుకను తాకడానికి కూడా ప్రయత్నిస్తున్నాడు. వాస్తవానికి అతను 'నా నాలుకను తాకండి అని చెప్పారు.. ఇప్పుడు అతను ఎందుకు అలా చేస్తాడు?" జూస్ట్ బ్రోకర్స్ అనే నెటిజన్ ప్రశ్నించాడు. ‘దలైలామా ఈ చిన్న పిల్లవాడిని ఎందుకు ముద్దుగా చూస్తున్నాడు.. అతని నాలుకను చప్పరించమని ఎందుకు అడుగుతున్నాడు?’ అని స్టూ పీటర్స్ అనే మరో వ్యక్తి వ్యాఖ్యానించారు.

ఇది ఎప్పుడు, ఎక్కడ జరిగిందో మాత్రం తెలియలేదు. కానీ, దలైలామా తీరుపై తీవ్ర ఆగ్రహం వ్యక్తం చేస్తున్నారు. ఇలాంటి ప్రవర్తనను సహించకూడదని, ఆయన్ను అరెస్టు చేయాలని పలువురు డిమాండ్ చేస్తున్నారు. అయితే, 2019లో దలైలామా తన వారసుడి గురించి వ్యాఖ్యలు వివాదాస్పదమయ్యాయి. తదుపరి గురువు మహిళ అయితే ఆమె ‘ఆకర్షణీయంగా’ ఉండాలని వ్యాఖ్యలు చేశారు. ‘ఒక మహిళ బౌద్ద గురువైతే ఆమె మరింత ఆకర్షణీయంగా ఉండాలి’అని యూకే మీడియాకు ఇచ్చిన ఇంటర్వ్యూలో వ్యాఖ్యానించారు. ఇది ప్రపంచవ్యాప్తంగా విమర్శలకు దారితీసింది. అయితే, ఆ తర్వాత తన వివాదాస్పద వ్యాఖ్యలకు దలైలామా క్షమాపణలు చెప్పారు.