వజ్రం లోపల మరో వజ్రం ,,,బీటింగ్ హార్ట్‌గా పేరు పెట్టిన సూరత్ కంపెనీ

ప్రపంచ వ్యాప్తంగా వజ్రాలకు డిమాండ్ ఎక్కువ. వజ్రాలు పొదిగిన ఆభరణాలు భారీ ధర పలుకుతాయి. మీరు ఇప్పుడు చూస్తున్నది అత్యంత అరుదైన వజ్రం. దాని పేరు బీటింగ్ హార్ట్. వజ్రాల వ్యాపారానికి పెట్టింది పేరైన సూరత్‌లో ఓ వజ్రాల ఉత్పత్తిదారు ఈ అరుదైన వజ్రాన్ని గుర్తించారు. 0.329 క్యారెట్ల బరువున్న ఈ వజ్రం లోపల మరో వజ్రం ఉంది. ఈ విషయాన్ని 2022 అక్టోబర్ల వీడీ గ్లోబల్ సంస్థ గుర్తించింది. వజ్రం లోపల ఉన్న చిన్న వజ్రం అటు ఇటు స్వేచ్ఛగా తిరుగుతుండటంతో.. దాన్ని కదిపినప్పుడు శబ్దం వస్తోంది. దీంతో ఈ వజ్రానికి బీటింగ్ హార్ట్ అని పేరు పెట్టామని వీడీ గ్లోబల్ చైర్మన్ వల్లభ్ వఘాసియా తెలిపారు. తాము ఇప్పటి వరకూ ఇలాంటి వజ్రాన్ని చూడలేదన్నారు.

సూరత్, ముంబై కేంద్రంగా ప్రపంచవ్యాప్తంగా వజ్రాల వ్యాపారం చేస్తున్న వీడీ గ్లోబల్.. ఈ వజ్రాన్ని విశ్లేషించడం కోసం యూకేలోని మెయిడిన్‌హెడ్‌‌లో ఉన్న డీ బీర్స్ ఇన్‌స్టిట్యూట్ ఆఫ్ డైమండ్స్‌కు పంపించింది. డీ బీర్స్‌లో టెక్నికల్ ఎడ్యుకేటర్ పని చేసే సమంత సిబ్లీ బీటింగ్ హార్ట్ వజ్రం గురించి మాట్లాడుతూ.. తన 30 ఏళ్ల అనుభవంలో ఇలాంటి వజ్రాన్ని ఇంతకు ముందెన్నడూ చూడలేదన్నారు. అరుదైన వజ్రం కావడంతో ఇది సాధారణ వజ్రం కంటే ఎక్కువ ధర పలికే అవకాశం ఉంది.

ఈ వజ్రాన్ని పరీక్షించిన డీ బీర్స్ ఇది అరుదైన వజ్రమని తేల్చింది. వజ్రం లోపల వజ్రం ఉన్న అరుదైన వజ్రాన్ని గతంలో రష్యాలోని సైబీరియాలో గుర్తించారు. దానికి మత్ర్యోష్క అని పేరు పెట్టారు. 2019లో యకుట్ డైమండ్ ట్రేడింగ్ కంపెనీకి చెందిన స్పెషలిస్టులు ప్రాసెసింగ్ చేస్తుండగా ఈ వజ్రాన్ని గుర్తించి.. అల్రోసా అనే డైమండ్ మైనింగ్ కంపెనీ ఆర్ అండ్ డీ విభాగానికి పంపించారు. ఈ డైమండ్ లోపలి చిన్న వజ్రం కూడా స్వేచ్ఛగా కదులుతుంది. కాగా మత్ర్యోష్క బరువు 0.62 క్యారెట్లు ఉంటుంది. లోపలి వజ్రం బరువు 0.02 క్యారెట్లు ఉంటుందని అంచనా. 2021లో ఆస్ట్రేలియాలోనూ ఇలాంటి డబుల్ డైమండ్‌ను గుర్తించారు. పశ్చిమ ఆస్ట్రేలియాలో గుర్తించిన ఈ వజ్రం బరువు 0.844 క్యారెట్లు.