మహారాష్ట్రలో ఘోర రోడ్డు ప్రమాదం,,,12 మంది దుర్మరణం

మహారాష్ట్రలో ఓ ప్రైవేట్ బస్సు అదుపుతప్పి లోయలో పడిపోవడంతో ఘోర ప్రమాదం చోటు చేసుకొంది. ఈ ఘటనలో 12 మంది మృతి చెందగా.. 27 మందికి తీవ్ర గాయాలయ్యాయి. కొంతమంది క్షతగాత్రుల పరిస్థితి అత్యంత విషమంగా ఉన్నట్లు అధికారులు చెబుతున్నారు. శనివారం తెల్లవారుజుమున ఈ ప్రమాదం జరిగింది. గాయపడిన వారికి వైద్యులు చికిత్స అందిస్తున్నారు.

మహారాష్ట్రలోని ఖపోలీ పోలీస్ స్టేషన్ పరిధిలో ఈ ఘోర ప్రమాదం చోటుచేసుకుంది. ముంబైలోని గొరెగావ్‌కు చెందిన ఓ సంగీత బృందం పుణెకు సమీపంలోని పింప్రి చింఛ్వాడ్‌లోని ఓ కార్యక్రమంలో పాల్గొంది. కార్యక్రమం ముగిసిన తర్వాత తిరిగి ముంబైకు ఓ ప్రైవేట్ బస్సులో వెళుతున్నారు. తెల్లవారుజామన 4.50 గంటల సమయంలో బస్సు ఒక్కసారిగా అదుపు తప్పింది. పక్కన ఉన్న లోయలో పడింది. దీంతో స్ధానికుల నుంచి సమాచారం అందుకున్న పోలీసులు, అధికారులు వెంటనే ఘటనా స్థలానికి చేరుకున్నారు. సహాయక చర్యలను చేపట్టి గాయపడిన వారిని సమీపంలోని ఆస్పత్రికి అంబులెన్స్‌లలో తరలించారు.

చనిపోయిన వారి మృతదేహాలను పోస్టుమార్టం కోసం మరో ఆస్పత్రికి తరలించనున్నారు. పోస్టుమార్టం తర్వాత మృతదేహాలను వారి వారి కుటుంబసభ్యులకు అప్పగించనున్నారు. మృతులంతా 25 ఏళ్ల లోపు వారేనని అధికారులు చెబుతున్నారు. అధిక వేగమే ప్రమాదానికి కారణమని అధికారులు గుర్తించారు. అధిక వేగం వల్ల బస్సు అదుపు తప్పినట్లు నిర్ధారించారు. ఈ ప్రమాదంపై కేసు నమోదు చేసుకుని పోలీసులు దర్యాప్తు కొనసాగిస్తున్నారు. ప్రమాదానికి గల కారణాలపై విచారణ చేపడుతున్నారు. ఈ ఘటనకు సంబంధించి మరిన్ని వివరాలు తెలియాల్సి ఉంది.