ఆ స్థానం మహిళా రిజర్వు కావడంతో... తప్పని సరి పరిస్థితుల్లో పెళ్లి చేసుకొన్నాడు

ఓ ఎన్నికల స్థానం  మహిళా రిజర్వుడు కావడంతో పెళ్లి చేసుకొని వ్యక్తిని పెళ్లి పీఠాలెక్కించింది. అతను విద్యార్థి దశ నుంచే రాజకీయాల పట్ల ఆకర్షితుడయ్యాడు. ప్రజలకు సేవ చేసేందుకు రాజకీయాలను ఎంచుకున్నాడు. తన లక్ష్యానికి అడ్డంకిగా మారుతుందనుకున్నాడో, ఏమో.. పెళ్లి కూడా చేసుకోలేదు. 30 ఏళ్లుగా వివిధ హోదాల్లో సేవ చేస్తున్నాడు. ఎన్నికల సంఘం ఇచ్చిన చిన్న ట్విస్టుతో చివరికి 45 ఏళ్ల వయసులో పెళ్లికి సిద్ధమయ్యాడు. కేవలం 45 గంటల్లో వధువును వెతుక్కున్నాడు. ఉత్తర్‌ ప్రదేశ్‌లోని రాంపూర్‌కు చెందిన ఓ రాజకీయ నాయకుడు ఇప్పుడు వార్తల్లో ప్రముఖంగా నిలిచాడు.

మామూన్ షా ఖాన్ ప్రస్తుతం రాంపూర్ మున్సిపల్ కౌన్సిల్ ప్రెసిడెంట్‌గా ఉన్నారు. రాంపూర్ నగర్ స్థానం నుంచి 30 ఏళ్లుగా కాంగ్రెస్ పార్టీ తరఫున ఎన్నికల బరిలో నిలిచి గెలుస్తున్నారు. ఈసారి మరొక దఫా స్థానిక సంస్థలకు ఎన్నికలు వచ్చాయి. ఎప్పట్లాగే ఎన్నికల్లో మరోసారి పోటీ చేయాలని మామూన్ షా ఖాన్ భావించారు. రెండు నెలల కిందటి నుంచే జోరుగా ప్రచారం కూడా నిర్వహిస్తున్నారు.

అయితే, ఈసారి రాంపూర్ నగర్ స్థానాన్ని ఎన్నికల సంఘం ఈసారి మహిళలకు రిజర్వ్ చేసింది. దీంతో పెళ్లి చేసుకోకూడదనే ఒట్టును తీసి గట్టున పెట్టి 45 ఏళ్ల వయసులో వివాహానికి సిద్ధమయ్యాడు మామూన్ ఖాన్. తన భార్యను బరిలోకి దింపాలనే లక్ష్యంతో పెళ్లికి సిద్ధమయ్యాడు.

రాంపూర్‌ మున్సిపల్ ఎన్నికలకు నామినేషన్ దాఖలు చేసేందుకు చివరి తేదీ ఏప్రిల్‌ 17. సమయం చాలా తక్కువగా ఉండటంతో వెంటనే తనకొక వధువును చూడాల్సిందిగా అనుచరులను కోరాడు. 45 గంటల్లో వారు అమ్మాయిని చూసి పెట్టారు. మామూన్ ఖాన్ గురించి తెలుసుకొని ఆమె కూడా వెంటనే పెళ్లికి ఓకే చెప్పింది. ఆగమేఘాల మీద పెళ్లి ఏర్పాట్లు చేశారు. శనివారం (ఏప్రిల్ 15) వీరిద్దరూ పెళ్లి బంధం ద్వారా ఒక్కటి అవుతున్నారు. ఆ వెంటనే నామినేషన్ దాఖలు చేసేందుకు మామూన్ ఖాన్ ఏర్పాట్లు చేసుకున్నారు.

ప్రజలకు నిస్వార్థ సేవ చేయాలనే ఉద్దేశంతోనే ఇన్నాళ్లూ పెళ్లి చేసుకోలేదని చెప్పిన మామూన్ ఖాన్.. ఇప్పుడు కూడా ప్రజల కోసమే పెళ్లి చేసుకుంటున్నట్లు చెప్పడం కొసమెరుపు. విద్యార్థి దశ నుంచీ రాజకీయాల్లో, సామాజిక సేవా కార్యక్రమాల్లో బిజీగా ఉంది పెళ్లి చేసుకునేందుకు సమయం చిక్కలేదని మామూన్‌ ఖాన్‌ చెప్పారు.

‘నేను ఎన్నికల్లో పోటీ చేయాలని ప్రజలు కోరుకున్నారు. అందుకే ఇప్పుడు పెళ్లి చేసుకోవాలనే నిర్ణయం బలవంతంగా తీసుకున్నాను. 15న నా పెళ్లి. ఆ తర్వాత ఎన్నికల్లో పోటీ చేసేందుకు నా భార్య వస్తుంది. ఎన్నికల్లో పోటీ చేయడమైతే ఖాయం. ఏ పార్టీ తరఫున అనేది తేలాల్సి ఉంది’ అని మామూన్ ఖాన్ అన్నారు.

ఎన్నికల్లో భార్యలను నిలబెట్టి, పురుషులు ఎలా ఏలుతున్నారనే అంశాన్ని ఇటీవల ఓటీటీలో విడుదలైన ‘పంచాయత్’ సిరీస్‌లో హైలెట్ చేశారు. ఇది చర్చనీయాంశంగా మారిన నేపథ్యంలో మామూన్ ఖాన్ తీసుకున్న నిర్ణయం మరో రకమైన చర్చకు కూడా దారి తీస్తుండటం గమనార్హం.